កម្ពុជា-អង់គ្លេស សម្លឹងរកការចរចាពាណិជ្ជកម្មឲ្យចប់បានរហ័ស ដើម្បីជំរុញពាណិជ្ជកម្មប្រទេសទាំងពីរ
កម្ពុជា-អង់គ្លេស កំពុងសម្លឹងរកការចរចាសេចក្តីព្រាងអនុស្សារណៈនៃការយោគយល់ស្តីពីពាណិជ្ជកម្មរវាងប្រទេសទាំងពីរ ឲ្យបានចប់ក្នុងពេលឆាប់ៗនេះ។ ក្តីរំពឹងនេះធ្វើឡើងនៅក្នុងជំនួបរវាង ប្រមុខការទូតកម្ពុជា លោក ប្រាក់ សុខុន និងលោក Dominic Williams ឯកអគ្គរាជទូតអង់គ្លេស កាលពីថ្ងៃទី១២មករាម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥៥
នៅចំពោះមុខនៃកំណើនទំហំពាណិជ្ជកម្មរវាងកម្ពុជា-អង់គ្លេស ភាគីទាំងពីរបានដាក់ក្តីសង្ឃឹមខ្ពស់ថា ការចរចាពាណិជ្ជកម្មរវាងគ្នា នឹងអាចបញ្ចប់ក្នុងពេលឆាប់ខាងមុខនេះ ដើម្បីជំរុញការធ្វើពាណិជ្ជកម្មរវាងប្រទេសទាំងពីរជាបន្តទៀត។
បើតាមទំព័រហ្វេសប៊ុករបស់ស្ថានទូតអង់គ្លេសប្រចាំកម្ពុជា គឺលោក Dominic Williams បានដាក់ចេញនូវមហិច្ឆតារបស់លោកចំពោះភាពជាដៃគូរបស់អង់គ្លេសជាមួយកម្ពុជា។ ក្នុងនោះមានជាអាទិ៍ វិស័យពាណិជ្ជកម្ម និងការវិនិយោគ ដែលជាប្រយោជន៏សេដ្ឋកិច្ចនៃប្រទេសទាំងពីរ និងកិច្ចសហប្រតិបត្តិការលើបញ្ហាប្រឈមរួមគ្នា ដូចជាការប្រែប្រួលអាកាសធាតុ និងការគាំទ្រដល់ការអភិវឌ្ឍន៍លទ្ធិប្រជាធិបតេយ្យនៅកម្ពុជា។
បើតាមរបាយការណ៍ក្រសួងពាណិជ្ជកម្ម គឺទំហំពាណិជ្ជកម្មសរុបរវាងកម្ពុជា-ចក្រភពអង់គ្លេស ក្នុងរយៈពេល១១ខែនៃឆ្នាំ២០២២កន្លងទៅនេះ មានប្រមាណ ៨៣៧.៦៦ លានដុល្លារអាមេរិក ដែលមានកំណើនប្រមាណជិត ៧% បើធៀបទៅនឹងរយៈពេលដូចគ្នាក្នុងឆ្នាំ២០២១។ ទំនិញកម្ពុជា នាំចេញទៅអង់គ្លេស រួមមាន សម្លៀកបំពាក់ ស្បែកជើង កាបូប កង់ ផលិតផលកសិកម្ម ខណៈផលិតផលអង់គ្លេសនាំមកកម្ពុជា មានដូចជា រថយន្ត គ្រឿងម៉ាស៊ីន គ្រឿងអគ្គិសនី គ្រឿងអេឡិចត្រូនិកជាដើម។
នៅចំពោះមុខនៃទំនាក់ទំនងរវាងប្រទេសទាំងពីរ លើវិស័យពាណិជ្ជកម្មពេលនេះ ទាំងកម្ពុជា ទាំងអង់គ្លេស បានអះអាងថា នឹងត្រូវពង្រឹងបន្ថែមទៀតលើកិច្ចសហប្រតិបត្តិរវាងគ្នា លើគ្រប់វិស័យ។
ជាការកត់សម្គាល់ ការប្តេជ្ញានេះធ្វើឡើងនាខណៈដែល កម្ពុជា-អង់គ្លេស នឹងត្រៀមរៀបចំខួបលើកទី៧០ នៃការបង្កើតទំនាក់ទំនងការទូតរវាងគ្នាទៅវិញទៅមក។
ក្រៅតែពីវិស័យពាណិជ្ជកម្ម កម្ពុជានិងអង់គ្លេស បានកត់សម្គាល់អំពីការរៀបចំកិច្ចសន្ទនាស្តីពីសិទ្ធិមនុស្សកម្ពុជា-អង់គ្លេស ដោយទទួលបានជោគជ័យកន្លងមក។ សម្រាប់ភាគីកម្ពូជា គឺលោក ប្រាក់ សុខុន ដែលជាប្រមុខការទូត ប្រាថ្នាចង់ឃើញការបង្កើនកម្រិតសន្ទនានេះ ឲ្យទៅជាការពិគ្រោះយោបល់នយោបាយ ហើយក៏ជាឱកាសឲ្យប្រទេសទាំងពីរ អបអរនូវខួបការទូត៧០ឆ្នាំនៅក្នុងឆ្នាំនេះផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ