ក្រសួងទេសចរណ៍៖ កម្ពុជានឹងអាចទទួលទេសចរអន្តរជាតិបានយ៉ាងតិច ៤លាននាក់ក្នុងឆ្នាំ២០២៣
រដ្ឋមន្ត្រីក្រសួងទេសចរណ៍កាលពីថ្ងៃទី១១ ខែមករាឆ្នាំ២០២៣ បានរំពឹងថា កម្ពុជានឹងអាចទទួលភ្ញៀវទេសចរអន្តរជាតិបានយ៉ាងតិច ៤លាននាក់ ទន្ទឹមនឹងការដាក់ចេញផែនការសកម្មភាព ៥ចំណុច ដើម្បីបន្តទាក់ទាញទេសចរអន្តរជាតិ និងគាំទ្រយុទ្ធនាការ «ឆ្នាំទស្សនាកម្ពុជា ២០២៣» ក្រោមទិសស្លោក «រាល់ថ្ងៃ គឺជាអច្ឆរិយ:។ ការលើកឡើងដូច្នេះធ្វើឡើងនៅក្នុងកិច្ចប្រជុំលើកទី៣ នៃក្រុមការងាររាជរដ្ឋាភិបាល និងឯកជនដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០២:១៦
ថ្លែងនៅចំពោះមុខអ្នកសារព័ត៌មាន ក្រោយកិច្ចប្រជុំ លោក ថោង ខុន រដ្ឋមន្ត្រីក្រសួងទេសចរណ៍បានរំពឹងថា នៅក្នុងឆ្នាំ២០២៣ កម្ពុជានឹងទទួលបានភ្ញៀវទេសចរអន្តរជាតិ យ៉ាងហោច៤លាននាក់ ដោយក្នុងនោះទេសចរចិន មានប្រមាណ១លាននាក់។ ទន្ទឹមនឹងនេះ លោកក៏រំពឹងផងដែរថា កម្ពុជានឹងទទួលបានទេសចរផ្ទៃក្នុងបានក្នុងរង្វង់១៥លាននាក់។
កម្ពុជារំពឹងដូច្នេះ គឺដោយយោងទៅលើការរៀបចំយុទ្ធនាការ «ឆ្នាំទស្សនាកម្ពុជា ២០២៣» ការរៀបចំព្រឹត្តិការណ៍ប្រកួតកីឡាស៊ីហ្គេម-អាស៊ានប៉ារ៉ាហ្គេម ព្រមទាំងការប្រកាសបើកព្រំដែនរបស់ចិនឡើងវិញ នាពេលថ្មីៗនេះ។
នៅក្នុងកិច្ចប្រជុំលើកទី៣ នៃក្រុមការងាររាជរដ្ឋាភិបាល និងឯកជនដើម្បីស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩នេះ ក្រសួងទេសចរណ៍បានសម្រេចដាក់ចេញនូវផែនការសកម្មភាពចំនួន ៥ចំណុច។ ដោយក្នុងនោះរួមមាន ការរៀបចំសេចក្តីព្រាងវិធានការអនុវត្តយុទ្ធនាការ «ឆ្នាំទស្សនាកម្ពុជា ២០២៣» ដើម្បីបង្កើនការផ្សព្វផ្សាយទេសចរណ៍កម្ពុជា ការលើកកម្ពស់កិត្តិនាមទេសចរណ៍ ការផ្សារភ្ជាប់រវាងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ជាមួយនិងយុទ្ធនាការ «ឆ្នាំទស្សនាកម្ពុជា ២០២៣» និងការបង្កើតព្រឹត្តិការណ៍ទេសចរណ៍ «មួយខែ យ៉ាងតិចមួយព្រឹត្តិការណ៍» ដើម្បីបង្កើនភ្ញៀវទេសចរណ៍ជាតិ និងអន្តរជាតិ។
គួររំលឹកថា រដ្ឋាភិបាលកម្ពុជាបានប្រកាសស្វាគមន៍ទេចរណ៍ចិន ហើយនៅថ្ងៃទី៨ មករា ចិនក៏បានបើកចំហរប្រទេសឡើងវិញ ដោយបានដកចេញនូវគោលនយោបាយគ្មានកូវីដ ឬហៅថា Zero-Covid។
ជាមួយគ្នានេះ កាលពីពេលថ្មីៗ បើតាមអាកាសចរណ៍ស៊ីវិលកម្ពុជា ក្រុមហ៊ុនទេសចរណ៍ចិនមួយចំនួនបានបង្ហាញនិន្នាការតភ្ជាប់ជើងហោះហើរជាមួយកម្ពុជាឡើងវិញ បន្ទាប់ពីក្រុមហ៊ុនអាកាសចរណ៍ធំៗចំនួន៧បានត្រឡប់មកធ្វើប្រតិបត្តិការហោះហើរមកកាន់កម្ពុជាឡើងវិញ។ កម្ពុជាក៏បានគម្រោងសម្រេចឱ្យបាននូវការតភ្ជាប់ជើងហោះហើរត្រង់ជាមួយប្រទេសតួកគី ក្នុងឆ្នាំ២០២៣នេះ ដើម្បីជំរុញកំណើនភ្ញៀវទេសចររវាងប្រទេសទាំងពីរ ក៏ដូចជាដើម្បីលើកកម្ពស់ការធ្វើពាណិជ្ជកម្ម ការវិនិយោគផងដែរ។
គួរជម្រាបជូនថា នៅក្នុងឆ្នាំ២០២២ កម្ពុជាទទួលបានភ្ញៀវទេសចរណ៍អន្តរជាតិប្រមាណ ២លាន២សែននាក់ ខណៈនៅឆ្នាំ២០២១ កម្ពុជាទទួលបានភ្ញៀវទេសចរណ៍អន្តរជាតិប្រមាណ២០ម៉ឺនាក់។ នេះបើតាមរបាយការណ៍របស់ក្រសួងទេសចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ