តុលាការឃុំខ្លួនមនុស្ស១១នាក់ពាក់ព័ន្ធការកាប់ព្រៃឈើនៅខេត្តក្រចេះ
មនុស្សចំនួន១១នាក់ ត្រូវបានតុលាការខេត្តក្រចេះសម្រេចឃុំខ្លួនដាក់ពន្ធនាគារកាលពីម្សិលមិញ ពីបទដឹកជញ្ជូនប្រមូលផល អនុផលព្រៃឈើគ្មានច្បាប់អនុញ្ញាត្តិដែលប្រព្រឹត្តកាលពីថ្ងៃទី២៤ ខែមេសា ឆ្នាំ២០២៣។ នេះគឺជាចំណាត់ការថ្មីមួយទៀតបន្ទាប់ពីប្រធានគណៈ កម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដាក់ចេញនូវបទបញ្ជាឲ្យកងកម្លាំងសមត្ថកិច្ចអាចប្រើប្រាស់អាវុធបាញ់ ប្រសិនបើពួកអ្នកកាប់ឈើមានកាំភ្លើង ហើយបាញ់លើកងកម្លាំងសមត្ថកិច្ច។
ចុះផ្សាយនៅថ្ងៃ៖
ស្តាប់ - ០២:១៣
ក្រៅពីការចោទប្រកាន់ និងឃុំខ្លួនមនុស្ស១១នាក់ពាក់ព័ន្ធនឹងបទល្មើសព្រៃឈើនេះ សមត្ថកិច្ចរឹបអូសឈើសរុបចំនួន ៣២៨,៧៩១m3 (ក្នុងនោះឈើហ៊ុបមូលចំនួន១៨២កំណាត់ ស្មើនឹង ២២៥,៩៥៥m3 ឈើប្រភេទលេខ១សរុបចំនួន ២២៩ដុំ ស្មើនឹង៦៤,៣៩២m3 ឈើប្រភេទលេខ២ចំនួន៩០៨សន្លឹក ស្មើនឹង ៣៥, ២៤៣m3 សសរចំនួន០៨ដើមស្មើនឹង ៣,២០១m3) និងកូនឈើចម្រុះ១៣ដើម។ នេះបើតាមរបាយការណ៍ស្តីពីលទ្ធផលការងារប្រតិបត្តិការបង្រ្កាបបទល្មើសព្រៃឈើ ក្នុងដែនជម្រកសត្វព្រៃ(ព្រៃឡង់) ថ្ងៃទី ២៥-២៩ ខែមេសា ឆ្នាំ២០២៣។
លើសពីនេះ សមត្ថកិច្ចរឹបអូសរថយន្តប៉ាកុងកែច្នៃចំនួន០១គ្រឿង ឃាត់រថយន្តសណ្តោងរ៉ឺម៉ក០៧គ្រឿង គោយន្តកន្ត្រៃ១៤គ្រឿង ម៉ូតូ០១គ្រឿង ប្រេងសាំង៣០លីត្រ រណារយន្ត០៥គ្រឿង កៅឡាក់១៤គ្រាប់ ។ ខណៈឃាត់ខ្លួនមនុស្ស១២នាក់ ក្នុងនោះជនសង្ស័យចំនួន១១នាក់ត្រូវបានកសាងសំណុំរឿងបញ្ជូនទៅសាលាដំបូងខេត្តក្រចេះ។ នេះជាការគូសបញ្ជាក់របស់ លោក អេង ហ៊ី។
បើតាមអ្នកនាំពាក្យកងរាជអាវុធហត្ថលើផ្ទៃប្រទេស នេះគឺជាយុទ្ធនាការដែលគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិត្រូវបន្តអនុវត្ត ខណៈមានការស្នើសុំអន្តរាគមន៍ថ្នាក់មូលដ្ឋាន។
ប្រតិបត្តិបង្រ្កាបបទល្មើសព្រៃឈើជាថ្មីទៀតនេះ គឺបន្ទាប់ពីលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈ កម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដាក់ចេញនូវបទបញ្ជាឲ្យកងកម្លាំងសមត្ថកិច្ចបង្រ្កាបអ្នកកាប់ឈើខុសច្បាប់ ហើយត្រូវបាញ់ ប្រសិនបើពួកអ្នកកាប់ឈើមានកាំភ្លើង ហើយបាញ់លើកងកម្លាំងសមត្ថកិច្ច។
លោក ហឿន សុភាព ជាសកម្មជនព្រៃឡង់ និងជាអ្នកសម្របសម្រួលបណ្តាញព្រៃឡង់ប្រចាំខេត្តកំពង់ធំ បានបង្ហាញការស្វាគមន៍ចំពោះចំណាត់ការរបស់អាជ្ញាធរមានសមត្ថកិច្ច។ ប៉ុន្តែលោក ហឿន សុភាព កត់សម្គាល់ឃើញថានៅពេលជិតបោះឆ្នោតជាតិម្តងៗ ករណីកាប់ឈើខុសច្បាប់តែងតែកក្រើកឡើង។
ឆ្លើយតបនឹងការលើកឡើងថា ការបង្រ្កាបបទល្មើសព្រៃឈើ ធ្វើបានតែទៅលើអ្នករកស៊ីតូចតាច លោក អេង ហ៊ី ពន្យល់ថា ការបង្រ្កាបគឺធ្វើឡើងដោយមិនលើកលែងនោះទេឲ្យមានតែភស្តុតាងគ្រប់គ្រាន់។ តែលោកទទួលស្គាល់ថា ការបង្ក្រាបបានតែអ្នកកាប់ឈើតូចតាចដោយសារតែពួកគេត្រូវបានសមត្ថកិច្ចជួបប្រទះជាក់ស្តែង ហើយថាការចាប់ពួក
គេក៏ដើម្បីស្វែងរកជនល្មើសធំៗ និងអ្នកកាងបទល្មើសដែលមិនចេញមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ