កសិកររអ៊ូរថា បាត់ទីផ្សារផ្គត់ផ្គង់ ក្រោយបន្លែនាំចូលពីប្រទេសជិតខាងហូរចូលដូចទឹក
កសិករក្នុងស្រុករអ៊ូរថា លំហូរនាំចូលបន្លែពីប្រទេសជិតខាងយ៉ាងគំហុក បានបង្កជាការរាំងស្ទះដល់ទីផ្សារដាំដុះ និងផ្គត់ផ្គង់បន្លែដែលផលិតដោយកសិករក្នុងស្រុក ខណៈតម្លៃលក់វិញ នៅមិនទាន់អាចប្រកួតប្រជែងជាមួយបន្លែក្រៅប្រទេសដែលកំពុងបន្តនាំចូលមកប្រទេសកម្ពុជាឡើយ។ សម្រាប់កសិករ បើរដ្ឋាភិបាលមិនទប់ស្កាត់ការនាំចូលបន្លែពីក្រៅប្រទេសឱ្យស្ថិតក្នុងបរិមាណតិចតូចជាងនេះទេ នោះចង់មិនចង់កសិករដាំដុះបន្លែក្នុងស្រុក នឹងបន្តប្រឈមបញ្ហាបាត់បង់ទីផ្សារផ្គត់ផ្គង់ ឬអាចឈានដល់ការបោះបង់ដីធ្វើកសិកម្មដាំដុះបន្លែថែមទៀត។
ចុះផ្សាយនៅថ្ងៃ៖
ស្តាប់ - ០២:៥៧
លោក អូន រ៉ូបាំង ម្ចាស់ចំការដាំបន្លែក្នុងស្រុកសំឡូត ខេត្តបាត់ដំបងបានសង្កេតឃើញថា ក្នុងមួយថ្ងៃៗ បន្លែនាំចូលពីប្រទេសជិតខាងរួមមាន ប្រទេសថៃ វៀតណាម និងចិន គឺបរិមាណនាំចូលរាប់រយតោន។ លោកថា ភាគច្រើននៅតាមទីផ្សារលក់បន្លែមិនសូវមានឡើយ បន្លែដែលដាំដុះនៅស្រុក ពីព្រោះបន្លែនាំចូលពីក្រៅប្រទេស បានវាយលុកស្ទើតែគ្រប់ច្រកល្ហកទាំងអស់។
តួយ៉ាង បន្លែស្ពៃក្តោប ត្រសក់ ត្រឡាច សាឡាត់ និងបន្លែជាច្រើនប្រភេទទៀត កំពុងប្រឈមនឹងការបាត់បង់ទីផ្សារផ្គត់ផ្កង់ ខណៈតម្លៃវិញ កសិករលក់បានថោក ឬលក់នៅក្រោមទីផ្សារខ្លាំង។ នេះបើតាមលោក អូន រ៉ូបាំង។
ម្ចាស់ចំការដាំបន្លែរូបនេះបានប្រាប់វិទ្យុបារាំងអន្តរជាតិRFIថា ស្ពៃក្តោបភាគច្រើននាំចូលមកពីវៀតណាម និងចិន ហើយតម្លៃបោះដុំបានថោកជាងស្ពៃក្តោបដែលនាំចូលពីក្រៅប្រទេស បើទោះបីស្ពៃក្តោបបច្ចុប្បន្នបានហក់តម្លៃបានខ្លះមកវិញបន្តិច ដោយពីមុន១គីឡូ ៦០០រៀល បច្ចុប្បន្នឡើងបាន១៣០០រៀល។
តែយ៉ាងណាស្ថានភាពបច្ចុប្បន្ន ត្រសក់បែរជាធ្លាក់ថ្លៃទៅវិញ ដោយ១០គីឡូលក់បានត្រឹមតែ៣០០០រៀលប៉ុណ្ណោះ។ ជាការបញ្ជាក់បន្ថែមទៀត លោក រ៉ូ បាំងថា បញ្ហាធ្លាក់ថ្លៃ និងខ្វះទីផ្សារនេះកើតចេញពីការនាំចូលបន្លែពីក្រៅប្រទេសលើសលុប ត្បិតពលរដ្ឋក្នុងស្រុកមិនសូវបរិភោគបន្លែធម្មជាតិដែលផលិតក្នុងស្រុក។ បើតាម លោក រ៉ូបាំង កសិករដាំដុះបន្លែភាគច្រើនក្នុងស្រុកសំឡូតបានបោះបង់មុខរបរកសិកម្មខ្លួន ហើយងាកទៅចាប់យករបរថ្មីដែលខុសស្រឡះពីវិស័យកសិកម្ម ខណៈកសិករខ្លះចំណាកស្រុកទៅធ្វើការនៅឯក្រៅប្រទេសវិញ បន្ទាប់ពីខាតបង់ច្រើនពីការដាំដុះបន្លែ។
ជុំវិញរឿងដែរ ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍន៍ និងសន្តិភាព លោក យង់ គីមអេង សង្កេតឃើញថា បន្លែនាំចូលពីក្រៅប្រទេស គឺមានតម្លៃថោកជាង បន្លែក្នុងស្រុក។ ថោកជាង ដោយសារបន្លែនាំចូលចំណាយថ្លៃដើមតិច កម្លាំងពលកម្មតិច និង ដាំដុះមានរយៈពេលខ្លី។ ម្ល៉ោះហើយលោក ថា រដ្ឋាភិបាលគួរតែរកមធ្យោបាយដោះស្រាយរឿងនេះ ដើម្បីជួយកសិករឱ្យមានជីវភាពធូរធា និងជៀសវាងពីការបោះបង់មុខរបរធ្វើកសិកម្មនេះ។
សូមជម្រាបថា កាលពីចុងឆ្នាំ ២០២២ របាយការណ៍របស់ក្រសួងកសិកម្មបានបង្ហាញថា កម្ពុជាបាននាំចូលបន្លែពីប្រទេសជិតខាងប្រមាណជិត២ ពាន់ ៥រយតោន ក្នុង១ ថ្ងៃ។ បើតាមក្រសួងកសិកម្ម ការនាំបន្លែពីក្រៅប្រទេសច្រើនបែបនេះ ដោយសារកម្ពុជា កាដាំដុះក្នុងស្រុកនៅជួបបញ្ហាបច្ចេកទេសដាំដុះ សម្ភារកសិកម្មថ្លៃ និងគ្រោះធម្មជាតិ ទើបវិស័យឯកជនបាននាំចូលបន្លែពីក្រៅស្រុកបន្ថែម ដើម្បីមកបំពេញតម្រូវការ។
ខណៈ បច្ចុប្បន្ននេះ កម្ពុជា បានផលិតដំណាំបន្លែមានចំនួន ២, ៤៨៩ តោន ក្នុង ១ ថ្ងៃ ឬស្មើនឹង ៧៣%។ ចំណែកតម្រូវការបន្លែសរុបក្នុងស្រុកមានចំនួន ៣, ៣៨៩ តោន ក្នុង ១ ថ្ងៃ ដែលធ្វើឲ្យប្រទេសកម្ពុជាត្រូវនាំចូលបន្លែពីក្រៅប្រទេសចំនួនជាង ៩០០ តោន ក្នុង ១ ថ្ងៃ ឬស្មើនឹង ២៧%។ ហើយ ភាគច្រើនបន្លែដែលប្រទេសកម្ពុជានាំចូល គឺបន្លែដែលដាំដុះខែត្រជាក់ដូចជា ការ៉ុត ដំឡូងបារាំង ស្ពៃបូកគោ និងខ្ទឹមបារាំង និងបន្លែគ្រប់មុខជាច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ