បេសកកម្ម៥ឆ្នាំ៖ លោក កៅ គឹមហួន ត្រៀមសម្របសម្រួលបញ្ហាផ្ទៃក្នុងអាស៊ាន ក្នុងនាមជាអគ្គលេខាធិការថ្មី
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានចេញពីប្រទេសកម្ពុជា ធ្វើដំណើរទៅប្រទេសឥណ្ឌូនេស៊ី ដើម្បីកាន់តំណែងជាអគ្គលេខាធិការអាស៊ាន។ ក្នុងបេសកកម្ម៥ឆ្នាំខាងមុខ លោក កៅ គឹមហួន បានអះអាងថា លោកបានត្រៀមខ្លួនជាស្រេចដើម្បីសម្របសម្រួលបញ្ហាភូមា ដែលជាបញ្ហាផ្ទៃក្នុងអាស៊ាន នៅក្នុងនាមជាអគ្គលេខាធិការថ្មី។
ចុះផ្សាយនៅថ្ងៃ៖
ស្តាប់ - ០២:០៤
នៅចំពោះមុខតំណែងថ្មី ជាអគ្គលេខាធិការអាស៊ាន លោក កៅ គឹមហួន ថា លោកមានតួនាទីជាអ្នកគាំទ្រដល់យន្តការអាស៊ានទាំងអស់ រួមទាំងកិច្ចប្រជុំទាំងអស់ដែលធ្វើឡើងជារៀងរាល់ឆ្នាំ។ លោក កៅ គឹមហួន ថា លោកនឹងដើរតួនជាអ្នកសម្របសម្រួលនៅរាល់ការងារទាំងអស់អាស៊ាន ដ្បិតអង្គការតំបន់មួយនេះមានដៃគូសហការផ្សេងៗជាច្រើន។ នេះបើតាមការបញ្ជាក់របស់លោក កៅ គឹមហួន នៅក្នុងបទសម្ភាសជាមួយវិទ្យុបារាំងអន្តរជាតិ នាអាកាសយានដ្ឋានអន្តរជាតិភ្នំពេញ មុនពេលដែលលោកត្រូវចេញដំណើរទៅកាន់ការងារ នៅឯប្រទេសឥណ្ឌូនេស៊ី នាព្រឹកថ្ងៃសុក្រនេះ។
ទោះយ៉ាងណា បញ្ហាភូមា នៅតែមិនបំភ្លេចឬទាត់ចេញពីការទទួលខុសត្រូវរបស់អគ្គលេខាធិការអាស៊ាននោះដែរ។ សម្រាប់លោក កៅ គឹមហួន ក្នុងនាមជាអគ្គលេខាធិការថ្មី គឺលោកនឹងត្រូវស្វែងយល់បន្ថែមទៀតអំពីការវិវត្តន៍ស្ថានការណ៍នៅក្នុងប្រទេសភូមា។ បើតាមលោក កៅ គឹមហួន គឺលោកត្រូវធ្វើការជាមួយលោក Joko Widodo ប្រធានាធិបតីឥណ្ឌូនេស៊ី និងជាប្រធានប្តូរវេនអាស៊ានឆ្នាំ២០២៣ និងជាមួយប្រេសិតពិសេសអាស៊ាន ដើម្បីជំរុញឲ្យរបបសឹកអនុវត្តនូវកិច្ចព្រមព្រៀងជាឯកច្ឆ័នទាំង៥ចំណុច ដែលធ្វើឡើងនៅឯទីក្រុងហ្សាកាតា ឆ្នាំ២០២១។
ក្នុងមុខតំណែងជាប្រវត្តិសាស្រ្តសម្រាប់កម្ពុជាពេលនេះ លោក កៅ គឹមហួន បានថ្លែងដោយក្តីរំភើប ព្រោះតួនាទីនេះទទួលបានការយល់ស្របពីសំណាក់ប្រមុខដឹកនាំអាស៊ានទាំងអស់។ ក្នុងបេសកកម្ម៥ឆ្នាំ លោក កៅ គឹមហួន បញ្ជាក់ថា លោកនឹងប្រើប្រាស់ពេលវេលានេះ ឲ្យមានតម្លៃក្នុងការដោះស្រាយបញ្ហាអាស៊ាន ក្នុងនាមជាពលរដ្ឋខ្មែរ។ លោកថា លោកមានទំនុកចិត្តខ្ពស់ក្នុងតួនាទីថ្មីនេះ ដោយសារតែអ្នកជំនាញកិច្ចការអន្តរជាតិរូបនេះ ធ្លាប់កាន់ការងារច្រើនទាក់ទងទៅនឹងអាស៊ាន។
គួរបញ្ជាក់ថា លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី នឹងត្រូវកាន់តំណែងជាអគ្គលេខាធិការអាស៊ាន ក្នុងអាណត្តិ៥ឆ្នាំ ពីឆ្នាំ២០២៣រហូតដល់២០២៨ ក្រោយអគ្គលេខាធិការអាស៊ានចាស់ លោក Lim Jock Hoi បានអស់អាណត្តិនៅឆ្នាំ២០២២។ សម្រាប់កម្ពុជា លោក កៅ គឹមហួន ជាមនុស្សទី២ ដែលចូលទៅកាន់តំណែនៅអង្គការអាស៊ាន ខណៈដែលលោក គង់ ភោគ រដ្ឋលេខាធិការក្រសួងការបរទេស ក៏ធ្លាប់ធ្វើជាអគ្គលេខាធិការរងបានមួយអាណត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ