លោក យ៉េង វីរៈ អះអាងថាមិនចាកចេញពីគណបក្សប្រជាធិបតេយ្យមូលដ្ឋាន
លោក យ៉េង វីរៈ អះអាងប្រាប់អ្នកគាំទ្រថាលោកនឹងមិនចាកចេញទៅណាចោលគណបក្សប្រជាធិបតេយ្យមូលដ្ឋាននោះទេ។ ការចេញមុខអះអាងនេះធ្វើឡើងភ្លាមៗ បន្ទាប់ពីលោកបណ្ឌិត សាម អ៊ីន ប្រធានស្តីទីគណៈកម្មាធិការនាយកគណបក្សនេះ បានចាកចេញទៅចូលរួមជាមួយគណបក្សប្រជាជនកម្ពុជា លំនាំដូចគ្នា នឹងលោកបណ្ឌិត យ៉ង សាំងកុមារ។ សម្រាប់ លោក យ៉េង វីរៈ ដែលជាប្រធានគណបក្សនៅចាំផ្ទះ មិនមែនលោកមិនខកចិត្តនឹងការបន្តចាកចេញរបស់ស្ថាបនិកទាំងនោះទេ តែលោកមិនថ្កោលទោស ឬហាមឃាត់សិទ្ធិសេរីភាពរបស់អ្នកនយោបាយឡើយ។
ចុះផ្សាយនៅថ្ងៃ៖
ស្តាប់ - ០១:៣៧
ដោយអះអាងថា គណបក្សប្រជាធិបតេយ្យមូលដ្ឋាន ជាគណបក្សអហិង្សា លោក យ៉េង វីរៈ ប្រធានគណបក្សនៅចាំផ្ទះ មិនថ្កោលទោសឬ ហាមឃាត់សិទ្ធិសេរីភាពរបស់អ្នកនយោបាយឡើយ ដោយថាគណបក្សនេះគោរពសិទ្ធិមនុស្ស និងសិទ្ធបុគ្គលក្នុងការធ្វើនយោបាយ។
ទោះជាយ៉ាងណានេះ មិនមែនបានន័យថាលោក យ៉េង វីរៈ មិនចែករំលែកការខកចិត្តនិងសោកស្តាយ ចំពោះការបាត់បង់សមាជិករបស់គណបក្សនេះទេ។ តែធានាចំពោះសមាជិក និងអ្នកគាំទ្រថាលោកមិនចាកចេញទៅណានោះទេ។
នៅគ្រាដែលស្ថាបនិកប្រកៀកស្មាបន្តដើរចេញ លោក យ៉េង វីរៈ គូសបញ្ជាក់ថា លោកត្រូវខិតខំ ប្រឹងប្រែងទ្វេដង ក្នុងតួនាទីជាប្រធានគណបក្ស ដើម្បីសម្រេចគោលបំណង និងគោលនយោបាយ គឺស្តារឡើងវិញនូវគោលការណ៍ប្រជាធិបតេយ្យនៅកម្ពុជា ចាប់ផ្តើមពីការបង្កើតសំឡេងនៅតាមថ្នាក់ឃុំ-សង្កាត់ និងត្រៀមចូលរួមការបោះឆ្នោតសភាជាតិនៅខែកក្កដា។
ក្នុងការបោះឆ្នោតឃុំ សង្កាត់ កាលពីថ្ងៃទី ៥ ខែមិថុនា២០២២ គណបក្សប្រជាធិបតេយ្យមូលដ្ឋានទទួលបាន៦អាសនៈក្រុមប្រឹក្សា គឺកើនមួយអាសនៈធៀបនឹងឆ្នាំ២០១៧។
សូមបញ្ជាក់ថា លោកបណ្ឌិត សាម អ៊ីន ដែលទៅចូលរួមធ្វើនយោបាយជាមួយគណបក្សប្រជាជនកម្ពុជា ត្រូវបានលោក ហ៊ុន សែន ស្នើតែងតាំង ជារដ្ឋលេខាធិការនៅក្រសួងបរិស្ថាន។ លោក សាម អ៊ីន ទើបឡើងជាប្រធានស្តីទីគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន កាលពីចុងឆ្នាំ២០២២ ជំនួសលោកបណ្ឌិត យ៉ង់ សាំងកុមារ ដែលទៅចូលរួមនយោបាយជាមួយគណបក្សប្រជាជនកម្ពុជា និងកំពុងកាន់តំណែងរដ្ឋលេខាធិការនៅក្រសួងកសិកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ