លោក ហ៊ុន សែន ជំរុញឲ្យប្រើផ្លូវច្បាប់លើអ្នកញុះញង់មិនឲ្យពលរដ្ឋសងបំណុលធនាគារ និងមីក្រូហិរញ្ញវត្ថុ
លោកនាយករដ្ឋមន្ត្រី ហ៊ុន សែន បានជំរុញឲ្យស្ថាប័នធនាគារ និងមីក្រូហិរញ្ញវត្ថុ ប្រើប្រាស់នូវវិធានការច្បាប់ ចំពោះបុគ្គលដែលញុះញង់ ឬឃោសនាមិនឲ្យប្រជាពលរដ្ឋសងបំណុលត្រលប់មកវិញ។ ការជំរុញនេះ ធ្វើឡើងតាមរយៈកិច្ចប្រជុំរបស់គណៈរដ្ឋមន្ត្រី នៅថ្ងៃសុក្រទី០៧មេសា និងបានបញ្ជាក់ឡើងវិញបន្ថែមទៀតនៅក្នុងពិធីជួបជុំ អាចារ្យ និងអាចារិនីនៅព្រឹកថ្ងៃសៅរ៍នេះ។
ចុះផ្សាយនៅថ្ងៃ៖
ស្តាប់ - ០២:១៥
ក្រៅតែពីការលើរបៀបវារៈនានា នៅក្នុងកិច្ចប្រជុំគណៈរដ្ឋមន្ត្រី លោកនាយករដ្ឋមន្ត្រី ហ៊ុន សែន បានស្នើឲ្យក្រសួង និងអាជ្ញាធរពាក់ព័ន្ធ យកចិត្តទុកដាក់ចំពោះបញ្ហាកម្ចីធនាគារ និងមីក្រូហិរញ្ញវត្ថុ ដោយត្រូវបញ្ចៀសនូវរាល់ការរឹបអូសទ្រព្យសម្បត្តិ និងការចាប់ចងប្រជាពលរដ្ឋដែលជាប់កម្ចីឥណទានធនាគារ និងមីក្រូហិរញ្ញវត្ថុ ក្នុងលក្ខខណ្ឌដែលពលរដ្ឋមិនមានលទ្ធភាពសងពិតប្រាកដ ក្នុងបរិការណ៍ក្រោយវិបត្តិកូវីដ១៩ និងវិបត្តិសេដ្ឋកិច្ចនាពេលបច្ចុប្បន្ន។
តែយ៉ាងណា លោក ហ៊ុន សែន បញ្ជាក់ថា ស្ថាប័នធនាគារ និងមីក្រូហិរញ្ញវត្ថុ គួរប្រើប្រាស់វិធានការច្បាប់ចំពោះអ្នកណាដែលញុះញុងមិនឲ្យប្រជាពលរដ្ឋសងបំណុលត្រលប់មកវិញ។ ថ្លែងបញ្ជាក់បន្ថែមនៅថ្ងៃសៅរ៍នេះ លោក ហ៊ុន សែន ថា ក្រុមអ្នកញុះញង់ទាំងនោះ គឺជាគោលដៅនៃការរឹបអូសទ្រព្យសម្បតិ្ត។ តាមលោក ហ៊ុន សែន កន្លងមកមានក្រុមអ្នកនយោបាយបានចេញទៅឃោសនាពីគោលនយោបាយរបស់គណបក្សពួកគេ ដោយញុះញុងមិនឲ្យប្រជាពលរដ្ឋសងបំណុល នៅក្រោយពេលដែលគណបក្សនោះឈ្នះឆ្នោត។ លោក ហ៊ុន សែន បានជំរុញដល់ស្ថាប័នធនាគារ និងមីក្រូហិរញ្ញវត្ថុ ថាប្រសិនបើក្រុមអ្នកឃោសនាទាំងនោះ មានជាប់បំណុល គឺស្ថាប័នធនាគារ និងមីក្រូហិរញ្ញវត្ថុ ត្រូវតែរឹបអូសទ្រព្យសម្បត្តិអ្នកទាំងនោះ។
ការបញ្ជាក់បន្ថែមរបស់លោក ហ៊ុន សែន ធ្វើឡើង ដ្បិតលោកបារម្ភថា ប្រជាពលរដ្ឋអាចយល់ច្រឡំខ្លឹមសារនៃកិច្ចប្រជុំគណៈរដ្ឋមន្ត្រី ដោយពុំបាច់សងប្រាក់ ត្រលប់ទៅធនាគារវិញ។
គួរកត់សម្គាល់ថា ក្នុងអំឡុងពេលរាតត្បាតជំងឺកូវីដ១៩ រដ្ឋាភិបាលបានស្នើជាបន្តបន្ទាប់ដល់ស្ថាប័នធនាគារឯកជន និងមីក្រូហិរញ្ញវត្ថុ ក្នុងការរៀបចំកម្ចីឡើងវិញ និងទុកពេលវេលាឲ្យប្រជាពលរដ្ឋសងដោយសម្រួល ដ្បិតប្រជាពលរដ្ឋជារួមបានរងផលប៉ះពាល់ផ្នែកសេដ្ឋកិច្ចពីវិបត្តិកូវីដជាសកល។ តាមលោក ហ៊ុន សែន កន្លងមកនោះ គឺរដ្ឋាភិបាលស្នើសុំការអនុគ្រោះរៀបចំឥណទានឡើងវិញចំពោះអ្នកដែលជាប់បំណុលធនាគារ និងយោគយល់ចំពោះការលំបាក ដែលពលរដ្ឋមួយចំនួន សងបំណុលត្រលប់មកវិញ ដោយយឺតយ៉ាវ។ យ៉ាងនេះក្តី លោក ហ៊ុន សែន បញ្ជាក់ថា ចំពោះពលរដ្ឋដែលមានលទ្ធភាពសងត្រលប់មកវិញ គួរណាស់តែបង់ឲ្យខាងធនាគារ និងគ្រឹះស្ថានមីក្រូហិរញ្ញវត្ថុ ដើម្បីបញ្ចៀសកុំឲ្យការប្រាក់កាន់ច្រើន។
ដោយឡែក សម្រាប់ក្រុមអ្នកនយោបាយ ដែលឃោនាញុះញុង លោក ហ៊ុន សែន បានប្រាប់ឲ្យស្ថាប័នធនាគារ និងមីក្រូហិរញ្ញវត្ថុ ប្តឹងទៅតុលាការដើម្បីរឹបអូសទ្រព្យសម្បត្តិក្រុមទាំងនោះ ដែលលោក ហ៊ុន សែន ចាត់ទុកថា ជាក្រុមអ្នកឃោសនានយោបាយមេរោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ