ស្ថាប័នរដ្ឋពីរ ព្រមានចាត់វិធានការផ្លូវច្បាប់ចំពោះអ្នកផ្តល់កម្ចីឥណទានខុសច្បាប់
ធនាគារជាតិនៃកម្ពុជា និងអគ្គស្នងការនគរបាលជាតិបានចេញសេចក្តីថ្លែងការណ៍រួមព្រមានចាត់វិធានការតាមផ្លូវច្បាប់ចំពោះអ្នកផ្តល់កម្ចីឥណទានណាគ្មានច្បាប់អនុញ្ញាតពីធនាគារជាតិ និងបានផ្តល់កម្ចីខុសច្បាប់ដល់អតិថិជនក្រោមរូបភាពផ្សេងៗគ្នា។ ការផ្តល់សេវាឥណទានយ៉ាងអនាធិបតេយ្យបែបនេះ ត្រូវបានធនាគារជាតិចាត់ទុកថា បានធ្វើឱ្យពលរដ្ឋធ្លាក់ទៅក្នុងវិបត្តិបំណុល តាមរយៈការយកអត្រាការប្រាក់ហួសហេតុពីសំណាក់ម្ចាស់កម្ចី។
ចុះផ្សាយនៅថ្ងៃ៖
ស្តាប់ - ០២:៤៦
ក្នុងសេចក្តីថ្លែងការណ៍រួមដែលចេញផ្សាយកាលពីថ្ងៃទី០២ ខែកុម្ភៈ ធនាគារជាតិនៃកម្ពុជាបានសង្កេតឃើញថា មួយរយៈពេលចុងក្រោយនេះ សកម្មភាពផ្សព្វផ្សាយ និងការផ្តល់សេវាហិរញ្ញវត្ថុក្រៅផ្លូវការ ជាពិសេសសេវាកម្ចីឥណទានតាមរយៈទូរស័ព្ទ បណ្តាញសង្គម និងតាមអនឡាញយ៉ាងណាអនាធិបតេយ្យដោយគ្មានច្បាប់អនុញ្ញាតពីធនាគារជាតិនៃកម្ពុជា កំពុងតែធ្វើប្រតិបត្តិការយ៉ាងច្រើនក្នុងប្រទេសកម្ពុជា។
ការផ្តល់កម្ចីឥណទានខុសច្បាប់ទាំងអស់នេះ បើតាមធនាគារជាតិ វាបានផ្តល់ផលអវិជ្ជមានដល់សង្គម និងសេដ្ឋកិច្ចជាតិ។ ផលអវិជ្ជមានត្រង់ហេតុថា អ្នកផ្តល់សេវាឥណទានយកអត្រាការប្រាក់ខ្ពស់ពីអ្នកទទួលកម្ចី ត្បិតពេលខ្លះអ្នកទទួលកម្ចីក៏រងការគំរាមកំហែងបំភិតបំភ័យ និងខ្លះបានអនុវត្តកិច្ចសន្យាមិនសុចរិតតាមរយៈការកេងចំណេញហួសហេតុពីអ្នកខ្ចីប្រាក់ ដោយរាល់ទង្វើទាំងអស់នេះ ធនាគារជាតិយល់ថា ចង់មិនចង់វាផលប៉ះពាល់ដល់ជីវភាពរស់នៅរបស់ពលរដ្ឋ និងទាញពលរដ្ឋឱ្យធ្លាក់ទៅក្នុងវិបត្តិបំណុលដ៏ច្រើនលើសលប់។
ទាក់ទិននឹងរឿងនេះ លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុមើលឃើញថា ប្រជាពលរដ្ឋមួយចំនួនកំពុងរងគ្រោះដោយសារតែសេវាកម្ចីឥណទានពីអ្នកផ្តល់ឥណទានខុសច្បាប់ទាំងអស់នោះ។ លោកថា មិនត្រឹមតែធ្វើឱ្យពលរដ្ឋធ្លាក់ទៅក្នុងវិបត្តិបំណុលនោះទេ ប៉ុន្តែពលរដ្ឋក៏រងការគំរាមកំហែងយ៉ាងធ្ងន់ធ្ងរពីម្ចាស់កម្ចីថែមទៀត។
បើតាម លោក កាំង តុងងី ប្រសិនបើមិនមានការទប់ស្កាត់នោះទេ ពលរដ្ឋនឹងបន្តរងគ្រោះកាន់តែធ្ងន់ ហើយមួយផ្នែកទៀត វានឹងប៉ះពាល់ដល់ស្ថិរភាពហិរញ្ញវត្ថុ និងភាពរីកចម្រើននៃវិស័យហិរញ្ញវត្ថុនៅកម្ពុជា។
តែយ៉ាងណា ធនាគារជាតិនៃកម្ពុជាបានស្នើឱ្យពលរដ្ឋត្រូវប្រើប្រាស់សេវាហិរញ្ញវត្ថុដែលផ្តល់ដោយគ្រឹះស្ថានធនាគារ និងមីក្រូហិរញ្ញវត្ថុដែលទទួលបានអាជ្ញាបណ្ណប្រកបអាជីវកម្មពីធនាគារជាតិ រួមមាន៖ ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុ គ្រឹះស្ថានភតិសន្យាហិរញ្ញវត្ថុ គ្រឹះស្ថានផ្តល់សេវាទូទាត់សងប្រាក់ និងគ្រឹះស្ថានឥណទានជនបទ។ រាល់គ្រឹះស្ថានធនាគារនិងមីក្រូហិរញ្ញវត្ថុដែលរៀបរាប់ បើតាមធនាគារជាតិ គឺស្ថិតក្រោមច្បាប់ និងមានការត្រួតពិនិត្យរបស់ធនាគារជាតិ ហើយអតិថិជនត្រូវបានការពារដោយច្បាប់។
ក៏ប៉ុន្តែ កាលពីថ្ងៃទី០៩ ធ្នូ ឆ្នាំ២០២២ អង្គការលីកាដូ និងអង្គការសមធម៍កម្ពុជាបានចេញរបាយការណ៍មួយស្តីពីវិបត្តិបំណុលច្រើនលើសលប់ក្នុងវិស័យមីក្រូហិរញ្ញវត្ថុ។ ក្នុងរបាយការណ៍នោះ អង្គការទាំងពីរកឃើញថា កម្ចីរបស់គ្រឹះស្ថានមីក្រូហិរញ្ញវត្ថុ និងធនាគារស្របច្បាប់បានបង្កឱ្យមានការរំលោភសិទ្ធិមនុស្ស តាមរយៈការរឹបអូសទ្រព្យសម្បត្តិរបស់កូនបំណុល នៅពេលដែលពួកគេមិនអាចបំពេញកាតព្វកិច្ច ចំពោះពេលដែលកូនបំណុលទាំងនោះកំពុងធ្លាក់ទៅក្នុងវិបត្តិបំណុលវ័ណ្ឌករួចទៅហើយ។ របាយការណ៍ដដែលបន្តថា ពលរដ្ឋជាកូនបំណុលក្នុងមួយឆ្នាំបានបាត់បង់ប្លង់កម្មសិទ្ធិដីធ្លីជាង៣សែនប្លង់ ហើយបញ្ហានេះបានបង្កឱ្យមានការរំលោភសិទ្ធិមនុស្សយ៉ាងខ្លាំងក្នុងសង្គមកម្ពុជានារយៈពេល៥ឆ្នាំចុងក្រោយនេះ។
អង្គការលីកាដូ រកឃើញទៀតថា កាលពីឆ្នាំ២០២០ កម្ចីឥណទានខ្នាតតូចគិតជាមធ្យមនៅកម្ពុជាគឺមានចំនួនគឺជាង៤ពាន់ដុល្លារ(៤.២៨០) ដែលជាទំហំធំជាងគេនៅលើពិភពលោក។ ប្រជាពលរដ្ឋចំនួន ៩៥% មានប្រាក់ចំណូលប្រចាំឆ្នាំតិចជាងចំនួនកម្ចីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ