ក្រសួងពាណិជ្ជកម្មចាត់ទុកថា កម្ពុជានៅរក្សាកំណើននាំចេញខ្ពស់ ទោះបាត់EBA ២០%ពីអឺរ៉ុប និងGSP ពីអាមេរិកជាង២ឆ្នាំ
ក្រសួងពាណិជ្ជកម្មអះអាងថា កម្ពុជាមិនខាតបង់ផលប្រយោជន៍ពាណិជ្ជកម្មពីការបាត់បង់ប្រព័ន្ធអនុគ្រោះពន្ធEBA២០%ពីសហគមន៍អឺរ៉ុប និង GSP របស់សហរដ្ឋអាមេរិកឡើយ ខណៈទំហំនាំចេញពាណិជ្ជកម្មរបស់កម្ពុជាទៅកាន់ទីផ្សារទាំងពីរនេះ បន្តមានអតិរេកពាណិជ្ជកម្មខ្ពស់ដដែល។ សម្រាប់ក្រសួងពាណិជ្ជកម្ម ការដកហូតប្រព័ន្ធអនុគ្រោះទាំងEBA និងGSP គឺកម្ពុជាមិនអាចជៀសផុតបានឡើយនាពេលអនាគត ដោយហេតុថាកម្ពុជាកំពុងរលាស់ខ្លួនចេញពីប្រទេសដែលមានប្រាក់ចំណូលទាប ទៅកាន់ប្រទេសដែលមានប្រាក់ចំណូលមធ្យមនៅឆ្នាំ២០៣០។
ចុះផ្សាយនៅថ្ងៃ៖
ស្តាប់ - ០២:៥១
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់វិទ្យុបារាំងអន្តរជាតិRFIថា កម្ពុជានាថ្ងៃអនាគតមានទិសដៅចង់ជំរុញការធ្វើពាណិជ្ជកម្មឱ្យស្មើមុខស្មើមាត់ជាមួយបណ្តាប្រទេសដែលមានទីផ្សារធំៗនៅលើពិភពលោក ជាពិសេសជាមួយសហរដ្ឋអាមេរិក និងសហគមន៍អឺរ៉ុប ដោយមិនស្ថិតនៅក្រោមប្រព័ន្ធអនុគ្រោះព័ន្ធណាមួយឡើយ។
លោក ប៉ែន សុវិជាតិបន្តថា ការបាត់បង់ប្រព័ន្ធអនុគ្រោះពន្ធលើមុខទំនិញសព្វមុខលើកលែងតែអាវុធ ២០% ឬហៅថា EBA និងប្រព័ន្ធអនុគ្រោះGSP លោកសង្កេតឃើញក្នុងរយៈពេលជាង២ឆ្នាំមកនេះ កម្ពុជាមិនខាតបង់ផលប្រយោជន៍អ្វីឡើយ។ ផ្ទុយទៅវិញ ទំហំពាណិជ្ជកម្មនឹងការនាំចេញពីកម្ពុជាទៅកាន់ទីផ្សារទាំងពីរ គឺបន្តមានទំនោរកើនឡើងជាលំដាប់ ពោលគឺការនំាចេញរបស់កម្ពុជាទៅកាន់ទីផ្សារសហរដ្ឋអាមេរិកក្នុងឆ្នាំ២០២២ ទទួលបានចំណូលជិត៩ពាន់លានដុល្លារ កើន១៩% បើធៀបនឹងឆ្នាំ២០២១ កើនលើសប្រមាណជា២ពាន់លានដុល្លារ ដោយមានត្រឹម៧ពាន់លានដុល្លារប៉ុណ្ណោះ។
ចំណែកបរិមាណនាំចេញទៅកាន់សហភាពអឺរ៉ុបវិញ បើតាមអ្នកនាំពាក្យក្រសួងពាណិជ្ជកម្មដដែល កម្ពុជាបានសម្រេចការនាំចេញទៅកាន់សហភាពអឺរ៉ុបកើន១ភាគរយ ឬជាង៣ពាន់លានដុល្លារកាលពីឆ្នាំ២០២១ ខណៈទំហំពាណិជ្ជកម្មរវាងគ្នាកើន១១ភាគរយ។ ប៉ុន្តែសម្រាប់របាយការណ៍ពាណិជ្ជកម្មឆ្នាំ២០២២ ក្រសួងពាណិជ្ជកម្មនៅមិនទាន់បានបញ្ជាក់នៅឡើយ។
យ៉ាងណាក្តី ចំពោះការអះអាងថា ការដកប្រព័ន្ធអនុគ្រោះEBAមួយផ្នែក និងGSPទាំងស្រុងមិនបានទាញឱ្យការធ្វើពាណិជ្ជកម្មរបស់កម្ពុជាធ្លាក់ចុះនោះទេ ត្រូវបានលោក ប៉ែន សុវិជាតិលើកអំណះអំណាងថា គឺដោយសារកម្ពុជានាំចេញតែផលិតផលណាដែលមានតម្រូវការ និងការប្រើប្រាស់ចាំបាច់ជាប្រចាំថ្ងៃប៉ុណ្ណោះទៅកាន់ទីផ្សារទាំងពីរនេះ។ ត្បិតអ្នកដែលត្រូវខាតបង់នោះគឺ ជាប្រជាជននៅតាមប្រទេសទាំងនោះទៅវិញ ពីព្រោះថា ពួកគេត្រូវបន្ថែមការចំណាយថ្លៃមកលើមុខទំនិញដែលនាំចូលមកពីកម្ពុជា ក្រោយការយកពន្ធរួច។
សូមរំឭកថា សហភាពបានសម្រេចដកប្រព័ន្ធអនុគ្រោះEBAចំនួន២០ភាគរយចេញពីកម្ពុជាកាលពីថ្ងៃទី២០ ខែសីហា ឆ្នាំ២០២០។ ក្នុងនោះ កម្ពុជានៅតែអាចបន្តនាំចេញទំនិញទាំងនេះបាន តែក្នុងលក្ខខណ្ឌត្រូវបង់ពន្ធ។ ចំណែក ទំនិញរបស់កម្ពុជា៨០%ទៀត គឺនៅតែអាចបន្តនាំចេញទៅអឺរ៉ុបដោយមិនចាំបាច់បង់ពន្ធដដែល។ ទំនិញដែលប៉ះពាល់ដោយសារបាត់ផ្នែកខ្លះនៃEBAនេះ គឺមាន៤០មុខ ភាគច្រើនជាសម្លៀកបំពាក់ ស្បែកជើង និងផលិតផលធ្វើដំណើរដែលនាំទៅអឺរ៉ុបក្នុងតម្លៃ១ពាន់លានអឺរ៉ូជារៀងរាល់ឆ្នាំ។ តែយ៉ាងណា EBAនៅសល់នឹងអាចដកទាំងស្រុងផង ប្រសិនបើស្ថានភាពសិទ្ធិមនុស្ស និងការបោះឆ្នោតនៅកម្ពុជានាខែកក្តដាខាងមុខមិនធ្វើឡើងដោយសេរី ត្រឹមត្រូវ និងយុត្តិធម៌។
ចំណែកប្រព័ន្ធអនុគ្រោះពន្ធGSPវិញ សហរដ្ឋអាមេរិកបានដកហូតចេញពីកម្ពុជាកាលពីអំឡុងឆ្នាំ២០២០ដូចគ្នា ហើយមកទល់ពេលនេះ មិនទាន់មានសញ្ញាណាមួយថា កម្ពុជានឹងទទួលបានមកវិញនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ