សមាគមស្វាយចន្ទីស្នើឱ្យកសិករផ្អាកនាំគ្រាប់ស្វាយចន្ទីស្រស់ទៅវៀតណាម ក្រោយតម្លៃថោក
សមាគមស្វាយចន្ទីកម្ពុជាអះអាងថា ប្រជាកសិករដាំដុះស្វាយចន្ទីបានផ្អាកការនាំចេញគ្រាប់ស្វាយចន្ទីស្រស់ទៅកាន់ប្រទេសវៀតណាមមួយរយៈពេលសិន ដោយសារតែការបញ្ជាទិញមានតម្លៃថោក។ បើតាម សមាគម គ្រាប់ស្វាយចន្ទីសើមដែលនាំទៅវៀតណាមធ្លាក់ថ្លៃខ្លាំងនាចុងខែមីនា ម្ល៉ោះហើយ ដើម្បីធានាការនាំចេញគ្រាប់ស្វាយចន្ទីបានថ្លៃ សមាគមស្នើឱ្យប្រជាកសិករធ្វើការរក្សាទុក និងសម្ងួតដើម្បីនាំចេញនាអំឡុងខែសីហាជំនួសវិញ។
ចុះផ្សាយនៅថ្ងៃ៖
ស្តាប់ - ០២:៥៣
ថ្លែងមកវិទ្យុបារាំងអន្តរជាតិRFI លោក អួន ស៊ីុឡុត ប្រធានសមាគមស្វាយចន្ទីកម្ពុជាកត់សម្គាល់ថា ការនាំចេញគ្រាប់ស្វាយចន្ទីស្រស់ទៅប្រទេសវៀតណាម គឺធ្លាក់ថោក ដែលតម្រូវឱ្យសមាគមស្នើឱ្យកសិករផ្អាកការនាំចេញទៅវៀតណាមមួយរយៈពេល។ គ្រាប់ស្វាយចន្ទីស្រស់បច្ចុប្បន្នមានតម្លៃពីចន្លោះ៤០០០-៤៦០០រៀលក្នុងមួយគីឡូ ខណៈគ្រាប់ស្វាយចន្ទីស្ងួតអាចនឹងមានតម្លៃខ្ពស់ជាងនេះនៅខែសីហាខាងមុខដែលមានចន្លោះពី៦០០០-៧០០០រៀល។
ផ្អែកតាមការព្យាករនេះ លោក ស៊ីឡុត ជំរុញឱ្យកសិករងាកមកសម្ងួតគ្រាប់ស្វាយចន្ទីទុកជាបណ្តោះអាសន្នវិញ និងម្យ៉ាងដើម្បីរង់ចាំតម្លៃនាំចេញហក់ឡើងខ្ពស់នាខែសីហា។ ហើយ លោកថា បើកសិករប្រញាប់លក់ចេញនាពេលនេះ ចង់មិនចង់កសិករនឹងមិនទទួលបានប្រាក់ចំណេញនោះទេ។
បើតាមប្រធានសមាគមលោក ស៊ីឡុត រយៈពេល២ឆ្នាំចុងក្រោយនេះ បញ្ហានៃការប្រែប្រួល អាកាសធាតុ បានធ្វើឲ្យប្រជាកសិករប្រកបរបដាំចន្ទីនេះមានការខាតបង់ ប្រមូលផលបានតិច ចំណែកផលដែលទទួលបានវិញ មានគុណភាពទាប និងលក់ចេញបានតម្លៃថោក បូកផ្សំជាមួយការឡើងថ្លៃនៃជីថ្នាំកសិកម្ម និងប្រេងឥន្ធនៈ។ ហើយបញ្ហាទាំងនេះបានបណ្តាលឱ្យកសិករសម្រេចកាប់ដើមចន្ទីចោលប្រមាណ ១០ម៉ឺនហិចតាក្នុងរយៈពេល២ឆ្នាំចុងក្រោយនេះ ដែលធ្លាក់ចុះពី ៨០ម៉ឺនហិចតា មកនៅត្រឹមតែ ៧០ម៉ឺនហិចតាប៉ុណ្ណោះ នៅចុងឆ្នាំ២០២២។
ដោយឡែក ជុំវិញការនាំចេញគ្រាប់ស្វាយចន្ទីស្រស់ទៅប្រទេសវៀតណាមច្រើនលើសលប់នេះ លោក ស៊ីឡុតចង់ឃើញវិស័យសហគ្រាសធុនតូច និងមធ្យមវិនិយោគលើការកែឆ្នៃគ្រាប់ស្វាយចន្ទីឱ្យទៅជាផលិតផលសម្រេចសម្រាប់ធ្វើការលក់នៅលើទីផ្សារតែម្តង ខណៈលោកធ្លាប់អះអាងថា ការនាំចេញគ្រាប់ស្វាយចន្ទីស្រស់ទៅវៀតណាមច្រើន ធ្វើឱ្យខាតបង់ផលចំណេញ។
ជុំវិញរឿងនេះ លោកនាយករដ្ឋមន្ត្រីហ៊ុន សែនកាលពីថ្ងៃទី១៤ ខែមីនា បានបង្ហាញមហិច្ឆតាប្រែក្លាយកម្ពុជាឱ្យទៅជាប្រទេសអធិរាជស្វាយចន្ទីដែលមានសក្តានុពលទាំងការផលិត និងការនាំចេញគ្រាប់ស្វាយចន្ទីទៅលក់នៅលើទីផ្សារអន្តរជាតិ ខណៈកម្ពុជាបានក្តោបក្តាប់ចំណែកទីផ្សារផលិតស្វាយចន្ទីរហូតដល់២៤%នៅលើពិភពលោក។
សូមជម្រាបថា ក្នុងឆ្នាំ២០២២ កម្ពុជានាំចេញគ្រាប់ស្វាយចន្ទីឆៅទៅទីផ្សារអន្តជាតិ មានចំនួន ៦៧ម៉ឺនតោន គិតជាទឹកប្រាក់មានចំនួន ១.០៧៧លានដុល្លារ ថយចុះ៣៤,៦៥ភាគរយ។នេះបើតាមរបាយការណ៍របស់សមាគមស្វាយចន្ទីកម្ពុជា។ ក្នុងនោះ គ្រាប់ស្វាយចន្ទីរបស់កម្ពុជាស្ទើរ ១០០ភាគរយបាននាំចេញទៅកាន់ប្រទេសវៀតណាមមានចំនួន ៦៦ម៉ឺនតោន ថយចុះ ៣៧ភាគរយ។
ដោយឡែក ក្នុងរយៈពេល៣ខែឆ្នាំ២០២៣នេះ សមាគមស្វាយចន្ទីកម្ពុជាបានបង្ហាញតួលេខឱ្យឃើញថា កម្ពុជាបានផលិតគ្រាប់ស្វាយចន្ទីស្រស់បាន២៦ម៉ឺនតោន ខណៈការនាំទៅវៀតណាមមានចំនួនជាង២៣ម៉ឺនតោន(២៣៣៥០តោន) ដោយគិតជាទឹកប្រាក់ប្រមាណ៣២០លានដុល្លារ ថយចុះ១២,៩៥% បើធៀបទៅនឹងរយៈពេលដូចគ្នាកាលពីឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ