ភ្ញៀវទេសចរចិនចាប់ផ្តើមចូលមកកម្ពុជាជាបន្តបន្ទាប់ ខណៈការរំពឹងទុកថាមានប្រមាណ១លាននាក់នៅឆ្នាំ២០២៣នេះ
ក្រសួងទេសចរណ៍ និងអ្នកពាក់ព័ន្ធវិស័យទេសចរណ៍កម្ពុជាកាលពីថ្ងៃអង្គារម្សិលមិញបានចាប់ផ្តើមទទួលដោយផ្ទាល់អ្នកទេសចរចិនចំនួន ១២៥នាក់ នៅព្រលានយន្តហោះអន្តរជាតិភ្នំពេញ។ គឺជាការមកដល់របស់ទេសចរចិនជាលើកដំបូងពីទីក្រុងប៉េកាំង បន្ទាប់ពីចិនបើកប្រទេសឡើងវិញពីផែនការ zero-covid និងជាជើងទីពីរបន្ទាប់ពីការមកដល់របស់ទេសចរចិននៃខេត្តយូណាននៅខេត្តព្រះសីហនុកាលពីចុងខែមករា ឆ្នាំ២០២៣នេះ។
ចុះផ្សាយនៅថ្ងៃ៖
ស្តាប់ - ០២:០៩
ក្រោមវត្តមានរបស់រដ្ឋមន្ត្រីក្រសួងទេសចរណ៍កម្ពុជា អ្នកទេសចរណ៍ចិនទាំងស្រី ទាំងប្រុស ចំនួន១២៥នាក់ ត្រូវបានស្វាគមន៍ដោយបាច់ផ្កា និងបំពាក់ដោយក្រម៉ាខ្មែរនៅព្រលានយន្តហោះអន្តរជាតិភ្នំពេញដោយផ្ទាល់។ បដិសណ្ឋារកិច្ចដ៏កក់ក្តៅប្រកបដោយតម្លៃខ្ពស់នេះ ត្រូវគេរំពឹងថាជាផ្នែកមួយដែលអាចស្តារវិស័យទេសចរណ៍ឡើងវិញ តាមរយៈទេសចរអន្តរជាតិជនជាតិចិន បន្ទាប់ពីកម្ពុជារងនូវវិបត្តិកូវីដ-១៩ និងការដករបាំងសូន្យកូវីដនៃប្រទេសចិន។
លោក ថោង ខុន រដ្ឋមន្ត្រីក្រសួងទេសចរណ៍កម្ពុជាបានថ្លែងឲ្យដឹងថាភ្ញៀវទេសចរចិន ដែលមកដល់កម្ពុជាពេលនេះ មួយចំនួនបានមកដើរលេងតាមរយៈក្រុមហ៊ុនទេសចរណ៍ និងខ្លះទៀតបានមកដើរលេងជាមួយមិត្តភក្តិជាធម្មតា។ លោករដ្ឋមន្ត្រីរំពឹងថា កម្ពុជានឹងអាចទាក់ទាញភ្ញៀវទេសចរចិនចាប់ពី៨០ម៉ឺន ទៅ១លាននាក់នៅឆ្នាំ២០២៣នេះ។
តាមគម្រោង នៅថ្ងៃទី១៦ ខែកុម្ភៈខាងមុខ ក៏នឹងមានជើងហោះលើកដំបូងពីទីក្រុងគួនមីង និងសៀងហៃរបស់ចិនមកខេត្តសៀមរាបដែរ ដោយលោករដ្ឋមន្ត្រីបញ្ជាក់ថា ការធ្វើរដំណើររបស់ទេសចរចិនមកកម្ពុជា នឹងកើនឡើងជាលំដាប់ចាប់ពីខែមីនា ឆ្នាំ២០២៣នេះទៅ។
សូមរំលឹកថា កាលពីចុងខែមករាកន្លងទៅ កម្ពុជាបានទទួលភ្ញៀវទេសចរចិនជាលើកដំបូងនៅខេត្តព្រះសីហនុចំនួនជាង១០០នាក់ ដែលជាការហោះហើរត្រង់ក្រោយចិនបើករបាំងកូវីដសូន្យ និងជាការមកដល់ក្រោយចូលឆ្នាំចិនផងដែរ។
សូមបញ្ជាក់ថាកម្ពុជាទទួលបានភ្ញៀវទេសចរអន្តរជាតិប្រមាណ ៤០ម៉ឺននាក់ នៅក្នុងខែមករា ឆ្នាំ២០២៣នេះ ក្នុងនោះទេសចរចិនមានប្រមាណ ២៥ ០០០នាក់ មានការកើនឡើង៩០០% ធៀបនឹងរយៈពេលដូចគ្នាក្នុងឆ្នាំ២០២២ ខណៈក្នុងខែមករានោះដែរ ជើងហោះហើរដែលចូលមកដល់កម្ពុជាមានចំនួនសរុបជាង ១ ៦០០ជើង។ តាមផែនការស្តារទេសចរណ៍ឡើងវិញ ប្រទេសកម្ពុជារំពឹងថានឹងទទួលបានទេសចរអន្តរជាតិចំនួន ៤លាននាក់ នៅឆ្នាំ២០២៣នេះ និង៧លាននាក់នៅឆ្នាំ២០២៥ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ