លោក សម រង្ស៊ី ចាប់ផ្តើមរំលឹកពីព្រះរាជតួនាទីរបស់អតីតព្រះមហាក្សត្រ មុនការបោះឆ្នោតសំខាន់
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ នៅលើហ្វេសប៊ុករបស់លោកនាថ្ងៃព្រហស្បតិ៍នេះ បានចាប់ផ្តើមលើកយកឯកសារចាស់ៗ ជាឃ្លីបវីដេអូខ្លី ដែលបង្ហាញពីព្រះរាជបន្ទូលឈឺឆ្អាលរឿងជាតិ និងប្រវត្តិសាស្ត្ររបស់អតីតព្រះមហាក្សត្រ ព្រះបាទសម្តេចព្រះ នរោត្តម សីហនុ។ ការលើកយកឯកសារភ្ជាប់ជាមួយអតីតព្រះមហាក្សត្រពេលនេះ ត្រូវបានអ្នកវិភាគនយោបាយយល់ឃើញថាជាយុទ្ធសាស្ត្រ របស់លោក សម រង្ស៊ី ដើម្បីធ្វើយ៉ាងណាឲ្យលោកបានចូលស្រុកមុនការបោះឆ្នោត ក៏ប៉ុន្តែទិដ្ឋភាពសង្គម និងនយោបាយខុសគ្នា។
ចុះផ្សាយនៅថ្ងៃ៖
ស្តាប់ - ០២:១៩
ខណៈដែលការបោះឆ្នោតជ្រើសតាំងតំណាងរាស្ត្រនីតិកាលទី៧ នៅសល់មិនដល់៧ខែទៀតផងនោះ លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ បានលើកយកឃ្លីបវីដេអូខ្លីពីអតីតកាល ប្រហែលជាង២នាទី អំឡុងពេលដែលលោកចូលគាត់អតីតព្រះមហាក្សត្រ នរោត្តម សីហនុ មកបង្ហោះនៅលើហ្វេសប៊ុករបស់លោក។
អ្វីដែលោក សម រង្ស៊ី ចង់បង្ហាញតាមរយៈឃ្លីបវីដេអូនេះគឺ ព្រះរាជបន្ទូលរបស់អតីតព្រះមហាក្សត្រ ដែលព្រះអង្គហ៊ានសរសេរបញ្ចេញព្រះរាជយោបល់ ខណៈដែលរដ្ឋធម្មនុញ្ញខ្មែរ ចែងថាអង្គព្រះមហាក្សត្រសោយរាជ្យ តែមិនកាន់អំណាច។ វីដេអូក៏បានរំលេចផងដែរថាអតីតព្រះមហាក្សត្រដែលសោយរាជ្យ មិនត្រឹមតែបំពេញព្រះរាជតួនាទីជាស្តេចសោយរាជ្យប៉ុណ្ណោះទេ គឺព្រះអង្គមានព្រះទ័យកង្វល់ពីជាតិ ប្រជារាស្ត្រ និងប្រវត្តិសាស្ត្រ។
ចំណុចនេះ ត្រូវលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាមើលឃើញថាការបង្ហោះសារពាក់ព័ន្ធនឹងអតីតព្រះមហាក្សត្ររបស់លោក សម រង្ស៊ី នៅពេលនេះ គឺជាចេតនាទាញការចាប់អារម្មណ៍ពីមហាជន បង្ហាញពីការគោរព និងដង្ហែតាមអង្គអតីតព្រះមហាក្សត្រ។ លើសពីនេះ លោកបណ្ឌិត គិន ភា យល់ថាសាររបស់លោក សម រង្ស៊ី ក៏ចង់បង្ហាញពីការវាយប្រហារទៅលើអង្គព្រះមហាក្សត្របច្ចុប្បន្នផងដែរ។
សូមរំលឹកថា ជារៀងរាល់មុនមានការបោះឆ្នោតម្តងៗ អ្នកនយោបាយខ្មែរដែលចម្រូងចម្រាសនឹងគ្នា តែងទទួលបានការសម្របសម្រួលគ្នាក្រោមព្រះរាជតំរិះរបស់អង្គព្រះមហាក្សត្រ នរោត្តម សីហនុ កាលដែលព្រះអង្គនៅមានព្រះជន្ម។ ក៏ប៉ុន្តែសម្រាប់ពេលនេះ ស្ថានភាពមានការប្រែប្រួល ដោយមិនមានទៀតទេការសម្របសម្រួលនយោបាយមុនការបោះឆ្នោត។
លោកបណ្ឌិត គិន ភា កត់សម្គាល់បន្តថាទិដ្ឋភាពពីអតីតកាលមានលក្ខណៈខុសគ្នានឹងបច្ចុប្បន្ន ពោលគឺមេដឹកនាំបក្សប្រឆាំងរូបនេះ មិនអាចប្រើយុទ្ធសាស្ត្រដដែលមកអនុវត្តបានទេ ដោយសារលោក សម រង្ស៊ី មិនមានទំងន់ខាងនយោបាយសម្រាប់ការដោះដូរឡើយ។
គណបក្សប្រជាជនកម្ពុជា ក៏ដូចមេដឹកនាំជាន់ខ្ពស់គណបក្សនេះ តែលើកឡើងជាញឹកញយ ហើយថាមិនមានការចរចានយោបាយអ្វីទាំងអស់ ជាមួយលោក សម រង្ស៊ី ខណៈដែលលោក សម រង្ស៊ី ត្រូវបានផ្តន្ទាទោសពីតុលាការក្រុងភ្នំពេញឲ្យជាប់ពន្ធនាគារ ជាច្រើនឆ្នាំ និងច្រើនបទល្មើស ហើយចុងក្រោយនេះក៏បានរងនូវយុទ្ធសាស្ត្រនយោបាយដាក់ឲ្យនៅឯកោ(IF) របស់លោកនាយករដ្ឋមន្ត្រី ហ៊ុន សែន ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ