ដីព្រៃលិចទឹកក្នុងបឹងទន្លេសាប៖ រដ្ឋបានផ្តល់ដីជាង២ម៉ឺនហិកតា ជូនពលរដ្ឋជាង១ម៉ឺនគ្រួសារក្នុងខេត្តទាំង៦
គិតមកត្រឹមចុងឆ្នាំ២០២២ ក្រោយការអនុវត្តនូវវិធានការបង្ក្រាបការទន្ទ្រានដីរដ្ឋក្នុងដែនព្រៃលិចទឹកនៃបឹងទន្លេសាប រដ្ឋាភិបាលបានសម្រេចកែសម្រួលព្រំប្រទល់តំបន់២ និងតំបន់៣ នៃបឹងទន្លេសាបដែលជាប់ខេត្តចំនួន៥ បានចំនួនសរុបទំហំជាង ២៤,៩៤០ហិកតា ជូនពលរដ្ឋចំនួនជាង១ម៉ឺន៥ពាន់គ្រួសារ។ នេះបើតាមរបាយការណ៍ប្រចាំឆ្នាំរបស់ក្រសួងដែនដី នគរូបនីយកម្មនឹងសំណង់។ តាមរបាយការណ៍នោះ ទំហំដែលរដ្ឋបានកែសម្រួលជាង២ម៉ឺនហិកតានោះ រដ្ឋបានផ្តល់ជាកម្មសិទ្ធិលើផ្ទៃដីទំហំជាង១ម៉ឺន១ពាន់ហិកតា ដល់ពលរដ្ឋជាង១ម៉ឺន២ពាន់គ្រួសារ និងផ្ទៃដីទំហំជាង១ម៉ឺន៣ពាន់ហិកតា ប្រគល់ជូនពលរដ្ឋជាង៥ពាន់គ្រួសារ សម្រាប់កាន់កាប់ និងអាស្រ័យផល។
ចុះផ្សាយនៅថ្ងៃ៖
ស្តាប់ - ០៣:១៦
ក្នុងរបាយការណ៍បូកសរុបលទ្ធផលប្រចាំឆ្នាំរបស់ក្រសួងដែនដី គឺថា រដ្ឋាភិបាលបានសម្រេចកាត់ឆ្កៀលផ្ទៃដីទំហំ២៥៣ហិកតាចេញពីតំបន់៣ ក្នុងខេត្តកំពង់ឆ្នាំង ដើម្បីផ្តល់ជាកម្មសិទ្ធិជូនពលរដ្ឋចំនួនជាង១ពាន់គ្រួសារ និងកែសម្រួលផ្ទៃដីទំហំជាង ៣, ៣៩១ហិកតា ចេញពីតំបន់៣ បញ្ចូលមកក្នុងតំបន់២ និងបានផ្តល់សិទ្ធិអាស្រ័យផលដល់ពលរដ្ឋជាង១, ៦៨៨គ្រួសារ។
ដោយឡែក ក្នុងខេត្តពោធិ៍សាត់វិញ រដ្ឋបានកែសម្រួលផ្ទៃដីទំហំជាង៣, ៤៤៨ហិកតា ៧៧អា ចេញពីតំបន់៣ បញ្ចូលមកក្នុង តំបន់២ និងផ្តល់ជាសិទ្ធិប្រើប្រាស់និងអាស្រ័យផលជូនប្រជាពលរដ្ឋចំនួន១, ៦៥៨គ្រួសារ។
ក្នុងរបាយការណ៍នោះបានបង្ហាញទៀតថា រដ្ឋក៏បានកែសម្រួលផ្ទៃដីទំហំ១០, ០១៤ហិកតា ក្នុងខេត្តកំពង់ធំ ចេញពីតំបន់២ បញ្ចូលមកក្នុងតំបន់១ ដោយផ្តល់កម្មសិទ្ធិជូនពលរដ្ឋចំនួន៩, ១៤៤គ្រួសារ និងបានកែសម្រួលផ្ទៃដីទំហំ៦, ៣៨៥ហិកតា ស្មើនឹង២, ០២៥ក្បាលដី ចេញពីតំបន់៣ បញ្ចូលមកក្នុងតំបន់២ និងផ្ដល់សិទ្ធិកាន់កាប់អាស្រ័យផលដល់ពលរដ្ឋចំនួន ១, ៧៤៩គ្រួសារ។
ចំណែក ខេត្តបាត់ដំបង ផ្ទៃដីទំហំ៤០២ហិកតា រដ្ឋាភិបាលបានដកចេញពីតំបន់៣ បញ្ចូលមកក្នុងតំបន់២ និងប្រគល់ឱ្យពលរដ្ឋអាស្រ័យផលចំនួន១៩១គ្រួសារ និងបានកែសម្រួលផ្ទៃដីទំហំ៩៨៧ហិកតា ចេញពី តំបន់២ បញ្ចូលមកក្នុងតំបន់១ និងផ្តល់ជាកម្មសិទ្ធិជូនពលរដ្ឋចំនួន១, ២០៩គ្រួសារ។
ហើយចុងក្រោយ គឺ ខេត្តបន្ទាយមានជ័យ រដ្ឋបានកែសម្រួលផ្ទៃដីទំហំ៥៨ហិកតា ចេញពីតំបន់៣ បញ្ចូលមកក្នុងតំបន់២ និងផ្តល់ជូនជាសិទ្ធិប្រើប្រាស់និងអាស្រ័យជូនពលរដ្ឋចំនួន២២គ្រួសារ។ ខណៈ ខេត្តសៀមរាបវិញ មិនមានរបាយការណ៍ណាបញ្ជាក់នៅឡើយ។
កាលពីដើមខែមករា ឆ្នាំ២០២២ រដ្ឋាភិបាលបានដកហូតដីព្រៃលិចទឹកប្រមាណ៦ម៉ឺនហិកតានៅជុំវិញបឹងទន្លេសាបមកទុកជាសម្បត្តិរបស់រដ្ឋវិញ ក្រោយពីចុះប្រតិបត្តិការទប់ស្កាត់បទល្មើសព្រៃលិចទឹកតាមបណ្តាខេត្តទាំង៦រួចមក។ ករណីបង្ក្រាប និងដកហូតនេះបានកើតមានឡើង បន្ទាប់ពីប្រធានរាជបណ្ឌិត្យសភាកម្ពុជា លោក សុខ ទូច រកឃើញថា ដីព្រៃលិចទឹកក្នុងបឹងទន្លេសាបរាប់ពាន់ហិកតាត្រូវបានរំលោភបំពានដោយខុសច្បាប់កាលពីអំឡុងឆ្នាំ២០២១ ខណៈលោកថា ក្នុងខេត្តកំពង់ធំតែមួយ ករណីកាន់កាប់ដីព្រៃលិចខុសច្បាប់មានចំនួនជាង១០ម៉ឺនហិកតា។
ដោយឡែក កាលពីថ្ងៃទី៣ ខែធ្នូនេះ រដ្ឋាភិបាលបានប្រគល់ភារកិច្ចឱ្យអង្គភាពប្រឆាំងអំពើពុករលួយ ធ្វើការស៊ើបអង្កេតស្រាវជ្រាវ និងចាត់វិធានការច្បាប់ចំពោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន និងដកហូតដីជាង២ ០០០ហិកតាទុកជាសម្បត្តិរដ្ឋវិញ រួមទាំងមន្ត្រីដែលពាក់ព័ន្ធផ្សេងទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ