កម្ពុជាគ្រោងបង្កើតមជ្ឈមណ្ឌលពាណិជ្ជកម្មឯកជននៅចិនចំនួន៥ ដើម្បីផ្សព្វផ្សាយផលិតផលខ្មែរ និងទាក់ទាញការវិនិយោគ
ក្រសួងពាណិជ្ជកម្ម គ្រោងបង្កើតមជ្ឈមណ្ឌលពាណិជ្ជកម្មឯកជនកម្ពុជាចំនួន៥នៅក្នុងប្រទេសចិន ដើម្បីដាក់តាំងបង្ហាញ និងលក់ផលិតផលខ្មែរ ជាពិសេសផ្តល់ឱកាសទីផ្សារសម្រាប់អ្នករកស៊ីនានា។ បើតាមក្រសួងពាណិជ្ជកម្ម គម្រោងនេះនឹងជួយលើកកម្ពស់ការផ្សព្វផ្សាយផលិតផលខ្មែរនៅឯក្រៅប្រទេសបន្ថែមទៀត ជាពិសេសទីផ្សារប្រទេសចិនតែម្តង ខណៈផលិតផលភាគច្រើន ដែលនឹងទទួលបានផលប្រយោជន៍ ពីមជ្ឈមណ្ឌលពាណិជ្ជកម្មនេះ គឺផលិតផលកសិកម្ម។
ចុះផ្សាយនៅថ្ងៃ៖
ស្តាប់ - ០២:០៧
គម្រោងបង្កើតមជ្ឈមណ្ឌលពាណិជ្ជកម្មឯកជនចំនួន៥នៅឯប្រទេសចិនដែលក្រសួងពាណិជ្ជកម្មបានឱ្យដឹងនោះគឺមានទីតាំងស្ថិតនៅក្នុងទីក្រុងឆាងឈុន, ហាបីន, ណានជីង, ថាយយាន និងចឹងចូវ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានលើកឡើងថា គម្រោងនេះ នឹងជំរុញការធ្វើពាណិជ្ជកម្ម ការផ្សព្វផ្សាយ ផលិតផល វប្បធម៌ ជាពិសេសវិស័យទេសចរណ៍តែម្តងជាមួយប្រទេសដៃគូ និងបណ្តាប្រទេសផ្សេងទៀត។ ហើយលោកថា ផលិតផលដែលអាចទទួលបានផលប្រយោជន៍ច្រើនពីមជ្ឈមណ្ឌលពាណិជ្ជកម្មឯកជននេះ គឺរួមមាន៖ កសិផលប្រភេទស្រស់ កសិផលកែច្នៃរួច សំបុកត្រចៀកកាំ និងវត្ថុអនុស្សាវរីយ៍ជាដើម។
ចំណែក លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានចាត់ទុកការបង្កើតមជ្ឈមណ្ឌលពាណិជ្ជកម្មកម្ពុជានៅឯប្រទេសចិននេះ គឺប្រៀបបានទៅនឹងការពង្រើកទីផ្សារនាំចេញផលិតផលរបស់កម្ពុជា ជាពិសេសការផ្សព្វផ្សាយនូវគុណភាពរបស់ផលិតផលកម្ពុជាទៅកាន់ទីផ្សារអន្តរជាតិ។
តាមរយៈមជ្ឈមណ្ឌលនេះទៀតសោធ លោកឧកញ៉ាមើលឃើញថា វាក៏នឹងក្លាយជាទីតាំងពិភាក្សាអំពីការវិនិយោគនានារវាងប្រទេសទាំងពីរ ឬជាមួយប្រទេសដទៃទៀត។ ក្នុងន័យនេះលោកចង់សំដៅថា កម្ពុជានឹងទទួលបានផលចំណេញដល់ការលូតលាស់នៃសេដ្ឋកិច្ចជាតិ និងស្របពេលដែលកម្ពុជាកំពុងស្វែងរកទីផ្សារនាំចេញផលិតផលទំនិញ និងការវិនិយោគពីក្រៅស្រុក។
បើតាមលោកឧកញ៉ា លឹម ហេង ផលិតផលភាគច្រើន ដែលនឹងទទួលបានផលប្រយោជន៍ ពីមជ្ឈមណ្ឌលនេះ គឺផលិតផលកសិកម្មក៏ព្រោះថា បញ្ហាកសិកម្មនេះ កម្ពុជាកំពុងខ្វះតម្រូវការទីផ្សារ។ ម្ល៉ោះហើយការបង្កើតមជ្ឈមណ្ឌលពាណិជ្ជកម្មឯកជននេះ នឹងទាក់ទាញឱ្យរាល់អ្នកមានទីផ្សាររកស៊ីនៅក្រៅប្រទេសធ្វើការបញ្ជាទិញ ឬស្រូបទាញអ្នកវិនិយោគមកក្នុងស្រុក ដើម្បីធ្វើការកែឆ្នៃ សម្រាប់នាំចេញ។
សូមជម្រាបថា នាពេលកន្លងមកកម្ពុជាធ្លាប់បានដាក់ឱ្យដំណើរការរួចមកហើយ នូវមជ្ឈមណ្ឌលពាណិជ្ជកម្មឯកជនកម្ពុជា សម្រាប់បម្រើឲ្យកិច្ចការពាណិជ្ជកិច្ចរវាងកម្ពុជា និងជប៉ុន ដែលស្ថិតនៅទីក្រុង Atsugi នៃខេត្ត កាណាហ្កាវ៉ា (Kanagawa) ប្រទេសជប៉ុន។ ជាការផែនការបន្ទាប់ ក្រសួងពាណិជ្ជកម្មនឹងពង្រើកទីផ្សារនាំចេញផលិតផលរបស់កម្ពុជានៅប្រទេសជប៉ុនបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ