១៧មេសា៖ គណបក្សភ្លើងទៀនស្នើឲ្យអ្នកនយោបាយកុំដើរជាន់ដានប្រវត្តិសាស្ត្រ និងចេះទទួលយកមតិផ្ទុយ
គណបក្សភ្លើងទៀននៅព្រឹកថ្ងៃទី១៧ ខែមេសាឆ្នាំ២០២៣នេះ បានរៀបចំពិធីបង្សុកូលរាប់បាតប្រគេនព្រះសង្ឃចំនួន៥អង្គ ដើម្បីឧទ្ទិសកុសលជូនដល់វិញ្ញានក្ខន្ធជនរងគ្រោះ ដែលបានស្លាប់នៅក្នុងរបបកម្ពុជាប្រជាធិបតេយ្យកាលពីជាង៤០ឆ្នាំមុន នៅមជ្ឈមណ្ឌលប្រល័យពូជសាសន៍បឹងជើងឯក។ ការរៀបចំនេះក៏ទទួលបានការអនុញ្ញាតពីសាលារាជធានីភ្នំពេញផងដែរ បន្ទាប់ពីគណបក្សប្រឆាំងមួយនេះ បានដាក់សំណើរទៅកាន់អភិបាលរាជធានីភ្នំពេញលោក ឃួង ស្រេង កាលពីថ្ងៃទី១០ ខែមេសាកន្លងទៅ។
ចុះផ្សាយនៅថ្ងៃ៖
ស្តាប់ - ០៣:២៨
គណបក្សភ្លើងទៀន ដឹកនាំដោយលោក ទាវ វណ្ណុល ប្រធានគណបក្ស និងអ្នកចូលរួមប្រមាណ ២០០នាក់ បានបញ្ចប់ការជួបជុំគ្នាដើម្បីបង្សុកូលរាប់បាតដល់ព្រះសង្ឃចំនួន៥អង្គ ដើម្បីឧទ្ទិសកុសលដល់វិញ្ញាណក្ខន្ធពលរដ្ឋខែ្មរដែលបានរងគ្រោះនៅក្នុងរបបកម្ពុជាប្រជាធិបតេយ្យនៅថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៧ ខែមករា ឆ្នាំ១៩៦៧៩។
លោក រ៉ុង ឈុន អនុប្រធានគណបក្សភ្លើងទៀន ដែលបានចូលរួមក្នុងពិធីនេះដែរ បានប្រាប់វិទ្យុបារាំង RFI ថាក្រៅពីការរំលឹកដល់វិញ្ញាណក្ខន្ធអ្នកដែលបានបាត់បង់ជីវិតក្នុងរបប៣ឆ្នាំ ៨ខែ ២០ថ្ងៃ ពិធីនេះគឺជាការរំលឹកដល់អ្នកដឹកនាំនយោបាយនានា ធ្វើយ៉ាងណាកុំឲ្យដើរជាន់ដានប្រវត្តិសាស្ត្រដ៏អាក្រក់នេះ។ លើសពីនេះ លោកក៏បង្ហាញសារផងដែរដល់អ្នកនយោបាយកាន់អំណាចឲ្យបើកចិត្តទូលាយទទួលយកមតិផ្ទុយ ដោយលោកមិនចង់ឃើញប្រទេសកម្ពុជាមានការចាប់ចង កាប់សម្លាប់ដូចកាលពីសម័យខ្មែរក្រហមទៀតទេ។ ក៏ប៉ុន្តែជាញឹកញាប់គណបក្សកាន់អំណាចតែងប្រតិកម្មថា ការរិះគន់សម្តែងមតិរបស់អ្នកប្រឆាំងមិនបានធ្វើឡើង ដើម្បីជាការស្ថាបនាទេ គឺមានចរិកញុះញង់ បំបែកបំបាក់។
សូមបញ្ជាក់ថាគណបក្សប្រឆាំងតែប្រារព្ធធ្វើពិធីបង្សុកូលគោរពដល់វិញ្ញាណក្ខន្ធអ្នករងគ្រោះនៃរបបខ្មែរក្រហមជារៀងដរាបមក ក៏ប៉ុន្តែមានការអាក់ខានជាច្រើនឆ្នាំបន្ទាប់ពីមានការរំលាយគណបក្សសង្គ្រោះជាតិ និងវិបត្តិកូវដី-១៩ផងដែរ។ ផ្ទុយពីគណបក្សប្រឆាំង គណបក្សកាន់អំណាចក៏ដូចជារដ្ឋាភិបាលកម្ពុជាតែងប្រារព្ធពិធីនេះនៅថ្ងៃទី២០ ខែឧសភា ជារៀងរាល់ឆ្នាំ ជាពិធីដែលមានអត្ថន័យទៅដល់ការរំលឹកវិញ្ញាណក្ខន្ធអ្នករងគ្រោះក្នុងរបបខ្មែរក្រហម។
សូមរំលឹកថារបបខ្មែរក្រហមបានឡើងកាន់អំណាចនៅថ្ងៃទី១៧ ខែមេសា ឆ្នាំ១៩៧៥ ហើយត្រូវទម្លាក់ពីអំណាចនៅថ្ងៃទី៧ ខែមករា ឆ្នាំ១៩៧៩ ។ ប្រជាជនកម្ពុជាជិត ២លាននាក់ បានបាត់បង់ជីវិតដោយសារការបង្អត់អាហារ ទារុណកម្ម ការសម្លាប់ និងការបង្ខំឲ្យធ្វើការហួសកម្លាំងក្នុងរយៈពេល ៣ឆ្នាំ ៨ខែ ២០ថ្ងៃនៃរបបនោះ។ ក្រោយពីការដួលរលំនៃរបបខ្មែរក្រហម នៅទីបំផុតសង្គ្រាមស៊ីវិលបានត្រូវបញ្ចប់ នៅឆ្នាំ ១៩៩៨ នៅពេលដែលរចនាសម្ព័ន្ធនយោបាយ និងយោធារបស់ខ្មែរក្រហមត្រូវកម្ទេចចោល។
នៅឆ្នាំ១៩៩៧ រាជរដ្ឋាភិបាលកម្ពុជាបានសំណូមពរឲ្យអង្គការសហប្រជាជាតិជួយឧបត្ថម្ភបង្កើតសាលាជម្រះក្ដី ដើម្បីកាត់ទោសមេដឹកនាំជាន់ខ្ពស់ខ្មែរក្រហមដែលបានប្រព្រឹត្តបទឧក្រិដ្ឋអំឡុងឆ្នាំ ១៩៧៥-១៩៧៩។ តុលាការនេះមានឈ្មោះថា អង្គជំនុំជម្រះវិសាមញ្ញក្នុងតុលាការកម្ពុជា ដើម្បីកាត់សេចក្ដីឧក្រិដ្ឋកម្មដែលបានប្រព្រឹត្ដឡើងក្នុងរបបកម្ពុជាប្រជាធិបតេយ្យ ដែលមានទីតាំងនៅកម្ពុជា ដោយប្រើប្រាស់មន្ដ្រីនិងចៅក្រមកម្ពុជា គួបផ្សំជាមួយមន្ដ្រីនិងចៅក្រមអន្ដរជាតិ។ អស់រយៈពេល១៦ឆ្នាំ សាលាក្តីខ្មែរក្រហមបានសម្រេចកាត់ក្តីមេដឹកនាំជាន់ខ្ពស់នៃរបបវាលពិឃាតនេះ ចំនួន៥នាក់ ក្នុងនោះមាន កាំង ហ្គិចអ៊ាវ ហៅឌុច នួន ជា អៀង សារី អៀង ធីរិទ្ធ និងខៀវ សំផន។ ក៏ប៉ុន្តែអ្នកដែលរស់រានមានជីវិត មានតែខៀវ សំផន ម្នាក់គត់ បច្ចុប្បន្នកំពុងទទួលទោសអស់១ជីវិតនៅក្នុងពន្ធនាគារខេត្តកណ្តាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ