លោក ហ៊ុន សែន ជំរុញឲ្យប្រើផលិតផលខ្មែរដើម្បីបង្កើតការងារជូនពលរដ្ឋខ្មែរ
ប្រមុខរដ្ឋាភិបាលកម្ពុជា ជំរុញឲ្យរួមគ្នាប្រើប្រាស់ផលិតខ្មែរ ដើម្បីជួយបង្កើតការងារដល់ពលរដ្ឋខ្មែរ ខណៈដែលពលរដ្ឋខ្មែរមួយចំនួនបានត្អូញត្អែរពីការខ្វះទីផ្សារ និងការធ្លាក់ចុះតម្លៃ នៅពេលខ្មែរផលិតកសិផលបាន។ ការជំរុញរបស់លោក ហ៊ុន សែន គឺធ្វើឡើងនៅសារលិខិតអបអរទិវាជាតិលើកកម្ពស់ការប្រើប្រាស់ផលិតផលខ្មែរលើកទី៦ឆ្នាំ២០២៣ ដែលត្រូវរៀបចំនៅថ្ងៃទី៩ដល់១៣មេសាខាងមុខនៅខេត្តស្វាយរៀង។
ចុះផ្សាយនៅថ្ងៃ៖
ស្តាប់ - ០២:០៧
ក្នុងសារលិខិត៣ទំព័រលោកនាយករដ្ឋមន្ត្រី ហ៊ុន សែន បានគូសបញ្ជាក់ថា ក្នុងបរិបទនៃការអភិវឌ្ឍន៍ប្រទេសឈានទៅសម្រេចគោលដៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ កម្ពជាក្លាយទៅជាប្រទេសផលិតផលិតផលសម្រាប់ខ្លួនឯងផង និងសម្រាប់នាំចេញផង។ រដ្ឋាភិបាលត្រូវកសាងមូលរដ្ឋានចាំបាច់បន្ថែមទៀត ទាំងហេដ្ឋារចនាម្ព័ន្ធ ទាំងធនធានមនុស្ស និងបច្ចេកទេសដើម្បីគាំទ្រដល់ការអភិវឌ្ឍន៍ក្នុងសម័យសកលភាវូបនីយកម្ម។
ក្នុងឱកាសនៃការប្រារព្ធទិវាជាតិលើកកម្ពស់ការប្រើប្រាស់ផលិតផលខ្មែរលើកទី៦ឆ្នាំ២០២៣ ដែលត្រូវរៀបចំនៅខេត្តស្វាយរៀងនោះ លោក ហ៊ុន សែន អំពាវនាវឲ្យភាគីពាក់ព័ន្ធជំរុញការផលិត ការកែច្នៃ ឲ្យអស់លទ្ធភាពនូវធនធានដែលមាននៅមូលដ្ឋាន ព្រមទាំងស្វែងរកទីផ្សារជូនផលិតករឲ្យបានទូលំទូលាយ។
នៅពេលថ្មីៗនេះ កសិករខ្មែរមួយចំនួនរអ៊ូរថា លំហូរនាំចូលបន្លែពីប្រទេសជិតខាងយ៉ាងគំហុក បានបង្កជាការរាំងស្ទះដល់ទីផ្សារដាំដុះ និងផ្គត់ផ្គង់បន្លែដែលផលិតដោយកសិករក្នុងស្រុក ខណៈតម្លៃលក់វិញ នៅមិនទាន់អាចប្រកួតប្រជែងជាមួយបន្លែក្រៅប្រទេសដែលកំពុងបន្តនាំចូលមកប្រទេសកម្ពុជាឡើយ។ សម្រាប់កសិករ បើរដ្ឋាភិបាលមិនទប់ស្កាត់ការនាំចូលបន្លែពីក្រៅប្រទេសឱ្យស្ថិតក្នុងបរិមាណតិចតូចជាងនេះទេ នោះចង់មិនចង់កសិករដាំដុះបន្លែក្នុងស្រុក នឹងបន្តប្រឈមបញ្ហាបាត់បង់ទីផ្សារផ្គត់ផ្គង់ ឬអាចឈានដល់ការបោះបង់ដីធ្វើកសិកម្មដាំដុះបន្លែថែមទៀត។
លោក ឌិត ទីណា រដ្ឋមន្ត្រីក្រសួងកសិកម្ម កាលពីដើមឆ្នាំនេះ បានអះអាងថា ក្រសួងនឹងពង្រឹងលើគុណភាពនៃការផលិតលើផ្នែកកសិកម្មឱ្យបានល្អ និងអាចនាំចេញទៅទីផ្សារក្រៅប្រទេសបានក្នុងតម្លៃខ្ពស់ ព្រោះនេះជាចំណុចខ្លាំងរបស់វិស័យកសិកម្មកម្ពុជា។
សូមជម្រាបថា ការនាំចេញទំនិញស្រូវ-អង្ករ និងកសិផលផ្សេងទៀតរបស់កម្ពុជាក្នុងរយៈពេល១១ខែឆ្នាំ២០២២ មានទំហំទឹកប្រាក់ប្រមាណ៣,៣៦២លានដុល្លារ។ ក្នុងនោះ ចំណូលពីការនាំចេញអង្ករ-ស្រូវ មានចំនួនជិត៦០០លានដុល្លារ និងចំណូលបានមកពីការនាំចេញកសិផលក្រៅពីស្រូវអង្ករ មានចំនួនជាង ២០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ