ក្រុមហ៊ុនទេសចរណ៍ចិនមួយចំនួនបង្ហាញតម្រុយចង់តភ្ជាប់ជើងហោះឡើងវិញ
ក្រុមហ៊ុនទេសចរណ៍ចិនមួយចំនួនបង្ហាញនិន្នាការតភ្ជាប់ជើងហោះឡើងវិញជាមួយកម្ពុជាបន្ទាប់ពីរដ្ឋាភិបាលបើកជើងមេឃស្វាគមន៍ទេសចរចិន ខណៈដែលចិនគ្រោងបើកចំហរប្រទេសនៅថ្ងៃទី០៨ខែមករា។ ជាមួយគ្នានេះ ក្រសួងទេសចរណ៍នៅថ្ងៃទី៥ខែមករារំពឹងថា ការត្រឡប់មកវិញនៃទេសចរចិន អាចនឹងធ្វើឲ្យកម្ពុជាស្គាល់កំណើនទេសចរអន្តរជាតិសរុប ៧លាននាក់នៅឆ្នាំ២០២៥ ដូចផែនការដែលបានគ្រោងទុក។
ចុះផ្សាយនៅថ្ងៃ៖
ស្តាប់ - ០២:៣៧
ថ្លែងប្រាប់វិទ្យុបារាំងអន្តរជាតិrfi នៅថ្ងៃទី៦ខែមករានេះ លោក ស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលកម្ពុជាបានគូសបញ្ជាក់បន្ថែមថា ទោះជាមានតម្រុយអំពីក្រុមហ៊ុនទេសចរណ៍ចិនមួយចំនួនបង្ហាញនិន្នាការតភ្ជាប់ជើងហោះឡើងវិញក៏ដោយតែក្រុមហ៊ុនទាំងនោះមិនទាន់ស្នើសុំការចុះចតជាក់លាក់នៅឡើយ។ ស្នើសុំការចុះចតជាក់លាក់ទើបរាប់បញ្ចូលជាសំណើរផ្លូវការ។ តែយ៉ាងណាមិញអ្នកនាំពាក្យអាកាសចរណ៍ស៊ីវិលកម្ពុជារូបនេះអំពាវនាវឲ្យអាជ្ញាធរពាក់ព័ន្ធសម្រួលនូវវិធានការផ្សេងៗ ដើម្បីបើកទូលាយទទួលធុរជននិងភ្ញៀវទេសចរចិនពេលមកដល់កម្ពុជា។
តាមគម្រោងអាកាសចរណ៍ស៊ីវិលកម្ពុជាកំពុងពិភាក្សាជាមួយក្រុមហ៊ុនអាកាសចរណ៍ធំៗចំនួន៣រៀបចំជើងហោះហើរឡើងវិញ ដើម្បីបន្តជំរុញលំហូរភ្ញៀវទេសចរ និងបរិមាណជើងហោះហើរមកកម្ពុជាបន្ថែមទៀត បន្ទាប់ពីក្រុមហ៊ុនអាកាសចរណ៍ធំៗចំនួន៧បានត្រឡប់មកធ្វើប្រតិបត្តិការហោះហើរមកកាន់កម្ពុជាឡើងវិញ ដែលជាហេតុធ្វើឲ្យកំណើនអ្នកដំណើរបរទេសបានកើនឡើងរហូតដល់៦០០នាក់ក្នុងមួយថ្ងៃគិតត្រឹមដើមខែធ្នូឆ្នាំ២០២២កន្លងទៅថ្មីៗនេះ។
ដំណាលគ្នានេះ ក្រសួងទេសចរណ៍កម្ពុជា នៅថ្ងៃទី០៥ ខែមករា បានគូសបញ្ជាក់ដែរថា ការត្រឡប់មកវិញនៃទេសចរចិន អាចនឹងធ្វើឲ្យកម្ពុជាស្គាល់កំណើនទេសចរអន្តរជាតិសរុប ៧លាននាក់នៅឆ្នាំ២០២៥ ដូចផែនការដែលបានគ្រោងទុក។ បើតាមក្រសួង នៅមុនវិបត្តិកូវីដ១៩ ពោលគឺនៅឆ្នាំ២០១៩ ទេសចរចិនមកកម្ពុជា មានជាង ២.៣លាននាក់ ស្មើនឹង ៣៥.៧ភាគរយនៃទេសចរអន្តរជាតិ គិតជាចំណូលស្មើនឹងប្រមាណ ១ ៨០០លានដុល្លារលើចំណូលសរុបប្រមាណ ៥ពាន់លានដុល្លារ។
នៅចំពោះមុខការបើកជំហរជើងមេឃទទួលស្វាគមន៍ទេសចរចិននិងទេសចរប្រទេសផ្សេងទៀត ក្រសួងក៏បានអំពាវនាវឲ្យគ្រប់ភាគីពាក់ព័ន្ធបង្កើតព្រឹត្តិការណ៍ទេសចរណ៍ វប្បធម៌ កីឡា និងសកម្មភាពផ្សព្វផ្សាយនានានៅកម្ពុជា ដើម្បីឲ្យការផ្ដល់សេវានៅកម្ពុជាកាន់តែល្អប្រសើរ។
លោកស្រី ឆាយ ស៊ាវលីន ប្រធានសមាគមន៍ទីភ្នាក់ងារទេសចរណ៍កម្ពុជារំពឹងថា ប្រតិបត្តិករផ្នែកទេសចរណ៍និងសេដ្ឋកិច្ចប្រទេសកម្ពុជាទាំងមូល នឹងទទួលបានប្រយោជន៍ច្រើនពីលំហូរទេសចរចិនព្រោះមិនសម្រាប់តែកម្ពុជាប្រទេសក្បែរកម្ពុជាក៏ចង់បានលំហូរទេចរចិនទៅដល់ដែរ។ ប៉ុន្តែយ៉ាងណាលោកស្រីមិនភ្លេចរំឮកទៅភាគីពាក់ព័ន្ធត្រូវគោរពតាមក្រមប្រតិបត្តិស្ដីពីការបង្ការ និងទប់ស្កាត់ជំងឺកូវីដ១៩ ដែលដាក់ចេញដោយរដ្ឋាភិបាលនាពេលកន្លងមកដែរដើម្បីបញ្ចៀសកម្ពុជាពីវិបត្តិកូវីដធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ