លោក ហ៊ុន សែន ថាអ្នកប្រឆាំងនឹងយករឿងលោកស្រី តាំង ហ្គេចលៀង វាយប្រហារមន្ត្រីរដ្ឋាភិបាលបើកុំតែសុំទោសទាន់ពេល
សង្គ្រាមពាក្យសម្តីរវាងអ្នកមាន និងអ្នកក្រ ដែលបង្កឡើងដោយលោកស្រី តាំង ហ្គេចលៀង ប្រធានក្រុមហ៊ុន HL Group ទំនងរាលដាលទៅដល់នយោបាយ ដែលកម្ពុជាពេលនេះកំពុងធ្វើដំណើរទៅរកការបោះឆ្នោតជ្រើសតាំងតំណាងរាស្ត្រនីតិកាលទី៧នៅខែកក្កដាខាងមុខ។ តាមរយៈសារទី២ ពាក់ព័ន្ធនឹងការនិយាយប៉ះពាល់អ្នកក្រដែលថាជាគីឡូស្រាលមិនអាចតទល់នឹងអ្នកស្រីបាននោះ លោកនាយករដ្ឋមន្ត្រី ហ៊ុន សែន ថាការចេញមកសុំទោសរបស់លោកស្រី តាំង ហ្គេចលៀង គឺជាការល្អ និងទាន់ពេល បើពុំដូច្នោះទេ ក្រុមប្រឆាំងនឹងយករឿងនេះទៅវាយប្រហារមន្ត្រីរដ្ឋាភិបាលរបស់លោក។ ញឹម សុផល៖
ចុះផ្សាយនៅថ្ងៃ៖
ស្តាប់ - ០២:៣០
តាមរយៈសារជាសម្លេងលើកទី២ រយៈពេលជាង១១នាទី លោកនាយករដ្ឋមន្ត្រី ហ៊ុន សែន បានរំលេចថា ការសុំទោសរបស់លោកស្រី តាំង ហ្គេចលៀង ប្រធានក្រុមហ៊ុន HL Group គឺជាការត្រឹមត្រូវ និងទាន់ពេលវេលា បើមិនដូច្នោះទេពួកក្រុមអគតិនឹងប្រើប្រាស់បញ្ហានេះ ដើម្បីវាយប្រហារទៅលើថ្នាក់ដឹកនាំរាជរដ្ឋាភិបាលថាមិនយកចិត្តទុកដាក់ការពារប្រជាពលរដ្ឋ។
ការលើកឡើងរបស់លោក ហ៊ុន សែន ដូច្នេះ បន្ទាប់ពីសម្លេងលោកស្រី តាំង ហ្គេចលៀង ដែលមហាជនគិតថាជាអ្នកមាន និងជាគ្រូបង្រៀនផ្នែកជោគជ័យនោះ បានបែកធ្លាយជាថ្មី ដោយលោកស្រីនិយាយថាការថ្លែងប៉ះពាល់អ្នកក្រកាលពីលើកទី១ ហើយមានប្រតិកម្មពីអ្នកក្រនោះ ថាជារឿងកំប៉ិកកំប៉ុកឥតបានការ ហើយថាអ្នកប្រតិកម្មនឹងសំដីលោកស្រី ដែលជាប្រជាពលរដ្ឋធម្មតាគឺគីឡូស្រាលពេក ជេរលោកស្រីមិនឈឺទេ។
ចំណុចនេះហើយ ដែលធ្វើឲ្យមហាជនជាពិសេសពលរដ្ឋអ្នកក្រ ផ្ទុះប្រតិកម្មជាលើកទី២ ដែលចាំបាច់តម្រូវឲ្យលោកស្រី តាំង ហ្គេចលៀង ដែលធ្លាប់មានអំនួតនោះចេញមកសុំទោសជាសាធារណៈតាមរយៈឃ្លីបវីដេអូខ្លីមួយបង្ហោះតាមបណ្តាញសង្គម ដោយព្រមទទួលខុសនូវកំហុសដែលលោកស្រីបាននិយាយចេញកន្លងទៅប៉ះពាល់ដល់មហាជន និងស្នើសុំឱកាសសាងគុណសម្បត្តិដើម្បីលុបលាងកំហុស។
ដោយឡែកលោកនាយករដ្ឋមន្ត្រី ហ៊ុន សែន ក៏បានបញ្ជាក់ដែរថាលោកសោកស្តាយ និងក៏មិនអាចទទួលយកបាន ក៏ប៉ុន្តែលោកយល់ព្រមអភ័យចំពោះការសុំទោស ព្រមទាំងប្រាក់ឲ្យសមាជិក សមាជិការគណបក្សប្រជាជនទទួលយកផងដែរ។ ជាមួយគ្នានេះ លោកស្នើឲ្យលោកស្រី តាំង ហ្គេចលៀង ឈប់បញ្ចេញយោបល់រឿងអ្នកមាន-អ្នកក្រ គីឡូធ្ងន់-គីឡូស្រាល ឬប្រជាជនធម្មតាគ្មានទំងន់ និងស្នើឲ្យមហាជនបញ្ចប់រឿងនេះ និងបញ្ឈប់ការវាយប្រហារគ្នាតាមបណ្តាញសង្គម ខណៈលោកបញ្ជាក់ថាពួកប្រឆាំងធ្វើអ្វីស្រេចតែគេទៅចុះ។
សូមលឹកថាកាលពីសប្តាហ៍មុន លោកស្រី តាំង ហ្គេចលៀង បានរងប្រតិកម្មពីមហាជនម្តងហើយ ក្រោយលោកស្រីប្រើពាក្យថាអ្នកមានគេគិតទៅមុខ អ្នកក្រចូលចិត្តដ្រាម៉ា គិតតែអតីតកាល អ្នកមានចេះស្រលាញ់គ្រួសារ រួមនឹងសារប៉ះពាល់ផ្លូវចិត្តអ្នកក្រមួយចំនួនទៀត។
អ្នកតាមដានបញ្ហាសង្គមមួយចំនួន បានមើលឃើញថាបញ្ហានេះ ទំនងមិនអាចបញ្ចប់ទៅវិញដោយងាយៗនោះទេ ឬក៏អាចបញ្ចប់ទៅវិញតែរូបភាពខាងក្រៅ តែពុះងំនៅខាងក្នុងអារម្មណ៍អ្នកក្រ ខណៈសមាជិកក្រុមប្រឆាំងមួយចំនួនបានលើកបញ្ហានេះ ទៅឌឺដងតាមបណ្តាញសង្គមបែបរប៉េះរប៉ោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ