សហគមន៍ព្រៃព្រះរការរៀបំបុណ្យបំបួសដើមឈើ ខណៈការកាប់ឈើនៅតែមាន
បណ្តាញសហគមន៍ព្រៃព្រះរការ ស្ថិតនៅក្នុងខេត្តព្រះវិហារ គ្រោងនឹងរៀបចំពិធីបុណ្យបំបួសដើមឈើក្នុងព្រៃព្រះរការ នៅថ្ងៃទី១៨ ខែកុម្ភៈ ស្អែកនេះ។ អ្នករៀបចំកម្មវិធីបុណ្យនេះ បញ្ជាក់ថាពិធីបុណ្យបំបួសព្រៃព្រះរការ ធ្វើឡើងដើម្បីចូលរួមក្នុងកិច្ចការពារព្រៃឈើ ដើម្បីភពផែនដី និងជីវិតមនុស្ស សត្វ ខណៈដែលសកម្មភាពនៃការកាប់បំផ្លាញនៅតែបន្តកើនឡើង។
ចុះផ្សាយនៅថ្ងៃ៖
ស្តាប់ - ០២:២៨
កម្មវិធីបុណ្យខួបបំបួសព្រៃព្រះរការលើកទី៦ នេះគ្រោងនឹងធ្វើឡើងនៅថ្ងៃទី១៨ ខែកុម្ភៈ និងថ្ងៃទី១៩ ខែកុម្ភៈ ដោយផ្តើមចេញពីការជួបជុំ និងធ្វើដំណើរឆ្ពោះទៅតំបន់ព្រៃព្រះរការ(អូរស្កាច) ស្ថិតនៅក្នុងភូមិរុងរឿង៣ ឃុំមរកត ស្រុកជាំក្សាន្ត ខេត្តព្រះវិហារ។ កម្មវិធីបុណ្យខួបបំបួសព្រៃព្រះរការ ត្រូវបានរៀបចំឡើងដោយ សមាជិកបណ្តាញសហគមន៍ព្រៃព្រះរការ អាជ្ញាធរមូលដ្ឋាន និងមន្ត្រីពាក់ព័ន្ធ។
លោក ស៊ុត សាវន សមាជិកបណ្តាញសហគមន៍ព្រៃព្រះរការបានថ្លែងប្រាប់វិទ្យុបារាំងអន្តរជាតិ នៅថ្ងៃទី១៧ ខែកុម្ភៈនេះ ថាការរៀបចំកម្មវិធីបុណ្យបំបួសដើមឈើនេះ គឺជាប្រពៃណី ជំនឿសាសនា ដោយជឿថាមានអ្នកថែក្សាព្រៃឈើ ដូច្នេះត្រូវតែមានកម្មវិធីបំបួស ដើម្បីរក្សាការពារប្រពៃណី វប្បធម៌ អត្តសញ្ញាណរបស់ជនជាតិដើមភាគតិច។ លោកបន្តថា ការបំបួសព្រៃឈើនាពេលនេះ ក៏ជាការការពារមិនឲ្យជនខិលខូចណាមួយមកកាប់បំផ្លាញព្រៃឈើ។
លោក ស៊ុត សាវន បានបញ្ជាក់ថា ការកាប់បំផ្លាញព្រៃឈើនៅតែបន្តកើតមានជាហូរហែ។ លោកបានអះអាងដោយសំអាងលើទិន្នន័យពីអ្នកឃ្លាំមើលនៃបណ្តាញសហគមន៍ព្រៃព្រះរការថា ក្នុងខែមករា ដើមឆ្នាំ២០២៣នេះ ការកាប់ឈើក្នុងតំបន់ព្រៃព្រះរការមានជាង ៦០ករណី។ លោកបញ្ជាក់ការកាប់បំផ្លាញព្រៃឈើអាចមានច្រើនជាងនេះ។
លោក ស៊ុត សាវន សង្ឃឹមថាកម្មវិធីបំបួសព្រៃឈើ ដែលគ្រោងធ្វើឡើងនាពេលខាងមុខ អាចឲ្យប្រជាពលរដ្ឋ សាធារណជន ឬអ្នកកាប់ឈើ យល់ដឹងពីផលប៉ះពាល់ដែលកើតឡើង នៅពេលបាត់បង់ព្រៃឈើ និងជីវៈចម្រុះ ដូចជាការប្រែប្រួលអាកាសធាតុជាដើម។ ការបាត់បង់ព្រៃឈើ ក៏ប៉ះពាល់ដល់ប្រពៃណី និងជីវភាពរស់នៅប្រចាំថ្ងៃរបស់ជនជាតិដើមភាគតិច ដែលអាស្រ័យផលលើព្រៃឈើទាំងនោះ។
បើតាមអនុក្រឹត្យមួយរបស់រដ្ឋាភិបាល កាលថ្ងៃទី០៩ ខែឧសភា ឆ្នាំ២០១៦ ដែនជម្រកសត្វព្រៃព្រះរការស្ថិតនៅក្នុងភូមិសាស្រ្តក្នុងស្រុកបីនៃខេត្តព្រះវិហារ ដែលមានផ្ទៃដីទំហំ ៩០,៣៦១ហិកតា។ បើតាមអនុក្រឹត្យដដែលនេះ ការបង្កើតដែនជម្រកសត្វព្រៃព្រះរការ គឺដើម្បីធានាឲ្យមានការថែទាំទីជម្រកសត្វព្រៃ និងប្រព័ន្ធអេកូឡូស៊ី ផ្តល់ផលិតផល និងសេវាកម្មធម្មជាតិសម្រាប់ការប្រើប្រាស់ លើកកម្ពស់ការចូលរួមរបស់សហគមន៍មូលដ្ឋាន ក្នុងការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ