កម្ពុជាធ្លាក់ក្នុងបញ្ជីតាមដាន ក្រោយលំហសេរីភាពមានការធ្លាក់ចុះ
កម្ពុជាបានធ្លាក់ទៅក្នុងបញ្ជីនៃបណ្តាប្រទេសមួយចំនួន ដែលស្ថិតក្រោមការតាមដានពីបញ្ហាសិទ្ធិមនុស្ស និងលំហសេរីភាពរបស់ប្រជាពលរដ្ឋ។ នេះបើតាមសេចក្តីប្រកាសព័ត៌មានរបស់អង្គការសម្ព័ន្ធភាពសកលតាមដានសេរីភាពជាមូលដ្ឋាននៅទូទាំងពិភពលោក (CIVICUS)។ ការសម្រេចដាក់កម្ពុជាទៅក្នុងបញ្ជីតាមដាននេះ ធ្វើឡើងនៅពេលដែលស្ថាប័នសារព័ត៌មាន VOD ត្រូវបានរដ្ឋាភិបាលប្រកាសបិទជាស្ថាពរ កាលពីថ្ងៃទី១៣កុម្ភៈ។
ចុះផ្សាយនៅថ្ងៃ៖
ស្តាប់ - ០២:២៦
ការធ្លាក់ទៅក្នុងបញ្ជីតាមដានពេលនេះ ត្រូវបានអង្គការសម្ព័ន្ធភាពសកលតាមដានសេរីភាពជាមូលដ្ឋាននៅទូទាំងពិភពលោក លើកឡើងជាមូលដ្ឋានអំពី ការប្រើប្រាស់ច្បាប់គាបសង្កត់ ក្នុងការរឹតត្បិតសេរីភាពពលរដ្ឋ និងដាក់ទោសទណ្ឌលើអ្នកការពារសិទ្ធិមនុស្ស សហជីព សកម្មជនយុវជន អ្នកកាសែត អ្នកនយោបាយប្រឆាំង និងសំឡេងរិះគន់ផ្សេងៗ។ នេះបើតាមសេចក្តីប្រកាសព័ត៌មាន អង្គការសម្ព័ន្ធភាពសកលតាមដានសេរីភាពជាមូលដ្ឋាននៅទូទាំងពិភពលោក នៅថ្ងៃព្រហស្បតិ៍។
ទឡ្ហីករណ៍នៃព្រឹត្តការណ៍ដែលជាអំណះអំណាង មានជាអាទិ៍ ការចាប់ខ្លួនកញ្ញា ឈឹម ស៊ីថរ សហជីពតំណាងកម្មករតវ៉ាវិវាទក្រុមហ៊ុនណាហ្គាវើលដ៍, ការប្រើប្រាស់វិធានការកូវីដ១៩ ដើម្បីបង្រ្កាបអ្នកតវ៉ា, ការតម្កល់ទោសលើបុគ្គលិក និងអតីតបុគ្គលិកអង្គការអាដហុក, ការកំហិតឲ្យក្រុមបណ្តាអង្គការសង្គមស៊ីវិលដកចេញនូវចម្រៀង ឈាមបាតុករ ពីប្រព័ន្ធផ្សព្វផ្សាយ ជាដើម។ ល។ បើតាមសេចក្តីប្រកាសព័ត៌មាន គឺមានបណ្តាក្រុមសហជីព សកម្មជន កំពុងរងការធ្វើទុក្ខបុកម្នេញ ហើយហោចណាស់មានអ្នកទោសនយោបាយជាង៥០នាក់ កំពុងស្ថិតនៅក្រោយចម្រឹងដែក។
សម្រាប់អង្គការសម្ព័ន្ធភាពសកលតាមដានសេរីភាពជាមូលដ្ឋាននៅទូទាំងពិភពលោក នេះគឺជាក្តីបារម្ភចំពោះសិទ្ធិសេរីភាពពលរដ្ឋ នៅចំពោះមុខដែលកម្ពុជានឹងហៀបបោះឆ្នោតថ្នាក់ជាតិនៅខែកក្កដា។ ជាក្តីបារម្ភ ដោយសេចក្តីប្រកាសព័ត៌មានរបស់ CIVICUS បន្ថែមថា ការធ្វើទុក្ខបុកម្នេញទៅលើគណបក្សភ្លើងទៀន ដែលជាគណបក្សប្រឆាំងមានសំឡេងគាំទ្រជាថ្មី កំពុងកើតមានឡើង។
ជាការកត់សម្គាល់ ការចេញផ្សាយសេចក្តីប្រកាសរបស់ CIVICUS អំពីការដាក់កម្ពុជាស្ថិតក្នុងបញ្ជីតាមដានពេលនេះ គឺក្រោយពេលដែលរដ្ឋាភិបាលកម្ពុជាបានសម្រេចបិទជាស្ថាពរនូវស្ថាប័នសារព័ត៌មាន មានវ័យ២០ឆ្នាំ សំឡេងប្រជាធិបតេយ្យ (VOD)។ ជាការបិទដែលប្រមុខរដ្ឋាភិបាលកម្ពុជា លើកឡើងថា បានផ្សាយព័ត៌មានមិនត្រឹមត្រូវ និងប៉ះពាល់កត្តិយសយ៉ាងធ្ងន់ធ្ងរដល់រដ្ឋាភិបាល។
បញ្ហានេះ ត្រូវបានរំលេចឡើងដែរ នៅក្នុងសេចក្តីប្រកាសរបស់ CIVICUS។ អង្គការសម្ព័ន្ធភាពសកលតាមដានសេរីភាពជាមូលដ្ឋាននៅទូទាំងពិភពលោក បានអះអាងថា សេរីភាពសារព័ត៌មានកម្ពុជា នៅតែស្ថិតនាចំណុចមាត់ជ្រោះ ដ្បិតស្ថានីយវិទ្យុ និងសារព័ត៌មានមួយចំនួនត្រូវបិទទ្វារ ដែលធ្វើឲ្យវិស័យសារព័ត៌មានឯករាជ្យបានបាត់បង់។
ក៏ប៉ុន្តែសម្រាប់រដ្ឋាភិបាល នេះគឺដោយសារតែសារព័ត៌មាននេះ បានប្រព្រឹត្តខុសវិជ្ជាជីវៈ និងច្បាប់កម្ពុជា។ ដោយឡែក ករណីចុងក្រោយលើសារព័ត៌មាន VOD លោកនាយករដ្ឋមន្ត្រី ហ៊ុន សែន បានបញ្ជាក់ថា នឹងមិនប៉ះពាល់ដល់សិទ្ធិសេរីភាពសារព័ត៌មានឡើយ តែជាការពង្រឹងក្រមវិជ្ជាជីវៈវិស័យមួយនេះ ឲ្យកាន់តែប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ