ក្រុមជនជាតិដើមភាគតិចប្រជុំគ្នាត្អូញត្អែរពីផលប៉ះពាល់នៃការផ្តល់ដីសម្បទានសេដ្ឋកិច្ច
ការផ្តល់ដីសម្បាទានសេដ្ឋកិច្ចកន្លងមករបស់រដ្ឋាភិបាល នៅតែត្រូវបានក្រុមជនជាតិដើមភាគតិចរំឭកពីផលប៉ះពាល់ ដោយសារតែដីព្រៃចម្កាវិលជុំរបស់ពួកគេត្រូវបានបាត់បង់ ហើយផ្ទះសម្បែងមួយចំនួនត្រូវរងការលិចលង់ដោយសារតែទំនប់វារីអគ្គិសនី។ ផលវិបាកទាំងនេះនៅតែបន្តកើតមានដល់ក្រុមជនជាតិដើមភាគតិច ដែលមកប្រជុំគ្នាលើកឡើងពីបញ្ហានេះប្រាប់តំណាងរាស្ត្រនិងអាជ្ញាធរពាក់ព័ន្ធ ក្នុងសន្និសិទមួយដែលធ្វើឡើងនៅថ្ងៃពុធនេះក្នុងទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០១:៥០
នៅសហគមន៍ភូមិក្បាលរមាស នៃខេត្តស្ទឹងត្រែង ក្រុមជនជាតិដើមភាគតិចបានសំដែងការឈឺចាប់ នៅគ្រាដែលដី៥ពាន់ហិកតាត្រូវបានឈូសឆាយដោយក្រុមហ៊ុនចំការកៅស៊ូ ដោយពុំបានសិក្សាល្អិនល្អិន និងពិគ្រោះជាមួយអ្នកភូមិ។ នេះបើតាមសេចក្តីថ្លែងការណ៍របស់ក្រុមជនជាតិដើមភាគតិចនៅថ្ងៃទី២៥មករា២០២៣។
ក្នុងខេត្តស្ទឹងត្រែងដដែល ការសង់ទំនប់វារីអគ្គិសនីសេសានក្រោម២ នៅចំណុចប្រសព្វនៃទន្លេសេសាន និងទន្លេស្រែពក ក៏ជាផលប៉ះពាល់ដល់សហគមន៍ជនជាតិដើមភាគតិចផងដែរ។ គម្រោងនេះបានជម្លៀសប្រជាជនដែលកំពុងរស់នៅតាមដងទន្លេឲ្យទៅតាំងទីលំនៅថ្មីប្រមាណ១០គីឡូម៉ែត្រពីទីតាំងដើម។ អ្នកភូមិខ្លះបានទទួលសំណងដីផ្ទះ និងដីស្រែ៥ហិកតារួមទាំងថវិកាខ្លះ ខណៈអ្នក៥២គ្រួសារទៀតមិនទទួលសំណង និងចាកចេញពីភូមិកំណើត រហូតដល់ទឹកលិចផ្ទះអស់។ នេះបើតាមសេចក្តីថ្លែងការណ៍ដដែល។
សេចក្តីថ្លែងការណ៍នេះបន្ថែមថា សេវាសុខភាពមិនមានសម្រាប់ស្ត្រី និងកុមារ នៅគ្រាដែលផ្លូវធ្វើដំណើររិតតែលំបាក ហើយគ្រូបង្រៀនដែលមិនព្រមចាកចេញត្រូវបានបញ្ឈប់ការងារ ហើយថាសហគមន៍ជនជាតិដើមភាគតិចដែលមិនព្រមចាកចេញត្រូវបានគេរើសអើង រហូតមានការបិទមិនឲ្យចេញចូលទៅក្នុងសហគមន៍ទៀតផង។
ក្រៅពីករណីជាក់ស្តែងដែលកើតកើតឡើងសហគមន៍ក្បាលរមាស បើតាមក្រុមជនជាតិដើម គឺបញ្ហាដូចគ្នាក៏កើតមានដែរនៅសហគមន៍ជនដើមភាគតិចព្នងខេត្តមណ្ឌលគិរី២ករណី សហគមន៍ជនដើមភាគកួយនៅខេត្តកំពង់ធំ ក្រចេះ និងខេត្តព្រះវិហារ។ នៅចំពោះមុខបញ្ហាប្រឈមទាំងនេះ ក្រុមជនជាតិដើមភាគតិច អំពាវនាវឲ្យតំណាងរាស្ត្រ និងអាជ្ញាធរពាក់ព័ន្ធជួយដោះស្រាយបញ្ហានេះ ខណៈការបោះឆ្នោតកាន់ខិតជិតមកដល់។ បើតាមការធ្វើជំរឿនឆ្នាំ២០១៣ នៅកម្ពុជាមានក្រុមជនជាតិដើមភាគតិចជាង១៨ម៉ឺននាក់ស្មើនឹង២២អំបូរ រស់នៅ២០ខេត្ត-ក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ