គ.ជ.ប ជួបជាមួយក្រសួងមហាផ្ទៃ និងក្រសួងការពារជាតិ ដើម្បីត្រៀមកម្លាំងការពារសន្តិសុខសម្រាប់ការបោះឆ្នោតថ្នាក់ជាតិ
គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី០៦ ខែមេសានេះ បានជួបពិភាក្សាជាមួយក្រសួងមហាផ្ទៃ និងក្រសួងការពារជាតិ ដើម្បីត្រៀមកម្លាំងការពារសន្តិសុខសម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ នៅខែកក្កដាខាងមុខនេះ។ សម្រាប់កម្លាំងការពារសន្តិសុខសណ្ដាប់ធ្នាប់ការបោះឆ្នោតនេះ បើតាមលោក ខៀវ សុភ័គ អ្នកនាំពាក្យក្រសួងមហាផ្ទៃ អាចប្រើប្រាស់ទាហាន ទាំងទាហានជើងទឹក និងជើងអាកាស រួមទាំងប៉ូលីស នគរបាល និងសមត្ថកិច្ចដែលពាក់ព័ន្ធផងដែរ។
ចុះផ្សាយនៅថ្ងៃ៖
ស្តាប់ - ០១:៥១
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានបញ្ជាក់ប្រាប់វិទ្យុបារាំង RFI ថាជំនួបរវាង គ.ជ.ប ជាមួយក្រសួងមហាផ្ទៃ និងក្រសួងការពារជាតិ រួមទាំងភាគីពាក់ព័ន្ធនៅថ្ងៃព្រហស្បតិ៍នេះ គឺផ្ដោតសំខាន់ទៅលើការត្រៀមកម្លាំងដើម្បីការពារសន្តិសុខសម្រាប់ការបោះឆ្នោតថ្នាក់ជាតិ។ បើតាមលោក ហង្ស ពុទ្ធា វាពិតជាមានសារសំខាន់ណាស់ដែលស្ថាប័នពាក់ព័ន្ធត្រូវមានកិច្ចសហការគ្នា ដើម្បីត្រៀមការពារសន្តិសុខសណ្ដាប់ធ្នាប់សម្រាប់បោះឆ្នោតនេះ។
អ្នកនាំពាក្យ គ.ជ.ប បានអះអាងថា គ.ជ.ប តែងតែជួបជាមួយភាគីពាក់ព័ន្ធប្រមាណជាង ៣០ស្ថាប័ន រួមទាំងគណបក្ស និងអង្គការមិនមែនរដ្ឋាភិបាលផងដែរ ដើម្បីជជែកគ្នា និងលើកជាសំណួរ និងផ្ដល់យោបល់ជុំវិញនៃដំណើរការរៀបចំការបោះឆ្នោតនេះ។
ទាក់ទិនទៅនឹងការប្រើប្រាស់កងកម្លាំងសន្តិសុខការពារសណ្ដាប់ធ្នាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ នៅខែកក្កដាខាងមុខនេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា កម្លាំងមានប៉ុន្មាន គឺត្រូវប្រើទាំងអស់ ដូចជាទាហាន ទាំងទាហានជើងទឹក និងជើងអាកាស រួមទាំងសន្តិសុខ ប៉ូលីស និងនគរបាលជាដើម។ ករណីប្រើប្រាស់ទាហានជើងទឹក លោក ខៀវ សុភ័គ បានលើកឡើងថា ការិយាល័យកន្លែងបោះឆ្នោតខ្លះនៅលើដីកោះ ត្រូវឆ្លងទឹក ដូច្នេះត្រូវប្រើប្រាស់ទាហានជើងទឹក ដើម្បីដឹកសម្ភារៈសម្រាប់ការបោះឆ្នោត។
ជាការកត់សម្គាល់ការបោះឆ្នោតជ្រើសតាំងតំណាងរាស្រ្ត នៅអាណត្តិទី៦ រដ្ឋាភិបាលបានប្រើប្រាស់កងកម្លាំងប្រមាណ៨ម៉ឺននាក់ ដើម្បីចូលរួមការពារសន្តិសុខ និងសណ្តាប់ធ្នាប់។ ចំណែកការបោះឆ្នោតឃុំសង្កាត់ឆ្នាំ២០២២កន្លងទៅ ការប្រើប្រាស់កងកម្លាំងដើម្បីការពារសន្តិសុខ និងសណ្តាប់ធ្នាប់ ជួបនូវការខ្វះខាត រហូតមានការបន្ថែមកងសន្តិសុខ និងប្រជាការពារភូមិឲ្យមកជាការពារផងដែរ។
សូមបញ្ជាក់ថា ការបោះឆ្នោតជ្រើសតាំងតំណាងរាស្រ្ត នៅអាណត្តិទី៧ នឹងប្រព្រឹត្តធ្វើនៅថ្ងៃទី២៣ ខែកក្កដា ឆ្នាំ២០២៣នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ