លោកស្រីអ៊ុក ឆាយ៉ាវី៖ ការព្រមានឱ្យផ្តល់របាយការណ៍ប្រចាំឆ្នាំរបស់សមាគមពីក្រសួងមហាផ្ទៃ ជាការគំរាមបំបិទសិទ្ធិ
សមាគមគ្រូបង្រៀនកម្ពុជាឯករាជ្យគូសបញ្ជាក់នៅថ្ងៃទី២៧ ខែមករានេះថា ខ្លួនកំពុងរងការគំរាមកំហែង និងបំបិទសិទ្ធិសេរីភាពពីក្រសួងមហាផ្ទៃ បន្ទាប់ពីទទួលបានលិខិតព្រមានឱ្យសមាគមផ្តល់ព័ត៌មានពាក់ព័ន្ធនឹងហិរញ្ញវត្ថុ និងសកម្មភាពការងារនៅឆ្នាំ២០២២ ជាដាច់ខាត មុនដំណាច់ខែកុម្ភៈ។ ប្រធានសមាគមនគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី អះអាងថាសមាគមបានត្រៀមនូវរបាយការណ៍ខាងលើនេះ ក៏ប៉ុន្តែត្រូវការពេលពិនិត្យជាក់ច្បាស់ជាមុនសិន។
ចុះផ្សាយនៅថ្ងៃ៖
ស្តាប់ - ០២:៤៤
ក្រសួងមហាផ្ទៃ កាលពីថ្ងៃទី២៦ ខែមករា ឆ្នាំ២០២៣ បានចេញលិខិតព្រមានឱ្យសមាគមគ្រូបង្រៀនកម្ពុជាឯករាជ្យផ្ដល់ព័ត៌មានជាលាយលក្ខណ៍អក្សរ រាល់គណនីធនាគារដែលបើកសម្រាប់ប្រតិបត្តិការខ្លួន ព្រមទាំងរបាយការណ៍បូកសរុបការងារ និងរបាយការណ៍ហិរញ្ញវត្ថុប្រចាំឆ្នាំ២០២២ ជាដាច់ខាតមុនដំណាច់ខែកុម្ភៈខាងមុខ។
តាមក្រសួងមហាផ្ទៃ ប្រសិនបើសមាគមគ្រូបង្រៀនកម្ពុជាឯករាជ្យមិនអនុវត្តតាម នោះក្រសួងនឹងចាត់ការតាមផ្លូវច្បាប់ជាធរមាន ដោយលើកហេតុផលថា សមាគមមួយនេះ កន្លងទៅថ្មីៗ បានធ្វើបាតុកម្មខុសច្បាប់ លើទ្រូងផ្លូវសាធារណៈ នៅខណ្ឌឬស្សីកែវ រាជធានីភ្នំពេញដែលបានប៉ះពាល់ដល់សណ្ដាប់ធ្នាប់សាធារណៈ។ ក្រៅពីនេះ ការដង្ហែក្បួនដោយថ្មើរជើង ទៅដាក់ញត្តិ នៅសាលាដំបូងរាជធានីភ្នំពេញនិងខុទ្ទកាល័យលោកនាយករដ្ឋមន្រ្តី បានបំពានស្មារតីកិច្ចប្រជុំជាមួយសាលាក្រុងភ្នំពេញ។ កិច្ចប្រជុំជាមួយសាលាក្រុងភ្នំពេញ ដែលបានបដិសេធកម្មវត្ថុនៃការសម្ដែងមតិ និងតម្រូវឲ្យសមាគមកែសម្រួលកម្មវត្ថុរបស់ខ្លួន។
ផ្ទុយទៅវិញ លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ តាមរយៈវិទ្យុបារាំងអន្តរជាតិនៅថ្ងៃទី២៧ ខែមករា ឆ្នាំ២០២៣ បានទាត់ចោលចំពោះការលើកឡើងខាងលើរបស់ក្រសួងប្រហាផ្ទៃ ព្រោះថាសមាគមបានដាក់លិខិតឱ្យតំណឹងទុកមុនរួចហើយ។ លោកស្រី អ៊ុក ឆាយ៉ាវី យល់ថា វាគ្រាន់ជាលេស ដើម្បីដាក់បន្ទុក គម្រាមកំហែង និងបំបិទសិទ្ធិសេរីភាពរបស់សមាគមដែលមាននិន្នាការមិនស្របតាមរដ្ឋាភិបាលតែប៉ុណ្ណោះ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ អះអាងថា សមាគមតែងផ្ញើរបាយការណ៍ ជាការអនុវត្តទៅតាមច្បាប់ ស្តីពីសមាគម និងអង្គការមិនមែនរដ្ឋាភិបាលរបស់កម្ពុជា ក៏ប៉ុន្តែចាប់តាំងពីមានវិបត្តិកូវីដ សមាគមគ្មានជំនួយឧបត្ថម្ភទ្រទ្រង់ ដោយបុគ្គលិករបស់សមាគមធ្វើការងារដោយស្ម័គ្រចិត្តប៉ុណ្ណោះ ជាហេតុធ្វើឱ្យសមាគមមិនទាន់បានដាក់របាយការណ៍ដូចអ្វីដែលក្រសួងលើកឡើង។
ការចេញមកព្រមានរបស់ក្រសួងមហាផ្ទៃនេះ នៅក្រោយពីក្រសួងដដែលនេះបានប្រកាសឱ្យសមាគមគ្រូបង្រៀនកម្ពុជាឯករាជ្យ ដង្ហែធម្មយាត្រាដើម្បីលើកកម្ពស់សីលធម៌សង្គមទៅតាមបណ្តាខេត្តមួយចំនួន ដែលចាប់ផ្តើមពីរាជធានីភ្នំពេញ នៅថ្ងៃទី១ ខែកុម្ភៈ ខាងមុខនេះ៕
សូមរំព្ញកដែរថា សមាគមគ្រូបង្រៀនកម្ពុជាឯករាជ្យ កាលពីថ្ងៃទី១៦ ខែធ្នូ ឆ្នាំ២០២២ បានជូនដំណឹងទៅសាលាក្រុងភ្នំពេញ ដើម្បីប្រមូលផ្ដុំសម្ដែងមតិ នៅទីលានប្រជាធិបតេយ្យ ទាមទារឲ្យមានការដោះលែងសកម្មជនយោបាយ សកម្មជនសង្គមស៊ីវិល និងសហជីព។ យ៉ាងណាក្ដី ការសម្ដែងមតិនេះ ត្រូវបានបដិសេធ ដោយថាកម្មវត្ថុនៃការសម្ដែងមតិនេះ មិនស្របទៅនឹងច្បាប់នៃក្រមព្រហ្មទណ្ឌកម្ពុជា។ ហើយសមាគមគ្រូបង្រៀនកម្ពុជាឯករាជ្យ ក៏បានឯកភាពកែសម្រួលកម្មវត្ថុនៃការសម្ដែងមតិ។ ប៉ុន្តែ ក្រោយមក សមាគមនេះ បន្តដឹកនាំការសម្ដែងមតិនេះ នៅថ្ងៃទី៣០ខែធ្នូ ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ