លោក សុន ឆ័យ ថាកុំអន់ចិត្តប្រសិនបើគណបក្សភ្លើងទៀនមិនត្រូវបានអនុញ្ញាតឲ្យចូលរួមបោះឆ្នោត
លោក សុន ឆ័យ អនុប្រធានគណបក្សភ្លើងទៀន អះអាងថា លោកមិនគាំទ្រចំពោះការប៉ុនប៉ងប្រមូលផ្តុំកម្លាំង ដើម្បីប្រឆាំង ប្រសិនបើ គ.ជ.ប មិនចុះបញ្ជីឲ្យគណបក្សភ្លើងទៀនចូលរួមការបោះឆ្នោតនោះទេ។ នេះបើតាមសំឡេងនៅក្នុងវីដេអូមួយដែលផ្សព្វផ្សាយដោយបណ្តាញព័ត៌មានស្និទនឹងរដ្ឋាភិបាលនៅថ្ងៃចន្ទនេះ។ ការចេញមុខបញ្ជាក់ពីជំហរបស់លោក សុន ឆ័យ ធ្វើឡើងបន្ទាប់ពីលោក ហ៊ុន សែន បានព្រមានចាប់ខ្លួនមេដឹកនាំគណបក្សភ្លើងទៀន ប្រសិនបើហ៊ានចេញតវ៉ា ប្រសិនគណបក្សប្រឆាំងនេះមិនអាចចូលរួមបោះឆ្នោតបាន។
ចុះផ្សាយនៅថ្ងៃ៖
ស្តាប់ - ០១:៥១
តាមរយៈវីដេអូដែលផ្សព្វផ្សាយដោយFresh News លោក សុន ឆ័យ ថ្លែងថា កាលពីថ្ងៃទី១២ ខែឧសភា មានការប្រជុំគណៈកម្មាធិការនាយកគណបក្សភ្លើងទៀនតែលោកអះអាងថាលោកអត់បានចូលរួមទេ។លោកថា ការប្រជុំនោះគឺមានក្រុមអ្នកខ្វល់ខ្វាយ មួយចំនួននៅក្នុងជួរមេដឹកនាំដែលមិនយល់ពីនីតិវិធីការងារ ហើយនាំគ្នាឆ្លេឆ្លា ត្រៀមកម្លាំងដើម្បីធ្វើកូដកម្ម ឬតវ៉ា ប្រសិនគណបក្សប្រឆាំងនេះមិនអាចចូលរួមបោះឆ្នោតបាន។
សម្រាប់ លោក សុន ឆ័យ លោកថាលោកមិនបានដឹងរឿងនេះទេ ហើយថាដោយសារតែការប្រកាសបែបនេះហើយទើបនាំឱ្យមានបញ្ហានៅថ្ងៃនេះ។
លោក សុន ឆ័យ លើកឡើងថា សូមកុំមានការអាក់អន់ចិត្ត អន់ស្រពន់អី ប្រសិនគណបក្សប្រឆាំងនេះមិនអាចចូលរួមបោះឆ្នោតបាន ដោយចាត់ទុកថា នេះមកពីកំហុសរបស់គណបក្សនេះផងដែរ។
ក្រោយចេញសេចក្តីប្រកាសពីជំហរប្រមូលកម្លាំងតវ៉ាកាលពីថ្ងៃទី១២ឧសភា គណបក្សភ្លើងទៀន នៅថ្ងៃទី១៤ឧសភា បានចេញសេចក្តីប្រកាសម្តងទៀតដែលមានខ្លឹមសារទាត់ចោលជំហរធ្វើការតវ៉ា ប្រសិន គជប មិនចុះបញ្ជីឲ្យគណបក្សប្រឆាំងនេះចូលរួមបោះឆ្នោតនៅថ្ងៃទី២៣កក្កដាក៏ដោយចុះ។
ការបន្ទន់ជំហរបស់គណបក្សប្រឆាំង គឺធ្វើឡើងក្រោយពីលោក ហ៊ុន សែន ចេញសារតាមឡេក្រាម ព្រមានចាប់ខ្លួនមេដឹកនាំគណបក្សភ្លើងទៀន ប្រសិនបើហ៊ានចេញតវ៉ា ដោយលោកប្រមុខរដ្ឋាភិបាលចាត់ទុកថា ជាការបង្កចលាចល ខណៈកម្ពុជាកំពុងរៀបចំព្រឹត្តិការណ៍ស៊ីហ្គេម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ