បក្សភ្លើងទៀនគ្រោងធ្វើបាតុកម្មអហិង្សា ប្រសិនបើគ.ជ.ប បដិសេធមិនចុះបញ្ជីឲ្យបក្សប្រឆាំងចូលរួមការបោះឆ្នោត
គណបក្សភ្លើងទៀនគ្រោងនឹងធ្វើបាតុកម្មតាមបែបអហិង្សា ប្រសិនបើគណៈកម្មាធិការជាតិរៀបចំការបោះឆ្នោតមិនព្រមទទួលយកឯកសារបញ្ជាក់បន្ថែម នៅក្នុងការចុះបញ្ជីគណបក្សភ្លើងទៀន សម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៧។ ការសម្រេចនេះ ធ្វើឡើងតាមរយៈកិច្ចប្រជុំរបស់គណៈកម្មាធិការនាយកគណបក្សភ្លើងទៀន បន្ទាប់ពីគណបក្សប្រឆាំងមួយនេះ កំពុងប្រឈមនឹងកង្វះឯកសារចុះបញ្ជីនៅគ.ជ.ប សម្រាប់ការបោះឆ្នោតខែកក្កដាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៣
ថ្លែងប្រាប់វិទ្យុបារាំងអន្តរជាតិ នៅថ្ងៃសៅរ៍នេះ លោក រ៉ុង ឈុន អនុប្រធានគណបក្សភ្លើងទៀន ថា នេះជាជម្រើសចុងក្រោយបំផុតរបស់គណបក្សភ្លើងទៀន ដែលបង្ខំចិត្តត្រូវប្រមូលផ្តុំក្បាលម៉ាស៊ីន សមាជិក សកម្មជន និងអ្នកគាំទ្ររបស់ខ្លួន តស៊ូមតិដោយសន្តិវិធី ប្រសិនបើគ.ជ.ប នៅតែប្រកែកមិនចុះបញ្ជីឲ្យគណបក្សភ្លើងទៀនចូលរួមការបោះឆ្នោត។ តាមលោក រ៉ុង ឈុន ការផ្លាស់ប្តូរនីតិវិធីរបស់គ.ជ.ប ក្នុងការទទួលពាក្យរបស់គណបក្សនយោបាយនីមួយៗ បានធ្វើឲ្យគណបក្សភ្លើងទៀន ជួបប្រទះនឹងបញ្ហាកង្វះឯកសារ ខណៈដែលការចូលរួមចុះបញ្ជីកន្លងមកនោះ គឺគណបក្សភ្លើងទៀនប្រើប្រាស់តែលិខិតថតចម្លងប៉ុណ្ណោះ។
អនុប្រធានគណបក្សប្រឆាំងរូបនេះ បញ្ជាក់បន្ថែមថា គណបក្សភ្លើងទៀននឹងយកឯកសារដែលខ្លួនមាន ទៅប្រគល់ជូនគ.ជ.ប ជាថ្មី នៅរសៀលនៅថ្ងៃសៅរ៍នេះ សម្រាប់ការបញ្ជាក់ពីសមាសភាពរបស់គណបក្ស ដើម្បីចុះឈ្មោះសម្រាប់ការបោះឆ្នោតថ្នាក់ជាតិឆ្នាំ២០២៣។ យ៉ាងណាមិញ គោលជំហរក្នុងការធ្វើបាតុកម្មដោយហិង្សា ដើម្បីតស៊ូមតិ លោក រ៉ុង ឈុន ថានឹងធ្វើឡើង ប្រសិនបើគ.ជ.ប នៅតែមិនព្រមទទួលយកឯកសារដែលបានបញ្ជាក់ដោយក្រសួងមហាផ្ទៃរួចហើយនោះ។
សូមបញ្ជាក់ថា ក្នុងការចុះបញ្ជីគណបក្សនៅគ.ជ.ប គឺគណបក្សភ្លើងទៀនបានប្រឈមនឹងកង្វះឯកសារចំនួន២ ដែលគ.ជ.ប បានតម្រូវ។ នោះគឺ បង្កាន់បង់លុយនៅធនាគារ ដែលត្រូវឲ្យរតនាគារបញ្ជាក់បន្ថែម និងលិខិតបញ្ជាក់របស់ក្រសួងមហាផ្ទៃ ដែលនឹងត្រូវឲ្យរដ្ឋបាលក្រុងភ្នំពេញប្រថាប់ត្រា ដើម្បីដាក់ចូលឲ្យគ.ជ.ប ជាឯកសារបញ្ជាក់បន្ថែម។ យ៉ាងណាមិញលិខិតរបស់ក្រសួងមហាផ្ទៃ ដែលបានចេញបញ្ជាក់ពីសមាសភាពរបស់គណបក្សភ្លើងទៀន ថាជាគណបក្សនយោបាយត្រឹមត្រូវនោះ ត្រូវបានលោក រ៉ុង ឈុន បញ្ជាក់ថា គ.ជ.ប បានបដិសេដមិនព្រមទទួល ហើយទាមទាររកឯកសារច្បាប់ដើម ដែលគណបក្សភ្លើងទៀនបានបាត់បង់។
បញ្ហានេះ ក្រុមក្បាលម៉ាស៊ីនរបស់គណបក្សភ្លើងទៀន បានជួបជាមួយនឹងតំណាងក្រសួងមហាផ្ទៃ នៅថ្ងៃសុក្រទី១២ឧសភា ដើម្បីសម្រួលលើបញ្ហាចេញច្បាប់ដើម សម្រាប់ការដាក់ជូនទៅគ.ជ.ប។ ក៏ប៉ុន្តែ លោក រ៉ុង ឈុន បានអះអាងពីជំនួបជាមួយក្រសួងមហាផ្ទៃនោះ ថា មិនទទួលបានផ្លែផ្កាអ្វីឡើយ ខណៈដែលក្រសួងមហាផ្ទៃលើកឡើងពីលិខិតដែលខ្លួនបានចេញជាសេចក្តីបញ្ជាក់មួយជាស្រេច កាលពីថ្ងៃទី៥ឧសភា។
មកទល់ពេលនេះ មានរយៈ៧ថ្ងៃហើយ ដែលគ.ជ.ប បានតម្រូវឲ្យគណបក្សភ្លើងទៀន កែប្រែនិងភ្ជាប់លិខិតច្បាប់ដើមរបស់គណបក្សមកកាន់គ.ជ.ប ដើម្បីចុះបញ្ជីចូលរួមការបោះឆ្នោត។ តាមកាលកំណត់ឱសានវាទរយៈពេល៧ថ្ងៃ ក្រោយការដាក់បញ្ជីទៅគ.ជ.ប កាលពីថ្ងៃទី៧ឧសភា គណបក្សភ្លើងទៀនអាចប្រឈមនឹងការបាត់បង់ឱកាសចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧ ប្រសិនបើការដាក់ឯកសារបន្ថែមនៅរសៀលនេះបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ