គ.ជ.ប វាយតម្លៃការបោះឆ្នោតក្រុមប្រឹក្សាក្រុង-ស្រុក ទើបបង្កើតថ្មី ថាប្រព្រឹត្តទៅដោយរលូន គ្មានការគំរាមកំហែង
ការបោះឆ្នោតក្រុមប្រឹក្សាក្រុង-ស្រុក ទើបបំបែកថ្មីទាំង៥ បានចាប់ផ្តើមនិងបញ្ចប់ នៅព្រឹកថ្ងៃអាទិត្យទី០៩មេសានេះ។ ក្រោយការបញ្ចប់ គណៈកម្មាធិការជាតិរៀបចំការបោះឆ្នោត បានវាយតម្លៃស្ថានភាពនៃដំណើរការបោះឆ្នោតបែបអសកលជារួមនេះ ថា បានប្រព្រឹត្តទៅដោយរលូន គ្មានបាតុភាពមិនប្រក្រតី និងគ្មានការគំរាមកំហែង។
ចុះផ្សាយនៅថ្ងៃ៖
ស្តាប់ - ០២:១០
ដូចការគ្រោងទុក ក្រុង-ស្រុក ទាំង៥ដែលទើបនឹងបំបែកថ្មី រួមមាន ក្រុងអរិយក្សត្រ និងក្រុងសំពៅលូន ក្នុងខេត្តកណ្តាល ក្រុងឧដុង្គម៉ែជ័យ និងស្រុកសាមគ្គីមុនីជ័យ ក្នុងខេត្តកំពង់ស្ពឺ និងស្រុកអូរគ្រៀងសែនជ័យនៃខេត្តក្រចេះ បានបញ្ចប់ការបោះឆ្នោតជ្រើសរើសក្រុមប្រឹក្សាក្រុង-ស្រុក នៅព្រឹកថ្ងៃអាទិត្យនេះ ដោយមានអ្នកចូលរួមបោះឆ្នោតបានគ្រប់ចំនួន។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត។
បើតាម គ.ជ.ប គឺតាមការិយាយបោះឆ្នោតនៅក្រុង-ស្រុកថ្មីទាំង៥បានបន្តនីតិវិធីរាប់សន្លឹកឆ្នោតជាបន្តបន្ទាប់ មុននឹងគ.ជ.ប ប្រកាសលទ្ធផលបឋមនៅល្ងាចថ្ងៃអាទិត្យនេះ។ គ.ជ.ប បានវាយតម្លៃជារួមថា ដំណើរការបោះឆ្នោតបែបអសកលតាមការិយាយនៃក្រុង-ស្រុកថ្មី ទាំង៥ បានប្រព្រឹត្តទៅដោយរលូន មានសន្តិសុខ សណ្តាប់ធ្នាប់ល្អ ដោយគ្មានអំពើហិង្សា និងការគំរាមកំហែង។
គួរបញ្ជាក់ថា ការបោះឆ្នោតបែបអសកល ដែលមានតែសមាសភាពក្រុមប្រឹក្សាឃុំ-សង្កាត់ នៅក្នុងក្រុង និងស្រុកនោះ ជាអ្នកបោះឆ្នោតជ្រើសតាំងក្រុមប្រឹក្សាក្រុង និងស្រុកថ្មី មានគណបក្សចំនួន៣ចូលរួម គឺគណបក្សប្រជាជនកម្ពុជា គណបក្សភ្លើងទៀន និងគណបក្សហ្វ៊ុនស៊ិនប៉ិច។ តាមរយៈសេចក្តីរាយការណ៍បឋម គឺគណបក្សប្រជាជនកម្ពុជា ជាអ្នកទទួលអាសនៈច្រើនជាងគេ ក្នុងក្រុង-ស្រុកថ្មីទាំង៥ ខណៈដែលគណបក្សភ្លើងទៀន ដែលជាគូប្រជែង ទទួលបានអាសនៈខ្លះ។ រីឯគណបក្សហ្វ៊ុនស៊ិនប៉ិច ទទួលបានសូន្យអាសនៈ។
សម្រាប់អាសនៈដែលគណបក្សភ្លើងទៀន ទទួលបាន រួមមាន ៣អាសនៈលើ១៩អាសនៈនៅក្រុងអរិយក្សត្រ និង៥អាសនៈលើ១៩អាសនៈនៅក្រុងសំពៅលូន ក្នុងខេត្តកណ្តាល។ ២អាសនៈលើ១៧អាសនៈនៅក្រុងឧដុង្គម៉ែជ័យ និង១អាសនៈលើ១៩អាសនៈនៅស្រុកសាមគ្គីមុនីជ័យ ក្នុងខេត្តកំពង់ស្ពឺ។ នេះបើតាមលោស្រី ស៊ិន ចាន់ពៅរ៉ូហ្សិត មន្ត្រីគណបក្សភ្លើងទៀនខេត្តបាត់ដំបង។ ដោយឡែកសម្រាប់ស្រុកអូរគៀងសែនជ័យ ក្នុងខេត្តក្រចេះ គឺគណបក្សប្រជាជនកម្ពុជា ទទួលអាសនៈទាំងស្រុង។
គួរបញ្ជាក់ថា ការបោះឆ្នោតតាមបែបអសកលសម្រាប់ក្រុង ស្រុក ទាំង៥ពេលនេះ ធ្វើឡើងក្រោយពីប្រមុខរដ្ឋាភិបាល លោក ហ៊ុន សែន សម្រេចបង្កើតក្រុងចំនួន៣ និងស្រុក២បន្ថែមទៀត ក្នុងខេត្តកណ្តាល កំពង់ស្ពឺ និងក្រេចេះ ដោយយោងទៅលើករណីចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ