សកម្មជនចង់ឃើញគណៈកម្មការជាតិបង្រ្កាបបទល្មើសព្រៃឈើដាក់កម្លាំងសម្ងាត់ចុះបង្រ្កាបព្រៃឈើនៅតំបន់ព្រៃឡង់
សកម្មជនដែលធ្លាប់ចុះទៅស្រាវជ្រាវរកឃើញបទល្មើសព្រៃឈើនៅតំបន់ព្រៃឡង់ ពួកគេចង់ឲ្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បន្តចុះស្រាវជ្រាវនិងដាក់កម្លាំងសម្ងាត់ ដើម្បីតាមដាននិងឃ្លាំមើលក្រុមហ៊ុននៅជុំវិញតំបន់ព្រៃឡង់ ខណៈកន្លងមកសហគមន៍ និងសកម្មជនរកឃើញការកាប់បំផ្លាញព្រៃឡង់ប្រព្រឹត្តិដោយក្រុមហ៊ុនឯកជនទាំងនេះ។ ការលើកឡើងរបស់សកម្មជនបែបនេះ ធ្វើឡើងបន្ទាប់ពីគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ រកមិនឃើញបទល្មើសព្រៃឈើដែលប្រព្រឹត្តដោយក្រុមហ៊ុននៅជុំវិញតំបន់ព្រៃឡង់ឡើយ។
ចុះផ្សាយនៅថ្ងៃ៖
ស្តាប់ - ០៣:១២
លោក អូត ឡាទីន មន្រ្តីសម្របសម្រួលគម្រោង នៃសមាគមបណ្ដាញយុវជនកម្ពុជា (CYN) ដែលធ្លាប់ចុះស្រាវជ្រាវរកឃើញបទល្មើសព្រៃឈើនៅតំបន់ព្រៃឡង់ បានបញ្ជាក់ប្រាប់វិទ្យុបារាំង RFI ថា ក្នុងរយះពេល៣ខែដើមឆ្នាំ២០២៣នេះ បទល្មើសកាប់ឈើនៅតំបន់ព្រៃឡង់ នៅតែរកឃើញបន្តបន្ទាប់ ក្រោយពីសកម្មជន និងសហគមន៍ចុះទៅស្រាវជ្រាវ និងរកឃើញផ្ទាល់។ បើតាមលោក អូត ឡាទីន ក្រោយចុះស្រាវជ្រាវ និងជួបអ្នកកាប់ឈើផ្ទាល់នៅតំបន់ព្រៃឡង់ ខេត្តព្រះវិហារ ពួកគេសុទ្ធតែបានអះអាងថា ពួកគេកាប់ឈើយកទៅលក់ឲ្យក្រុមហ៊ុនម៉ាឃល ឡូជីស្ទីក។ នេះបើតាមលោក អូត ឡាទីន។
ដោយឡែកបទល្មើសព្រៃឈើនៅតំបន់ព្រៃឡង់ ខេត្តក្រចេះវិញ លោក អូត ឡាទីន អះអាងថា ក្រោយចុះស្រាវជ្រាវដោយសកម្មជន និងសហគមន៍ ក៏រកឃើញមានបទល្មើសព្រៃឈើ ដែលមានការសម្របសម្រួលប្រព្រឹត្តដោយក្រុមហ៊ុនអង្គរ ផ្លាយវូតដែរ។ ក្រៅពីនេះ លោក អូត ឡាទីន ក៏បានអះអាងផងដែរថា បទល្មើសព្រៃឈើក៏បានរកឃើញក្នុងតំបន់ព្រៃឡង់ផ្សេងទៀត។ ករណីនេះ លោក អូត ឡាទីន ចង់ឲ្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដាក់កម្លាំងសមត្ថកិច្ចសម្ងាត់ចុះទៅស្រាវជ្រាវផ្ទាល់ ជាជាងដាក់កម្លាំងទៅច្រើន នាំឲ្យវាយស្មៅបង្អើលពស់តែប៉ុណ្ណោះ។
សូមបញ្ជាក់ថា ពាក់ព័ន្ធបទល្មើសព្រៃឈើនេះ កាលពីថ្ងៃទី២៤ ខែមេសា កន្លងទៅ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដាក់ចេញនូវបទបញ្ជាឲ្យកងកម្លាំងសមត្ថកិច្ចបង្រ្កាបអ្នកកាប់ឈើខុសច្បាប់ ហើយត្រូវបាញ់ ប្រសិនបើពួកអ្នកកាប់ឈើមានកាំភ្លើង ហើយបាញ់មកលើកងកម្លាំងសមត្ថកិច្ច។
ក្រោយចុះបង្រ្កាប សមត្ថកិច្ចរឹបអូសឈើសរុបចំនួន ៣២៨,៧៩១m3 (ក្នុងនោះឈើហ៊ុបមូលចំនួន១៨២កំណាត់ ស្មើនឹង ២២៥,៩៥៥m3 ឈើប្រភេទលេខ១សរុបចំនួន ២២៩ដុំ ស្មើនឹង៦៤,៣៩២m3 ឈើប្រភេទលេខ២ចំនួន៩០៨សន្លឹក ស្មើនឹង ៣៥, ២៤៣m3 សសរចំនួន០៨ដើមស្មើនឹង ៣,២០១m3) និងកូនឈើចម្រុះ១៣ដើម។ នេះបើតាមរបាយការណ៍ស្តីពីលទ្ធផលការងារប្រតិបត្តិការបង្រ្កាបបទល្មើសព្រៃឈើ ក្នុងដែនជម្រកសត្វព្រៃ(ព្រៃឡង់) ថ្ងៃទី ២៥-២៩ ខែមេសា ឆ្នាំ២០២៣។
លើសពីនេះ សមត្ថកិច្ចបានរឹបអូសរថយន្តប៉ាកុងកែច្នៃចំនួន០១គ្រឿង ឃាត់រថយន្តសណ្តោងរ៉ឺម៉ក០៧គ្រឿង គោយន្តកន្ត្រៃ១៤គ្រឿង ម៉ូតូ០១គ្រឿង ប្រេងសាំង៣០លីត្រ រណារយន្ត០៥គ្រឿង កៅឡាក់១៤គ្រាប់។ ខណៈឃាត់ខ្លួនមនុស្ស១២នាក់ ក្នុងនោះជនសង្ស័យចំនួន១១នាក់ត្រូវបានកសាងសំណុំរឿងបញ្ជូនទៅសាលាដំបូងខេត្តក្រចេះ។ ក៏ប៉ុន្តែយុទ្ធនាការបង្ក្រាបនេះ មិនបានរកឃើញថាជាប់ពាក់ព័ន្ធជាមួយក្រុមហ៊ុនឯកជនណាមួយ ដែលមានទីតាំងជាប់តំបន់ព្រៃឡង់ឡើយ ទោះបីកងរាជអាវុធហត្ថលើផ្ទៃប្រទេស ចាប់បានឈើជាច្រើនម៉ែត្រគូប នៅក្នុងបរិវេណក្រុមហ៊ុនទាំងនោះក្ដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ