ឃុំចំនួន១០ ក្នុងស្រុកមួយនៃខេត្តកំពង់ចាមត្រូវបានជ្រើសរើសជាឃុំកសិកម្មគំរូ
គម្រោងឃុំកសិកម្មគំរូ បានជ្រើសរើសយកឃុំចំនួន១០ នៅក្នុងស្រុកជើងព្រៃនៃខេត្តកំពង់ចាម មុននឹងឈានទៅរកការអនុវត្តជាទូទៅក្នុងប្រទេស។ នេះបើតាមការបញ្ជាក់របស់លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម នៅថ្ងៃទី០៥ ខែកុម្ភៈ ខណៈពេលដែលគោលនយោបាយអាទិភាពរបស់បក្សប្រជាជនកម្ពុជា សម្រាប់អាណត្តិទី៧ គឺ «វិស័យកសិកម្ម»។
ចុះផ្សាយនៅថ្ងៃ៖
ស្តាប់ - ០២:១២
លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម បានថ្លែងប្រាប់វិទ្យុបារាំងអន្តរជាតិ នៅថ្ងៃទី០៥ ខែកុម្ភៈថា ឃុំកសិកម្មគំរូ គឺជាឃុំដែលមានមន្ត្រីកសិកម្ម ឬអ្នកជំនាញកសិកម្មម្នាក់ ទៅធ្វើការនៅក្នុងឃុំនោះជាប្រចាំ ដោយសារតែកន្លងមកមិនមានមន្ត្រីកសិកម្មទៅធ្វើការដល់ឃុំទេ ឬក៏មានដែរ ប៉ុន្តែតាមរយៈគម្រោងនានាក្នុងរយៈពេលខ្លី។
លោកបណ្ឌិត យ៉ង សាំងកុមារ បានបញ្ជាក់ថា តាមរយៈគោលនយោបាយរបស់គណបក្សប្រជាជន សម្រាប់អាណត្តិទី៧ គឺនឹងមានការរៀបចំឲ្យបានគ្រប់ឃុំក្នុងប្រទេសកម្ពុជា ប៉ុន្តែអាស្រ័យលើបទពិសោធន៍ ១០ឃុំដំបូង ដែលកំពុងចាប់ផ្តើមអនុវត្តនាពេលនេះ។
តាមគម្រោង ការប្រកាសសុពលភាពនៃឃុំទាំង១០ សម្រាប់អនុវត្តឃុំកសិកម្មគំរូនឹងធ្វើឡើងនៅថ្ងៃអង្គារ ទី០៧ ខែកុម្ភៈនេះ ក្នុងស្រុកជើងព្រៃ ខេត្តកំពង់ចាម។ ស្រុកជើងព្រៃខេត្តកំពង់ចាម ដែលមានឃុំសរុបចំនួន១០។ នេះបើតាមរដ្ឋលេខាធិការក្រសួងកសិកម្ម ដោយបានបញ្ជាក់បន្ថែមថា មូលហេតុនៃការសម្រេចជ្រើសរើសស្រុកជើងព្រៃ គឺជាការសម្រេចរបស់រដ្ឋមន្ត្រីក្រសួងកសិកម្ម លោក ឌិត ទីណា។
ការរៀចំបង្កើតឃុំកសិកម្មគំរូនាពេលនេះ គឺបន្ទាប់ពីវិស័យកសិកម្មកម្ពុជា តែងតែជួបបញ្ហាប្រឈមនានា ជាពិសេសបញ្ហាទីផ្សារកសិផល ឬបញ្ហាស្រូវធ្លាក់ថ្លៃរបស់ប្រជាកសិករ ដែលតែងតែកើតឡើងស្ទើររាល់ឆ្នាំ។ ការបង្កើតគម្រោងនេះ ក៏ធ្វើឡើងនៅក្រោមអាណត្តិរបស់រដ្ឋមន្ត្រីកសិកម្មថ្មី គឺលោក ឌិត ទីណា ដែលចូលមកជំនួស លោក វេង សាខុន។
លោកបណ្ឌិត យ៉ង សាំងកុមារ អះអាងថាគម្រោងអនុវត្តឃុំកសិកម្មគំរូនេះ នឹងធ្វើឡើងជាជំហានៗ ដោយចាប់ផ្តើមពីការសិក្សាស្ថានភាពកសិកម្មនៅតាមឃុំនីមួយៗ ដើម្បីស្វែងយល់ពីសក្តានុពលកសិកម្ម និងការប្រឈមក្នុងឃុំទាំងនោះ។ បន្ទាប់មកគឺជាស្វែងរកកសិករ ដែលស្ម័គ្រចូលរួមក្នុងគម្រោងនេះ ដើម្បីទទួលការគាំទ្រលើការផលិតភ្ជាប់នឹងទីផ្សារ ហើយជំហានបន្ត គឺពង្រីកបន្ថែមចំនួនកសិករតាមគោលការណ៍ស្ម័គ្រចិត្ត។ លោកបន្តថា អ្នកដែលចូលរួមនឹងទទួលបានការបណ្តុះបណ្តាលបច្ចេកទេស ការចងក្រងជាក្រុម ហើយនឹងមានការផ្សារភ្ជាប់ទៅនឹងទីផ្សារ ដែលដំបូងគឺចាប់ផ្តើមពីស្រូវមុនគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ