សមាគមទេសចរណ៍កម្ពុជាចាត់ទុកថា កម្ពុជានឹងចំណេញផលសេដ្ឋកិច្ចពីទេសចរចិន ជាជាងហានិភ័យពីករណីឆ្លងកូវីដ១៩
សមាគមទេសចរណ៍កម្ពុជាលើកឡើងថា កម្ពុជានឹងចំណេញផលសេដ្ឋកិច្ចពីភ្ញៀវទេសចរចិន ខណៈរដ្ឋាភិបាលចិនបានប្រកាសបើកទ្វារប្រទេសឡើងវិញ។ តែយ៉ាងណាសមាគមទេសចរណ៍កម្ពុជាវាយតម្លៃថាស្ថានភាពភ្ញៀវទេសចរចិននៅមិនទាន់អាចធ្វើដំណើរមកកម្ពុជាច្រើនទេ ពីព្រោះជើងហោះហើរដែលតភ្ជាប់ពីចិនមកកម្ពុជានៅមានចំនួនតិច ហើយថ្លៃសំបុត្រយន្តហោះក៏ផ្តើមឡើងថ្លៃវិញ។ ហើយទន្ទឹមនឹងការផ្ទុះខ្លាំងនូវករណីកូវីដ១៩ក្នុងប្រទេសចិន លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានអះអាងថា កម្ពុជាមិនប៉ះពាល់ខ្លាំងនោះទេ ដោយសារតែប្រព័ន្ធភាពសុំាក្នុងសហគមន៍របស់ពលរដ្ឋខ្មែររឹងមាំ។
ចុះផ្សាយនៅថ្ងៃ៖
ស្តាប់ - ០២:៣៧
នៅមិនទាន់អាចវាយតម្លៃបានជារួមនៅឡើយចំពោះកំណើនភ្ញៀវទេសចរចិនចូលមកកម្ពុជា ក្រោយរដ្ឋាភិបាលចិនបានប្រកាសបើកប្រទេសឡើងវិញកាលពីថ្ងៃចន្ទ ទី០៩ ខែមករា។ ប៉ុន្តែលោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាថា កម្ពុជានឹងចំណេញផលសេដ្ឋកិច្ចតាមរយៈវិស័យទេសចរណ៍បរទេស បើទោះបីត្រូវចំណាយពេលរងចាំការវិលមកវិញរបស់ភ្ញៀវទេសចរចិន។
ប្រធានសមាគមន៍ទេសចរណ៍កម្ពុជារូបនេះ ក៏បង្ហាញការព្រួយបារម្ភបនិ្តច ចំពោះករណីផ្ទុះឡើងវិញនូវមេរោគកូវីដ១៩ក្នុងប្រទេសចិន។ ប៉ុន្តែលោកស្រីមិនចាត់ទុកថា ការកើនឡើងនៃមេរោគកូវីដ១៩ក្នុងប្រទេសចិននេះ អាចជះឥទ្ធិពលអវិជ្ជមាន ឬបង្កជាប៉ះពាល់ដល់ការងើបឡើងវិញនៃវិស័យទេសចរណ៍កម្ពុជាដែលរំពឹងពីលំហូរភ្ញៀវទេសចរចិននោះទេ។ មិនព្រួយបារម្ភខ្លាំងពេក បើតាមលោកស្រី ឆាយ ស៊ីវលីន ប្រសិនបើមានការព្រួយបារម្ភខ្លាំង កម្ពុជាអាចអនុវត្តនូវវិធានស្តង់ដារអនាម័យSOPរបស់ក្រសួងទេសចរណ៍បន្តទៀត ខណៈភាពសុំាក្នុងសហគមន៍វិញក៏មានភាពរឹងមាំដដែល ដែលកត្តាទាំងនេះ លោកស្រីចាត់ទុកថា កម្ពុជាមិនងាយរងគ្រោះពីការផ្ទុះឡើងវិញនៃមេរោគកូវីដ១៩តាមរយៈភ្ញៀវទេសចរចិនចូលមកកម្ពុជានោះទេ។
ទាក់ទិននឹងរឿងនេះដែរ កាលពីថ្ងៃទី២ ខែមករា លោកនាយករដ្ឋមន្ត្រី ហ៊ុន សែនបានថ្លែងក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គខេត្តក្រចេះនិងផ្លូវភ្ជាប់ក្រោមជំនួយសម្បទានពីរដ្ឋាភិបាលចិនថា កម្ពុជាមិនតឹងតែងដាក់ប្រជាជនចិន ឬ ទេសចរចិនដូចបណ្តាប្រទេសមួយចំនួនដែលព្រួយបារម្ភពីករណីឆ្លងកូវីដ១៩ឡើយ ដោយថា កម្ពុជានឹងចំណេញសម្រាប់ការមកដល់របស់ទេសចរចិន។
លោកនាយករដ្ឋមន្ត្រីបន្តថា មុនកូវីដ១៩ កម្ពុជាទទួលបានទេសចរចិនជាង២លានក្នុងមួយឆ្នាំហើយឆ្នាំ២០២៣នេះ លោកនឹងរំពឹងថា អាចទទួលបានទេសចរចិនប្រមាណ២លាននាក់ថែមទៀត ដែលនឹងធ្វើឲ្យកំណើនសេដ្ឋកិច្ចកម្ពុជាផ្ដើមងើបឡើងវិញ។ លោកនាយករដ្ឋមន្ត្រីមិនបានមានប្រសាសន៍ពីការខ្លាចរអ៊ាការនាំចូលមេរោគកូវីដ១៩តាមរយៈទេសចរចិននោះទេ ប៉ុន្តែលោកអំពាវនាវឱ្យពលរដ្ឋខ្មែរបន្តទៅចាក់វ៉ាក់សាំងដូសជំរុញ ៦ខែម្តង ដើម្បីបង្កើនភាពស៊ាំក្នុងសហគមន៍។
សូមជម្រាបថា ករណីកូវីដ១៩ក្នុងប្រទេសចិនបានបន្តហក់ឡើងជាលំដាប់ បើតាមរបាយការណ៍វាយតម្លៃពីអង្គការAirfinity ករណីឆ្លងក្នុងប្រទេសចិនអាចមានចន្លោះពី២លាន៩សែនករណី ដល់៣លាន៧សែនករណីក្នុងមួយថ្ងៃ និងករណីស្លាប់អាចកើនឡើងជិត២ម៉ឺនករណីក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ