ក្រសួងកសិកម្ម នឹងជំរុញការផលិតផលិតផលដែលមានគុណភាព និងតម្លៃបន្ថែមខ្ពស់ សម្តាប់ការនាំចេញ
លោក ឌិត ទីណា រដ្ឋមន្ត្រីក្រសួងកសិកម្មបានអះអាងថា ក្រសួងនឹងពង្រឹងលើគុណភាពនៃការផលិតលើផ្នែកកសិកម្មឱ្យបានល្អ និងអាចនាំចេញទៅទីផ្សារក្រៅប្រទេសបានក្នុងតម្លៃខ្ពស់ ព្រោះនេះជាចំណុចខ្លាំងរបស់វិស័យកសិកម្មកម្ពុជា។ ចំពោះទីផ្សារក្នុងស្រុក លោក ឌិត ទីណា បញ្ជាក់ថា ក្រសួងក៏នឹងជំរុញយន្តការរក្សាតម្លៃថេរចំពោះការផ្គត់ផ្គង់ដល់អ្នកប្រើប្រាស់ក្នុងស្រុក។
ចុះផ្សាយនៅថ្ងៃ៖
ថ្លែងនៅក្នុងសន្និសីទកាសែតស្តីពី «ទស្សនទាន ក្នុងវិស័យកសិកម្មនៅកម្ពុជា» លោកឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា នៅពេលខាងមុខ ក្រសួងនឹងជំរុញការផលិតផលិតផលគន្លឹះទាំងឡាយណាដែលមានគុណភាពខ្ពស់ និងដែលមានតម្លៃបន្ថែមខ្ពស់ សម្រាប់នាំចេញទៅទីផ្សារបរទេស។
រដ្ឋមន្ត្រីក្រសួងកសិកម្ម ដែលទើបតែឡើងកាន់តំណែងជាង៣ខែរូបនេះបន្តថា លោកនឹងរក្សាតម្លៃថេរចំពោះការផ្គត់ផ្គង់ក្នុងស្រុក។ ប៉ុន្តែចំពោះការនាំចេញទៅទីផ្សារក្រៅស្រុកវិញ លោកនឹងបង្កើនតម្លៃឱ្យស្របទៅនឹងគុណភាពនៃផលិតផលនាំចេញរបស់កម្ពុជា។
តាមរយៈទស្សនទាននេះ លោក ឌិត ទីណា គូសបញ្ជាក់ថា កសិករកម្ពុជា នឹងមានជម្រើសក្នុងការពិនិត្យមើល ថាគួរជ្រើសយកការផលិតណាមួយសម្រាប់ការផ្គត់ផ្គង់ក្នុងស្រុកឬនាំចេញទៅក្រៅប្រទេស។
ចំពោះការផលិតកសិផលដែលមានតម្លៃបន្ថែមរបស់កម្ពុជាទៅទីផ្សារក្រៅប្រទេសនេះ លោក ឌិត ទីណា បញ្ជាក់ថា ក្រសួងនឹងផ្សព្វផ្សាយអំពីគុណភាពនៃកសិផលរបស់កម្ពុជាទៅកាន់ប្រទេសជាដៃគូបន្ត ហើយក៏នឹងជំរុញឱ្យអ្នកផលិតក្នុងស្រុកយល់ដឹងពីការជ្រើសរើសប្រភេទផលិតផលកសិកម្មណាមួយដែលមានគុណភាព និងអាចលក់បានក្នុងតម្លៃខ្ពស់។
ជុំវិញរឿងនេះ ប្រធានសមាគមសម្ព័ន្ធកសិករកម្ពុជា លោក ថេង សាវឿនយល់ថា ការជំរុញការនាំចេញឱ្យបានតម្លៃខ្ពស់ មិនមានអ្វីជាបញ្ហាចោទនោះទេ។ លោក ថេង សាវឿន ចង់ឃើញក្រសួងពាក់ព័ន្ធស្វែងរកទីផ្សារនាំចេញឱ្យទូលំទូលាយជាងមុន និងស្វះស្វែងរកវិធីសាស្ត្រកែឆ្នៃផលិតផលដែលមានស្រាប់ក្នុងស្រុក ដើម្បីអាចនាំចេញទៅកាន់ទីផ្សារអន្តរជាតិបានច្រើន និងលក់បានក្នុងតម្លៃខ្ពស់។
សូមជម្រាបថា ការនាំចេញទំនិញស្រូវ-អង្ករ និងកសិផលផ្សេងទៀតរបស់កម្ពុជាក្នុងរយៈពេល១១ខែឆ្នាំ២០២២ មានទំហំទឹកប្រាក់ប្រមាណ៣,៣៦២លានដុល្លារ។ ក្នុងនោះ ចំណូលពីការនាំចេញអង្ករ-ស្រូវ មានចំនួនជិត៦០០លានដុល្លារ និងចំណូលបានមកពីការនាំចេញកសិផលក្រៅពីស្រូវអង្ករ មានចំនួនជាង ២០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ