លោក ហ៊ុន សែន បើកទ្វារទទួល លោក ហ៊ុន កុសល ចូលក្នុងគ្រួសារCPP
លោក ហ៊ុន សែន នៅថ្ងៃអាទិត្យនេះបានបើកទ្វារទទួលស្វាគមន៍លោក ហ៊ុន កុសល ចូលក្នុងគណបក្សប្រជាប្រជនកម្ពុជា បន្ទាប់ពីសាម៉ីខ្លួនចេញវីដេអូសុំចូលរួមជីវភាពនយោបាយជាមួយគណបក្សប្រជាជន។ សំណើរសុំចុះចូលជាមួយគណបក្សកាន់អំណាចធ្វើឡើងមួយថ្ងៃបន្ទាប់ពីលោក ហ៊ុន កុសល ត្រូវបានសាលាដំបូងរាជធានីភ្នំពេញចេញដីកាបង្គាប់ឲ្យដោះលែងនៅថ្ងៃទី២២ខែមេសា ក្រោមការសម្របសម្រួលរបស់លោក ហ៊ុន សែន ។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងវិដេអូខ្លីបង្ហាញដោយលោក ហ៊ុន សែន លោក ហ៊ុន កុសល អរគុណលោក ហ៊ុន សែន ដែលជួយសម្របសម្រួលឲ្យរូបលោកបានចេញពីពន្ធនាគារដែលជាប់ឃុំនៅក្នុងបទចោទប្រមាថអង្គព្រះមហាក្សត្រ។ដូចគ្នានឹងសំណេរលើទំព័រហ្វេសបុកក្រោយចេញពីពន្ធនាគារភ្លាមដែរ លោក ហ៊ុន កុសល បានសូមទោសជាថ្មីចំពោះអ្វីដែលខ្លួនបានចោទប្រកាន់ទៅកាន់លោក ហ៊ុន សែន នាពេលកន្លងមកនិងអះអាងពីភាពស្មោះត្រង់ធ្វើការជាមួយគណបក្សប្រជាជនកម្ពុជាក្រោមការដឹកនាំរបស់លោក ហ៊ុន សែន។
បន្ថែមលើនេះនៅក្នុងសំណេរលើទំព័រហ្វេសបុកដដែល លោក ហ៊ុន កុសល ក៏បានស្នើសុំលោក ហ៊ុន សែន ជួយសម្របសម្រួលចំពោះសកម្មជននយោបាយអតីតគណបក្សសង្រ្គោះជាតិទាំងឡាយដែលកំពុងជាប់ឃុំនៅមណ្ឌលអប់រំកែប្រែ(ម១) និងសកម្មជននយោបាយ និងសកម្មជនសង្គមដទៃទៀតដើម្បីឱ្យពួកគេ បាននៅក្រៅឃុំ អាចជួបជុំឪពុកម្តាយ ស្វាមី ភរិយា សាច់ញាតិ និងគ្រួសារដូចដើមវិញ។
គួរជម្រាបជូនថា លោក ហ៊ុន កុសល ដែលជាមិត្តភក្តិនិងបងប្អូនធម៌នឹងលោក យឹម ស៊ីណន ត្រូវបានតុលាការចោទប្រកាន់២បទល្មើស រួមមានបទៈ ប្រមាថចំពោះអង្គព្រះមហាក្សត្រ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៣៧ (ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។
ក្រោយមានសេរីភាពវិញ លោក យឹម ស៊ីណន ទទួលបានតួនាទីជាអនុរដ្ឋលេខាធិការក្រសួងការងារក្រោយចុះចូលជាមួយគណបក្សប្រជាជនកម្ពុជា។ លោក យឹម ស៊ីណន បានរៀបរាប់ថា ចូលរួមជីវភាពនយោបាយជាមួយបក្សប្រជាជនកម្ពុជា ព្រោះឈឺចាប់នឹងការប្រមាថរបស់គណបក្សប្រឆាំងអំឡុងពេលខ្លួនជាប់ពន្ធនាគារ ដែលថា ការជាប់គុករបស់លោក និង លោក ហ៊ុន កុសល ជាល្ខោនសម្តែង។
ចំណែកលោក គឹម សុខ អ្នកនៅក្រៅស្រុកសសេរសារលើហ្វេសប៊ុកថា នេះជាសេណារីយ៉ូរៀបចំឡើងដោយលោក ហ៊ុន សែន និងកូនប្រុសគឺលោក ហ៊ុន ម៉ាណែត ដើម្បីបំផ្លាញចោលចរន្តស្មោះស្ម័គ្រនឹងលោក កឹម សុខា។ បើតាមលោក គឹម សុខ ចេតនារបស់លោក ហ៊ុន សែន សងសឹកឲ្យដល់ទីបំផុតនឹងលោក កឹម សុខា ដែលនៅតែមានជំហររឹងមាំ មិនធ្វើតាមគំនិតរបស់ខ្លួន។ ជុំវិញការអះអាងថា នេះនៅមិនទាន់មានការឆ្លើយតបនៅឡើយទេពី លោកនាយករដ្ឋមន្ត្រី ហ៊ុន សែន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ