ពាណិជ្ជកម្មកម្ពុជាថៃកើនឡើងដល់ ៤.៦ពាន់លានដុល្លារ ឆ្នាំ២០២២
ទំហំពាណិជ្ជកម្មទ្វេភាគីកម្ពុជាថៃនៅតែរក្សាកំណើននាឆ្នាំ២០២២កន្លងទៅ ដែលមានទំហំសរុបជិតដល់ ៤.៦ពាន់លានដុល្លារអាមេរិក កើនឡើងជិត ១៤.២៣ភាគរយ។ នេះបើតាមរបាយការណ៍របស់ក្រសួងពាណិជ្ជកម្មកម្ពុជា។ ភាគីកម្ពុជាថៃក៏បានប្រកាសពន្លឿនការបើកច្រកព្រំដែនស្ទឹងបត់ ដើម្បីជំរុញពាណិជ្ជកម្មបន្ថែមទៀតរវាងប្រទេសទាំងពីរ។
ចុះផ្សាយនៅថ្ងៃ៖
ស្តាប់ - ០២:៥៨
សម្រាប់រយៈពេល១២ខែ ពីខែមករា ដល់ខែធ្នូ ឆ្នាំ២០២២កន្លងទៅ ការដោះដូរពាណិជ្ជកម្មរវាងកម្ពុជា និងថៃមានទំហំប្រមាណ ៤,៦៦៤លានដុល្លារអាមេរិក ដែលមានកំណើនប្រមាណ ១៤.២៣ភាគរយធៀបនឹងរយៈពេលដូចគ្នាកាលពីឆ្នាំ២០២១។ នេះបើតាមទិន្នន័យរបស់ក្រសួងពាណិជ្ជកម្មកម្ពុជា ដែលវិទ្យុបារាំងអន្តរជាតិទទួលបាន។
ទិន្នន័យដដែលនេះបញ្ជាក់ថាប្រទេសថៃបាននាំទំនិញមកទីផ្សារកម្ពុជាក្នុងទំហំជាទឹកប្រាក់ប្រមាណ ៣,៨៣២លានដុល្លារកើនឡើង ១០.៦៧ភាគរយ ខណៈដែលថៃនាំទំនិញពីកម្ពុជាទៅវិញ មានទំហំប្រមាណ ៨៣១លានដុល្លារ កើនឡើង ៣៤.១១ភាគរយធៀបនឹងឆ្នាំ២០២១។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់វិទ្យុបារាំងអន្តរជាតិ នៅថ្ងៃទី២៩ ខែមករាថាទំហំពាណិជ្ជកម្មរវាងប្រទេសទាំងពីរកាន់តែធំ គឺកាន់តែបង្ហាញពីភាពរឹងមាំ និងការជំរុញពាណិជ្ជកម្មសមាហរណកម្មសេដ្ឋកិច្ចក្នុងប្រទេសអាស៊ាន។ លោក លឹម ហេង ជឿថាពាណិជ្ជកម្មរវាងប្រទេសទាំងពីរនៅតែរក្សាកំណើនល្អនាពេលខាងមុខ ព្រោះជាសមាជិកនៃសហគមន៍សេដ្ឋកិច្ចអាស៊ានតែមួយ ហើយជាប្រទេសជាប់ព្រំដែនគ្នា ដែលពឹងផ្អែកគ្នាទៅវិញទៅមក។
លោកបន្តថាផលិតផលកសិកម្មរបស់កម្ពុជា និងវត្ថុធាតុដើម ដែលត្រូវនាំចេញទៅថៃ ខណៈកម្ពុជាកែច្នៃមិនទាន់ គឺទាមទារជាចាំបាច់នូវទីផ្សាររបស់ប្រទេសជិតខាងទាំងថៃ និងវៀតណាម ហើយកម្ពុជាក៏ចងឃើញប្រទេសទាំងនេះមកវិនិយោគក្នុងឧស្សាហកម្មកែច្នៃផលិតផលកសិកម្ម និងហេដ្ឋរចនាសម្ព័ន្ធផ្សេងៗ។
ក្នុងជំនួបរវាងលោកនាយករដ្ឋមន្ត្រី ហ៊ុន សែន ជាមួយឯកអគ្គរាជទូតថ្មីនៃប្រទេសថៃ ប្រចាំនៅកម្ពុជា កាលពីថ្ងៃទី២០ ខែមករា ភាគីទាំងពីរបានឯកភាពគ្នាក្នុងការជំរុញឲ្យគណៈកម្មការព្រំដែនរួម ដើម្បីរៀបចំពិនិត្យបង្គោលព្រំដែន និងបោះបង្គោលព្រំដែនឡើងវិញ ព្រមទាំងការដោះមីនចេញពីព្រំដែន ដើម្បីសុវត្ថិភាពរបស់ប្រជាជនទាំងសងខាង ក្នុងការចេញចូលរកស៊ី។ កម្ពុជា និងថៃក៏ចាត់ទុកការបើកច្រកព្រំដែនស្ទឹងបត់ គឺត្រូវធ្វើឱ្យលឿន ហើយច្រកផ្សេងៗទៀត ក៏ត្រូវជំរុញបើកដោយពុំរង់ចាំកាលកំណត់នោះទេ។
សូមជម្រាបជូនថា កម្ពុជា និងថៃគ្រោងសម្រេចឲ្យបានទំហំពាណិជ្ជកម្ម ១៥ពាន់លានដុល្លារនាឆ្នាំ២០២៥ ខណៈថៃប្រាប់កម្ពុជាថាប្រទេសទាំងពីរត្រូវការកិច្ចសហការបន្ថែមទៀត។ នេះបើតាមការលើកឡើងរបស់នាយករដ្ឋមន្ត្រីថៃ ក្នុងជំនួបជាមួយឯកអគ្គរាជទូតកម្ពុជា កាលពីថ្ងៃទី២៨ ខែធ្នូ ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ