សកម្មជនបរិស្ថានចេញមុខរិះគន់រដ្ឋាភិបាលរឿងកាត់ដីព្រៃនៅពីរតំបន់ទៅឲ្យក្រុមហ៊ុនឯកជន
ក្រុមយុវជនដែលស្រលាញ់បរិស្ថាន ចាប់ផ្ដើមចេញមករិះគន់រដ្ឋាភិបាលដែលបានកាត់ដីព្រៃសរុបចំនួនជាង ៨៧០ហិកតាទៅឲ្យក្រុមហ៊ុនឯកជនដើម្បីធ្វើការអភិវឌ្ឍន៍ ដោយក្នុងនោះ ២២១ហិកតានៅគីរីរម្យ និង៦៤៩ហិកតានៅឱរ៉ាល់។ ការរិះគន់នេះ ធ្វើឡើងតាមរយះបណ្ដាញសង្គមហ្វេសប៊ុក បន្ទាប់ពីពួកគេបានឃើញអនុក្រឹត្យរដ្ឋាភិបាលដែលបានកាត់ដីទាំងនេះ ទៅឲ្យក្រុមហ៊ុនឯកជនចាប់តាំងពីឆ្នាំ២០២២មកម្លេះ។ ប៉ុន្តែសម្រាប់អ្នកនាំពាក្យក្រសួងបរិស្ថាន វិញ ថារាល់ការសម្រេចរបស់រដ្ឋាភិបាល គឺឈរលើមូលដ្ឋានត្រឹមត្រូវ។
ចុះផ្សាយនៅថ្ងៃ៖
ស្តាប់ - ០២:២៤
លោក សាន់ ម៉ាឡា ជាសកម្មជនបរិស្ថានដ៏លេចធ្លោម្នាក់ ធ្លាប់ជាប់ពន្ធនាគារដោយសារតែចេញមុខការពារព្រៃឈើ និងធនធានធម្មជាតិ លោកបានលើកឡើងនៅលើបណ្ដាញសង្គមហ្វេសប៊ុកយ៉ាងដូច្នេះថា «ពលរដ្ឋខ្មែរត្រូវត្រៀមចិត្តទទួលយកការបាត់បង់ព្រៃឈើសរុបជាង ៨៧០ហិកតានៅពេលខាងមុខនេះ។ ក្នុងនោះ ២២១ហិកតានៅគីរីរម្យ និង ៦៤៩ហិកតានៅឱរ៉ាល់»។ ក្រៅពីលោក សាន់ ម៉ាឡា ក៏មានសកម្មជនបរិស្ថានដទៃទៀតចេញមកប្រតិកម្ម និងរិះគន់រដ្ឋាភិបាលចំពោះការកាត់ដីព្រៃទាំងនេះ ទៅឲ្យក្រុមហ៊ុនឯកជន ដើម្បីធ្វើការអភិវឌ្ឍន៍ផងដែរ។
បើតាមលោក សាន់ ម៉ាឡា បញ្ហានេះក្រុមសកម្មជនបរិស្ថាន មិនបាននៅស្ងៀមឡើយ ពួកគេនឹងធ្វើយុទ្ធនាការនៅតាមបណ្ដាញសង្គម ដើម្បីទាមទារឲ្យរដ្ឋាភិបាលដកហូតដីព្រៃឈើសរុបជាង ៨៧០ហិកតាដែលកាត់ទៅឲ្យក្រុមហ៊ុន យកមកទុកជាតំបន់អភិរក្សដូចនៅតំបន់ភ្នំតាម៉ៅវិញ។ សកម្មជនបរិស្ថានរូបនេះយល់ឃើញថា នៅប្រទេសកម្ពុជាប្រជាជនតិច ដីទំនេរច្រើន ដូច្នេះរដ្ឋាភិបាលគួរយកដីទំនេរទាំងនេះទៅឲ្យក្រុមហ៊ុនឯកជនធ្វើការអភិវឌ្ឍន៍វិញ ជាជាងយកដីដែលមានព្រៃឈើទៅឲ្យក្រុមហ៊ុនធ្វើការអភិវឌ្ឍន៍។
ឆ្លើយតបចំពោះប្រតិកម្ម និងរិះគន់ចំពោះការកាត់ដីព្រៃឈើខាងលើនេះ លោក នេត្រ ភក្រ្តា អ្នកនាំពាក្យក្រសួងក្រសួងបរិស្ថាន បានបញ្ជាក់ថា រាល់ការសម្រេចរបស់រាជរដ្ឋាភិបាល គឺឈរលើមូលដ្ឋានបច្ចេក ដោយមានការគិតគូអំពីការអភិវឌ្ឍន៍ប្រទេសប្រកបដោយការទទួលខុសត្រូវ ហើយបម្រើឲ្យផលប្រយោជន៍ប្រជាពលរដ្ឋ។ ដូច្នេះការសម្រេចរបស់រដ្ឋាភិបាលនេះ គឺឈរនៅលើមូលដ្ឋាននៃភាពត្រឹមត្រូវ។ ផ្ទុយទៅវិញ លោក នេត្រ ភក្រ្តា ចាត់ទុកការប្រតិកម្ម និងរិះគន់របស់សកម្មជនមួយចំនួន គ្រាន់តែជាការរិះគន់ឲ្យលឺសំឡេងតែប៉ុណ្ណោះ។
បើយោងតាមអនុក្រឹត្យរបស់រដ្ឋាភិបាលចុះថ្ងៃទី២៧ ខែមិថុនា ឆ្នាំ២០២២ រដ្ឋាភិបាលបានសម្រេចកាត់ដីនៅតំបន់ ឧទ្យានជាតិព្រះសុរាម្រិត-កុសមៈ គិរីរម្យចំនួន ២២១.៩៤ហិកតា ទៅឲ្យក្រុមហ៊ុន វ័ន ម៉រ ខណៈដីនៅតំបន់ដែនជម្រកសត្វព្រៃភ្នំឱរ៉ាល់ចំនួន ៦៤៩ហិកតា ត្រូវបានកាត់ទៅឲ្យក្រុមហ៊ុន ហ្វ្រេតធឺនីធី។ នេះបើតាមអនុក្រឹត្យចុះថ្ងៃទី២៦ ខែកក្កដា ឆ្នាំ២០២២។
ក្រុមហ៊ុនទាំងនេះ ត្រូវបានសកម្មជនបរិស្ថានអះអាងថា សុទ្ធសឹងជាក្រុមហ៊ុនរបស់លោកស្រី ជឹង សុភាព ហៅយាយភូទាំងអស់ ដែលទទួលបានដីព្រៃទាំងនេះពីរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ