លោក ហូ វណ្ណឌី៖ ភ្ញៀវទេសចរចិនធ្វើដំណើរចូលមកកម្ពុជាជាបន្តបន្ទាប់ តែមិនក្នុងទំហំច្រើន
សមាគមទេសចរណ៍កម្ពុជាអះអាងថា ជាង១ខែក្រោយរដ្ឋាភិបាលចិនបានដកចេញនូវវិធានការកូវីដ១៩ សន្ទុះនៃភ្ញៀវទេសចរចិនធ្វើដំណើរចូលមកប្រទេសកម្ពុជាមានកំណើនគួរឱ្យកត់សម្គាល់ បើទោះបីបញ្ហាតម្លៃសំបុត្រយន្តហោះ និងជើងហោះហើរត្រង់រវាងកម្ពុជា-ចិននៅបន្តចោទជាបញ្ហាបន្តិចយ៉ាងណាក្តី។ បើតាម សមាគម លំហូរភ្ញៀវទេសចរចិននឹងបន្តចាប់យកប្រទេសកម្ពុជា ជាទិសដៅធ្វើដំណើរកម្សាន្តកាន់ខ្លាំងបន្ថែមទៀតនាពេលខាងមុខ។
ចុះផ្សាយនៅថ្ងៃ៖
ស្តាប់ - ០២:៣៧
លោក ហូ វណ្ណឌី ទីប្រឹក្សាសមាគមទេសចរណ៍កម្ពុជាបានប្រាប់វិទ្យុបារាំងអន្តរជាតិRFIថា ភ្ញៀវទេសចរចិននៅតែធ្វើដំណើរមកកម្ពុជាជាបន្តបន្ទាប់ គិតពីដើមខែមករា រហូតដល់ទល់ចុងខែ ខណៈភាគច្រើននៃភ្ញៀវទេសចរចិនទាំងអស់ ពួកគេធ្វើដំណើរទៅកាន់ខេត្តព្រះសីហនុ និងរាជធានីភ្នំពេញ។
បើតាមលោក ហូ វណ្ណឌី កំណើននាពេលនេះ លោកមិនទាន់អាចវាយតម្លៃជារួមបានថា នឹងមានស្ថានភាពល្អប្រសើរនៅឡើយ ប៉ុន្តែខាងសមាគមបានដាក់ក្តីរំពឹងថា ចំនួនភ្ញៀវទេសចរចិនអាចនឹងមានសន្ទុះធ្វើដំណើរចូលមកប្រទេសកម្ពុជាបានកាន់តែច្រើននាពេលខាងមុខ បើទោះបីតម្លៃសំបុត្រយន្តហោះនៅមានតម្លៃថ្លៃ ត្បិតជើងហោះហើរត្រង់ពីចិនមកកម្ពុជាមានភាពល្អប្រសើរបន្តិច ខណៈបច្ចុប្បន្នមានក្រុមហ៊ុនអាកាសចរណ៍៦កំពុងធ្វើប្រតិបត្តិការហោះហើររវាងប្រទេសទាំងពីរ។
តែយ៉ាងណា ទីប្រឹក្សាសមាគមទេសចរណ៍កម្ពុជារូបនេះបន្តមើលឃើញថា ភ្ញៀវទេសចរចិនដែលបានធ្វើដំណើរមកកម្ពុជា ភាគច្រើនគឺ ជាប្រភេទទេសចរដំណើរលក្ខណៈកញ្ចប់ទស្សនកិច្ច ដោយមិនមែនជាភ្ញៀវទេសចរឯកជន(គ្មានកញ្ចប់ទេសចរណ៍)។ ម្ល៉ោះហើយ សន្ទុះភ្ញៀវទេសចរចិនអាចនឹងមកសន្សឹមៗ តែមិនស្ថិតក្នុងទំហំធំ។
តែយ៉ាងណា អ្នកនាំពាក្យអាកាសចរណ៍ស៊ីវិលនៅមិនទាន់អាចបញ្ជាក់លម្អិតអំពីចំនួនភ្ញៀវទេសចរចិនធ្វើដំណើរមកប្រទេសកម្ពុជានៅឡើយ បន្ទាប់ពីរដ្ឋាភិបាលចិនសម្រេចដកវិធានការណ៍កូវីដ១៩របស់ខ្លួនកាលពីដើមខែមករា។
ក៏ប៉ុន្តែ កាលពីថ្ងៃទី២៩ មករា ខេត្តព្រះសីហនុទទួលបានភ្ញៀវទេសចរចិនចំនួន១០៤នាក់ ជាលើកដំបូងដោយភ្ញៀវទេសចរជាង១០០នាក់នេះបានធ្វើដំណើរចេញពី អាកាសយានដ្ឋានអន្តរជាតិគួនមីង ខេត្តយូណាន ប្រទេសចិន ដោយបានចុះចតនៅឯអាកាសយានដ្ឋានអន្តរជាតិកេងកងខេត្តព្រះសីហនុ តាមរយៈជើងហោះហើររបស់ក្រុមហ៊ុនRuili Airline។
ជុំវិញរឿងនេះ រដ្ឋមន្ត្រីក្រសួងទេសចរណ៍ លោក ថោង ខុន ក៏បានបញ្ជាក់ពីក្តីរំពឹងថា កម្ពុជានឹងទទួលទេសចរចិនយ៉ាងតិច១លាននាក់ក្នុងឆ្នាំ២០២៣នេះ។ ក្តីរំពឹងនេះថ្លែងឡើងចំពេលកម្ពុជាត្រៀមប្រារព្វកម្មវិធី និងព្រឹត្តិការណ៍ជាច្រើន ដើម្បីទទួលទេសចរចិន ដូចជាកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ជាដើម។
ក្នុងនោះ ដើម្បីគាំទ្រវិស័យទេសចរណ៍ និងផ្តល់លទ្ធភាពគ្រប់គ្រាន់ឱ្យអាជីវកម្មស្ថិតក្នុងវិស័យទេសចរណ៍អាចងើបឡើងវិញបាន រាជរដ្ឋាភិបាលកម្ពុជាកាលពីថ្ងៃទី៣០ ខែមករា បានសម្រេចបន្តលើកលែង ការបង់ពន្ធប្រចាំខែគ្រប់ប្រភេទ លើកលែងតែអាករលើតម្លៃបន្ថែម (VAT) ចំពោះសណ្ឋាគារ, ផ្ទះសំណាក់, និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្ម នៅខេត្តសៀមរាប សម្រាប់រយៈពេល៣ខែចាប់ពីខែមករា ដល់ខែមីនា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ