កម្ពុជាអនុម័តសេចក្ដីព្រាង គោលនយោបាយជាតិ ស្តីពីស្វាយចន្ទី ដើម្បីជំរុញកំណើនកសិពាណិជ្ជកម្ម
រដ្ឋាភិបាលកម្ពុជា បានអនុម័តសេចក្ដីព្រាង «គោលនយោបាយជាតិ ស្តីពីស្វាយចន្ទីឆ្នាំ២០២២-២០២៧» ក្នុងគោលបំណងជំរុញកំណើនកសិពាណិជ្ជកម្ម ដោយអភិវឌ្ឍន៍ផលិតកម្ម កែច្នៃ និងទីផ្សារស្វាយចន្ទីឱ្យមានលក្ខណៈប្រកួតប្រជែង។ ការសម្រេចនេះធ្វើឡើងនៅក្នុងសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី១៣ មករា។ ជាមួយគ្នានេះ សមាគមន៍ស្វាយចន្ទីយល់ថា គោលនយោបាយនេះនឹងជួយទាក់ទាញអ្នកវិនិយោគពីក្រៅប្រទេសបន្ថែម។
ចុះផ្សាយនៅថ្ងៃ៖
ស្តាប់ - ០២:០១
សេចក្ដីព្រាង «គោលនយោបាយជាតិ ស្តីពីស្វាយចន្ទីឆ្នាំ២០២២-២០២៧» ដែលមាន ៧ ផ្នែក និងឧបសម្ព័ន្ធចំនួន ២ មានគោលដៅចម្បងចំនួន ៣ រួមមាន បង្កើនទិន្នផលនៃការផលិតស្វាយចន្ទីដែលមានគុណភាព ជំរុញការធ្វើឧស្សាហូបនីយកម្មដោយប្រមូលនិងកែច្នៃស្វាយចន្ទីឱ្យសម្រេចបាន២៥ភាគរយ នៅឆ្នាំ២០២៧ និងយ៉ាងតិច៥០ភាគរយ នៅឆ្នាំ២០៣២ និងជំរុញការនាំចេញ តាមរយៈការធ្វើពិពិធកម្មទីផ្សារ ឬការពង្រីកទីផ្សារ ការផ្សារភ្ជាប់អន្តរវិស័យក្នុងការនាំចេញ កិច្ចសម្រួលពាណិជ្ជកម្ម ការកាត់បន្ថយថ្លៃដើម ជាដើម។ នេះបើតាមលោក ផៃ ស៊ីផាន ប្រធានក្រុមអ្នកនាំពាក្យរដ្ឋាភិបាលកម្ពុជា។
ចំណែកឯផែនការសកម្មភាពត្រូវអនុវត្តមានដូចជា ការបង្កើតយន្តការ ការបង្កើតក្របខ័ណ្ឌគតិយុត្ត ការគាំទ្រហិរញ្ញវត្ថុ ការអភិវឌ្ឍធនធានមនុស្ស ការអភិវឌ្ឍហេដ្ឋារចនាសម្ព័ន្ធ និងដំណើរការអនុវត្តគម្រោង។
ជាមួយគ្នានេះ លោក ស៊ីឡុត ប្រធានសមាគមស្វាយចន្ទីកម្ពុជា យល់ឃើញថាការអនុម័តសេចក្ដីព្រាង គោលនយោបាយជាតិ ស្តីពីស្វាយចន្ទី នឹងជួយទាក់ទាញអ្នកវិនិយោគបរទេសមកវិនិយោគលើការកែច្នៃស្វាយចន្ទីបន្ថែម និងជួយសហគ្រាសកែច្នៃស្វាយចន្ទីក្នុងស្រុកដែលមានស្រាប់ផងដែរ។ លោកបន្តថា គោលនយោបាយនេះក៏នឹងជួយផ្ដល់ចំណូលដល់កសិករនៅជនបទ និងផ្ដល់បច្ចេកទេសដាំដំណាំស្វាយចន្ទីដល់ពួកគេ ដោយដីនៅតាមជនបទមិនអាចដាំដំណាំផ្សេងបាន។ លោកថា គោលនយោបាយជាតិ ស្តីពីស្វាយចន្ទីនឹងអាចផ្ដល់តម្លៃបន្ថែមថល់កសិករ និងអាចជួយកាត់បន្ថយពលករចំណាកស្រុកផងដែរ។
គួរជម្រាបជូនថា ដំណាំស្វាយចន្ទី គឺជាដំណាំកសិឧស្សាហកម្មដែលមានអាទិភាពមួយក្នុងចំណោមដំណាំអាទិភាពទាំង១២មុខ។ ចំពោះការនាំចេញវិញ ក្នុងឆ្នាំ២០២២ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារអន្តជាតិ ៦៧ម៉ឺនតោន ក្នុងទំហំទឹកប្រាក់ ១ពាន់៧៧លានដុល្លារអាមេរិក ខណៈឆ្នាំ២០២១ កម្ពុជានាំចេញបាន ១,១លានតោន ពោលគឺមានការថយចុះ ៣៤,៦៥%។ ដោយឡែកការនាំចេញទៅប្រទេសវៀតណាមមានចំនួន៦៦ ម៉ឺនតោន ថយចុះ ៣៧%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ