៣ខែដើមឆ្នាំ២០២៣៖ ការប្រមូលចំណូលគយសម្រេចបានជាង៥៦៤លានដុល្លារ ថយចុះជាង៥%
ក្នុងត្រីមាសទី១ ឆ្នាំ២០២៣ អគ្គនាយកដ្ឋានគយ និងរដ្ឋាករកម្ពុជាបានប្រមូលចំណូលប្រមាណជាង៥៦៤លានដុល្លារ។ តួលេខនេះគឺមានការថយចុះក្នុងរង្វង់៥,២% បើធៀបនឹងរយៈពេលដូចគ្នាកាលពីឆ្នាំ២០២២។ បើតាមទិន្នផលរបស់អគ្គនាយកដ្ឋានគយ ប្រភពចំណូលដែលគយប្រមូលបានច្រើនជាងគេ គឺបានមកពីអាករលើតម្លៃបន្ថែមមានជាង៤២% អាករពិសេសមានប្រមាណ៣៣% និងពន្ធគយមាន២០%។
ចុះផ្សាយនៅថ្ងៃ៖
ស្តាប់ - ០២:២៩
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា គឺថា ការប្រមូលចំណូលពន្ធរយៈពេល៣ខែដើមឆ្នាំ២០២៣នេះ សម្រេចបានជាង៥៦៤លានដុល្លារ ពោលគឺមានការធ្លាក់ចុះប្រមាណ៥% ខណៈកាលពីត្រីមាសទី១ ឆ្នាំ២០២២ គយរកចំណូលជាង៦០០លានដុល្លារ។ ប៉ុន្តែនៅត្រីមាសទី១ ឆ្នាំ២០២២កន្លងទៅ ក៏ការប្រមូលចំណូលពន្ធថយចុះផងដែរ គឺស្ថិតក្នុងរង្វង់២,៥%។
ផ្អែកតាមទិន្នន័យដដែល ចំណូលពន្ធបានពីការនាំចូលយានយន្ត និងគ្រឿងចក្រគឺមានបរិមាណខ្ពស់ ពោលគឺមានចំនួនប្រមាណ៣៦%។ ចំណែក ទំនិញសរុបមានជិត៣៣% ផលិតផលសិលាមាន២៤% និងគ្រឿងសំណង់ និងរបស់របរផ្សេងទៀតមានចំនួនជិត៧%។ ដោយឡែក មុខទំនិញដែលកម្ពុជានាំចេញវិញ គឺផលិតផលកាត់ដេរ សម្រេចបានប្រមាណជាង២ពាន់លានដុល្លារ ថយចុះជាង២២%។
ចំពោះការនាំចេញផលិតផលមិនមែនកាត់ដេរដែលបូកបញ្ចូលជាមួយ គ្រឿងបង្គុំអេឡិចត្រូនិក បង្គុំខ្សែភ្លើង ផលិតផលធ្វើពីឈើ ផលិតផលបា្លសិ្ទក កង់ កុងផ្លាកេ គ្រឿងបន្លាស់រថយន្ត ស្បែកសត្វកែឆ្នៃ អំពូលលម្អ និងផលិតផលទំនិញជាច្រើនផ្សេងទៀត មានតម្លៃប្រមាណ១,៤០០លានដុល្លារ កើន១៩%។
សម្រាប់ការនាំចេញកសិផលវិញ អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា បានសម្រេជាង១២០០លានដុល្លារ កើនឡើង១១%។ ក្នុងនោះ ការនាំចេញស្រូវបានចំណូលជាង៤០០លានដុល្លារ កើនជិត៣៨% ឬប្រមាណ១១២លានដុល្លារ។ ខណៈការនាំចេញអង្ករ មានតម្លៃ១២៦លានដុល្លារ កើនឡើងជិត២០% ស្របពេលដែលការនាំចេញកៅស៊ូវិញថយចុះជាង១០% ពោលគឺទទួលបានចំណូលប្រមាណ៩៣លានដុល្លារ និងកសិផលផ្សេងទៀតកើន២% ឬប្រមាណ៦២៨លានដុល្លារអាមេរិក។
សូមជម្រាបថា កាលពីត្រីមាសដំបូងឆ្នាំ២០២២ អគ្គនាយកដ្ឋានគយ និងរដ្ឋាករបានប្រមូលចំណូលប្រមាណ៦០០លានដុល្លារ ឬស្មើនឹង២៣%នៃច្បាប់ថវិកាជាតិឆ្នាំ២០២២។ ក្នុងនោះ អាករលើតម្លៃបន្ថែម មានប្រមាណ៣៩%, អាករពិសេស មានប្រមាណ ៣៧%, ពន្ធគយ មានប្រមាណ១៨%,អាករបន្ថែមលើ ផលិតផលប្រេង មានប្រមាណ ៤,២% និងអាករនាំចេញនិងកម្រៃ ផ្សេងៗ មានប្រមាណ ២,២% នៃចំណូលសរុប។ ដោយឡែកក្នុងមួយឆ្នាំ២០២២ អគ្គនាយកដ្ឋានគយ និងរដ្ឋាករ ប្រមូលបានចំណូលបាន ២៦០០លានដុល្លារ កើនជាង ១០៤ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ