គណបក្សចំនួន៣បានទៅចុះបញ្ជីឈរឈ្មោះបោះឆ្នោត និងបញ្ជីបេក្ខជននៅព្រឹកថ្ងៃដំបូង
គិតមកត្រឹមវេលាម៉ោង១ថ្ងៃត្រង់ថ្ងៃចន្ទនេះ គណបក្សនយោបាយចំនួន៣ ក្នុងនោះមានគណបក្សកាន់អំណាចផងដែរ បានទៅចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជននៅគណៈកម្មាធិការជាតិរៀបចំការបោះឆ្នោត(គ.ជ.ប)។ ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជន ដើម្បីចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧នេះ គណបក្សនយោបាយមានពេល២សប្តាហ៍ គឺចាប់ពីថ្ងៃទី២៤ ខែមេសានេះ រហូតដល់ថ្ងៃទី០៨ ខែឧសភា ឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:៣៨
យ៉ាងហោចមានគណបក្សនយោបាយចំនួន៣ បានទៅចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជននៅគណៈកម្មាធិការជាតិរៀបចំការបោះឆ្នោត(គ.ជ.ប)នៅថ្ងៃដំបូង គិតមកត្រឹមម៉ោង ១ថ្ងៃត្រង់នេះ។ គណបក្សទាំង៣នោះរួមមាន គណបក្សប្រជាជនកម្ពុជា គណបក្សយុវជនកម្ពុជា និងគណបក្សខ្មែររួបរួមជាតិ។
លោក ឌឹម សុវណ្ណារុំ សមាជិក និងជាប្រធានក្រុមប្រតិកម្មព័ត៌មាន គ.ជ.ប បានប្រាប់វិទ្យុបារាំង RFI នៅថ្ងៃនេះថា គ.ជ.ប មានពេល៧ថ្ងៃ ដើម្បីពិនិត្យ និងសម្រេចថាទទួលស្គាល់ ឬច្រានចោលការចុះបញ្ជីគណបក្សនយោបាយណាមួយ។ តាម គ.ជ.ប គណបក្សនយោបាយត្រូវភ្ជាប់មកជាមួយនូវឯកសារចំនួន១០មុខ រួមមានសេចក្តីចម្លងលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ១ច្បាប់ ឈ្មោះគណបក្សនយោបាយជាអក្សរពេញ ជាអក្សរកាត់ និងសញ្ញាសម្គាល់គណបក្សនយោបាយ អាសយដ្ឋាននៃទីស្នាក់ការកណ្តាលគណបក្ស បញ្ជីបេក្ខជនឈរឈ្មោះបោះឆ្នោតសរុបទូទាំងប្រទេស ដែលត្រូវមានបេក្ខជនពេញសិទ្ធិចំនួនយ៉ាងតិច១/៣ នៃចំនួនអាសនៈក្នុងរដ្ឋសភា និងបេក្ខជនបម្រុងចំនួនស្មើគ្នានឹងបេក្ខជនពេញសិទ្ធិ។
បន្ថែមពីនេះ គណបក្សនយោបាយក៏ត្រូវបំពេញលក្ខខណ្ឌមួយចំនួនទៀតដូចជាឈ្មោះមណ្ឌលដែលគណបក្សនយោបាយមានបំណងទៅឈរ និងបញ្ជីបេក្ខជនឈរឈ្មោះតាមមណ្ឌលទាំងនោះ។ គណបក្សនយោបាយក៏ត្រូវមានផងដែរនូវសេចក្តីប្រកាសអំពីគណនីធនាគារ លក្ខន្តិកៈគណបក្សនិងឯកសារផ្សេងៗទៀត សេចក្តីប្រកាសរបស់គណបក្សសន្យាថាចូលរួមបោះឆ្នោត និងទទួលយកលទ្ធផលនៃការបោះឆ្នោត បញ្ជីរាយនាមគណៈកម្មាធិការនាយក ឬគណៈអចិន្ត្រៃយ៍ និងបង្កាន់ដៃបង់ប្រាក់តម្កល់ចំនួន ១៥លានរៀលជាដើម។
សូមរំលឹកថាគណបក្សនយោបាយនៅប្រទេសកម្ពុជាដែលបានចុះបញ្ជីនៅក្រសួងមហាផ្ទៃសរុបមានចំនួន៤៥គណបក្ស ក៏ប៉ុន្តែគណបក្សដែលចាប់អារម្មណ៍ប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧នេះ ត្រូវគេមើលឃើញថានឹងមិនបានចូលរួមទាំងអស់នោះទេ។ កាលពីការបោះឆ្នោតតំណាងរាស្ត្រឆ្នាំ២០១៨ មានគណបក្សចំនួន២០ ចូលរួម ដែលក្នុងនោះមិនមានវត្តមានគណបក្សប្រឆាំងស្រួចស្រាល់នឹងបក្សកាន់អំណាចទេ ហើយការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីឆ្នាំ២០២២ មាន១៧គណបក្សចូលរួម ក្នុងនោះគណបក្សភ្លើងទៀនបានដើរតួនាទីសំខាន់ជាគណបក្សប្រឆាំង បន្ទាប់ពីគណបក្សសង្គ្រោះជាតិត្រូវបានរំលាយ។ សូមបញ្ជាក់ថាការបោះឆ្នោតជ្រើសតាំងតំណាងរាស្ត្រនីតិកាលទី៧នេះ នឹងត្រូវធ្វើឡើងនៅថ្ងៃទី២៣ ខែកក្កដា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ