កុមារកម្ពុជាម្នាក់ ជួបប្រធានាធិបតីកូរ៉េខាងត្បូង និងភរិយា ក្រោយទទួលបានការវះកាត់បេះដូង
ប្រធានាធិបតីកូរ៉េខាត្បូង លោក យូន ស៊ុកយុល(Yoon Suk Yeol) និងភរិយា កាលពីថ្ងៃទី៣១ ខែមករាម្សិលមិញ បានទទួលជួបកុមារកម្ពុជាម្នាក់ ក្រោយពីកុមាររូបនេះ ទទួលបានការវះកាត់បេះដូង នៅមន្ទីរពេទ្យមួយក្នុងក្រុងសេអ៊ូល។ នេះបើតាមការបញ្ជាក់របស់មន្ត្រីកូរ៉េខាងត្បូង។ កុមារកម្ពុជារូបនេះ ត្រូវបានជួយសង្រ្គោះពីបញ្ហាបេះដូង បន្ទាប់ពីបានជួបភរិយារបស់ប្រធានាធិបតីកូរ៉េខាងត្បូងក្នុងទីក្រុងភ្នំពេញ កាលពីចុងឆ្នាំ២០២២។
ចុះផ្សាយនៅថ្ងៃ៖
ស្តាប់ - ០១:៤២
កុមារកម្ពុជា ដែលមានជំងឺបេះដូងពីកំណើតរូបនេះ មានឈ្មោះ រដ្ឋា អាយុ១៤ឆ្នាំ និងត្រូវបានវះកាត់ព្យាបាលបេះដូង នៅក្នុងមន្ទីរពេទ្យ Asan ក្នុងទីក្រុងសេអ៊ូល កាលពីខែធ្នូ កន្លងទៅ។ ក្រោយពីសម្រាកព្យាបាល កុមាររូបនេះក៏បានជួប លោកប្រធានាធិបតីកូរ៉េខាងត្បូង និងភរិយា នៅវិមានប្រធានាធិបតី ហើយលោក យូន ស៊ុកយុល និងភរិយា ក៏បានជូនពរឲ្យកុមារកម្ពុជារូបនេះ ឆាប់ជាសះស្បើយឡើងវិញ ក្រោយពីការវះកាត់។ នេះបើតាមការចុះផ្សាយរបស់សារព័ត៌មានយ៉ុនហាប់ (Yonhap News Agency) នៅថ្ងៃទី៣១ ខែមករា ម្សិលមិញ។
ការព្យាបាលកុមាររូបនេះ គឺកើតឡើងនូវក្រោយពេល ដែលលោកស្រី Kim Keon Hee ដែលជាភរិយារបស់ប្រធានាធិបតីកូរ៉េខាងត្បូង គឺលោក យូន ស៊ុកយុល បានជួបកុមារកម្ពុជារូបនេះ កាលពីខែវិច្ឆិកា នាទីក្រុងភ្នំពេញ។
រដ្ឋាធ្លាប់ទទួលបានការវះកាត់បេះដូង ក្នុងឆ្នាំ២០១៨ ប៉ុន្តែមិនមានលទ្ធភាពក្នុងការវះកាត់ព្យាបាលបន្តដោយសារតែស្ថានភាពសេដ្ឋកិច្ចគ្រួសារ។ ប៉ុន្តែក្នុងពេលទស្សនកិច្ចនៅក្នុងមន្ទីរពេទ្យមួយនៅកម្ពុជា កាលពីខែវិច្ឆិកា ឆ្នាំ២០២២ លោកស្រី Kim Keon Hee បានសម្រេចជួបឧបត្ថមដល់ការវះកាត់ព្យាបាលដល់ រដ្ឋា។
ជំនួបរបស់លោកស្រី Kim Keon Hee ជាមួយកុមារកម្ពុជារូបនេះ ត្រូវបានផ្សព្វផ្សាយពេញបណ្តាញសង្គម និងទទួលបានការស្វាគមន៍ពីសាធារណជន ប៉ុន្តែក៏មានការរិះគន់ពីគណបក្សប្រឆាំងរបស់កូរ៉េខាងត្បូង។ យោងតាមការចុះផ្សាយរបស់សារព័ត៌មាន យ៉ុនហាប់ កាលពីចុងខែវិច្ឆិកា ឆ្នាំ២០២២ តំណាងរាស្រ្តគណបក្សប្រឆាំងរបស់កូរ៉េមួយរូបបានវាយប្រហារចោទប្រកាន់លោកស្រី Kim Keon Hee ថាមានបំណងធ្វើឲ្យសាធារណជនមើលទៅឃើញថាជាមនុស្សសប្បុរស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ