សកម្មជនម្នាក់ត្រូវបានលើកលែងទោស ក្នុងចំណោម១០នាក់ ដែលសុំទោស លោក ហ៊ុន សែន
សកម្មជនប្រឆាំងម្នាក់គឺលោក គង់ ម៉ាស់ ត្រូវបានលើកលែងទោសម្សិលមិញ ក្នុងចំណោម១០នាក់ ដែលជាប់ឃុំក្នុងពន្ធនាគារ ហើយបានចេញវីដេអូ រួមគ្នាសុំទោស លោក ហ៊ុន សែន ដើម្បីសុំអន្តរាគមន៍ឲ្យបាននៅក្រៅឃុំ។ ការបន្តចេញមកសុំទោសជាក្រុមបែបនេះ ធ្វើឡើងតែប៉ុន្មានថ្ងៃ បន្ទាប់ពី លោក អៀ ចាន់ណា អនុប្រធានក្រុមការងារគណបក្សភ្លើងទៀនខេត្តតាកែវ ត្រូវបានតុលាការដោះលែងឲ្យនៅក្រៅឃុំ តាមការអន្តរាគមន៍របស់លោកនាយករដ្ឋមន្ត្រី ក្រោយពីបានចេញវីដេអូ និងសរសេរលិខិតសុំទោសប្រមុខរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:២១
សកម្មជនក្រុមប្រឆាំងទាំង១០នាក់នោះ នាំមុខដោយ លោក គង់ ម៉ាស់ ជាអតីតសមាជិកគណបក្សប្រឆាំងប្រចាំខេត្តស្វាយរៀងនិងសកម្មជន៩រូបទៀតត្រូវបានតុលាការផ្តន្ទាទោសដាក់ពន្ធនាគារ ពាក់ព័ន្ធនឹងករណីរួមគំនិតក្បត់, ញុះញង់បង្កអសន្តិសុខសង្គម ជុំវិញផែនការប្រកាសវិលចូលស្រុករបស់ លោក សម រង្ស៉ីកាលពីឆ្នាំ២០១៩។
បើតាម លោក គង់ ម៉ាស់ ខ្លួនត្រូវបានកាត់ទោសដាក់ក្នុងពន្ធនាគារ រយៈពេល៥ឆ្នាំ។ នៅថ្ងៃទី៦ឧសភាលិខិតលើកលែងទោស លោក គង់ ម៉ាស់ ក៏បានធ្លាក់មកភ្លាមៗ ខណៈដែលវីដេអូរបស់សកម្មជនទាំងនេះសុទ្ធតែទម្លាក់កំហុសថា ពួកគេចាញ់បោកការឃោសនាបោករបស់ក្រុមប្រឆាំង។ ហើយសុំឲ្យលោក ហ៊ុន សែន ជួយអន្តរាគមន៍បាននៅក្រៅឃុំ ដើម្បីមើលថែទាំកូនតូចៗដែលម្តាយទើបស្លាប់ចោល និងមើលថែឳពុកម្តាយដែលចាស់ជរាជាដើម។
តែតាមរយៈវីដេអូជាង១០នាទីនោះ សកម្មជនទាំងនេះមិនបានប្រកាសសុំចុះចូលជាមួយគណបក្សប្រជាជនកម្ពុជានៅឡើយទេ។
ជាការកត់សម្គាល់ និន្នាការនៃការទទួលស្គាល់កំហុស និងសុំការលើកលែងទោសពីលោកនាយករដ្ឋមន្ត្រី បានកើតឡើងជាបន្តបន្ទាប់ពីសំណាក់អ្នកនយោបាយបក្សប្រឆាំង។ ទឡ្ហីករណ៍ទាំងនោះ មានជាអាទិ៍ លោក យឹម ស៊ីណន និងលោក ហ៊ុន កុសល សហការីរបស់លោក កឹម សុខា ត្រូវបាន លោក ហ៊ុន សែន ជួយអន្តរាគមន៍បាននៅក្រៅឃុំ។ អ្នកនយោបាយទាំងពីរនោះ ក៏សម្រេចចូលរួមជាមួយគណបក្សប្រជាជនកម្ពុជា និងទទួលបានមុខតំណែងនយោបាយនៅក្រសួង ស្ថាប័នរដ្ឋទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ