គណបក្សនៅក្រៅរដ្ឋាភិបាលសោកស្តាយដែលបក្សភ្លើងទៀនមិនត្រូវបានអនុញ្ញាតឲ្យចូលរួមបោះឆ្នោត
គណបក្សនៅក្រៅរដ្ឋាភិបាលមួយបានសំដែងការសោកស្តាយចំពោះសេចក្តីសម្រេចរបស់គជប ដែលបដិសេធមិនឲ្យគណបក្សភ្លើងទៀនចូលរួមការបោះឆ្នោតនៅថ្ងៃទី២៣កក្កដា។ ការបដិសេធមិនឲ្យបក្សជំទាស់ដែលមានសក្តានុពលចូលរួមប្រកួត នេះគឺប៉ះពាល់ដល់ដំណើរការបោះឆ្នោតដោយយុត្តិធម៌ និងតាមបែបប្រជាធិបតេយ្យសេរីពហុបក្ស។ នេះបើតាមគណបក្សប្រជាធិបតេយ្យមូលដ្ឋាន ខណៈគណបក្សនយោបាយខ្លះទៀត គាំទ្រសេចក្តីសម្រេចរបស់គជប។
ចុះផ្សាយនៅថ្ងៃ៖
ស្តាប់ - ០១:៤៧
សម្រាប់គណបក្សប្រជាធិបតេយ្យមូលដ្ឋានដែលអះអាងថាមាននិន្នាការប្រជាធិបតេយ្យ យល់ថា ការបដិសេធរបស់គជប មិនឲ្យគណបក្សភ្លើងទៀនចូលរួមការបោះឆ្នោតក្រោមហេតុផលមិនបានភ្ជាប់ឯកសារមួយចំនួនមកជាមួយនោះ គឺមានភាពស្មុគស្មាញទាក់ទងទម្រង់ឯកសារគតិយុត្តិ។
បើតាមគណបក្សប្រជាធិបតេយ្យមូលដ្ឋាន បញ្ហានេះនឹងមិនកើតឡើងទេប្រសិនបើ ក្រសួងមហាផ្ទៃចេញជូនគណបក្សភ្លើងទៀន នូវលិខិតតាមតម្រូវការរបស់គជប សម្រាប់ចុះបញ្ជីគណបក្សនយោបាយឈរឈ្មោះបោះឆ្នោត។
គណបក្សនេះកត់សំគាល់ពីការខិតខំរបស់គណបក្សភ្លើងទៀនក្នុងការស្នើសុំក្រសួងមហាផ្ទៃចេញលិខិតគិតិយុត្តិស្តីពីការចុះបញ្ជីគណបក្សភ្លើងទៀននៅក្រសួងមហាផ្ទៃ និងព្យាយាមបំពេញតាមលក្ខណ្ឌដែលគជប តម្រូវផងដែរ។ ម្យ៉ាងគណបក្សនេះក៏ត្រូវបានអនុញ្ញាតឲ្យចូលរួមប្រកួតការបោះឆ្នោតថ្នាក់ឃុំ សង្កាត់ ឆ្នាំ២០២២ និងការបោះឆ្នោតក្រុមប្រឹក្សាក្រុង ស្រុក ដែលទើបបង្កើតថ្មី នាឆ្នាំ២០២៣ទៀតផង។
បើតាមគណបក្សប្រជាធិបតេយ្យមូលដ្ឋាន ការបដិសេធមិនឲ្យបក្សជំទាស់ដែលមានសក្តានុពលចូលរួមប្រកួត គឺប៉ះពាល់ដល់ដំណើរការបោះឆ្នោតដោយយុត្តិធម៌ និងតាមបែបប្រជាធិបតេយ្យសេរីពហុបក្ស។
ទោះជាយ៉ាងណា គេឃើញមានគណបក្សនយោបាយមួយចំនួនដែលជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់នៅក្រោមដំបូលរដ្ឋាភិបាល បានគាំទ្រការសម្រេចរបស់គជប ដែលបដិសេធមិនឲ្យគណបក្សភ្លើងទៀនចូលរួមការបោះឆ្នោតខាងមុខនេះ។
នៅក្នុងការប្រកាសគាំទ្ររបស់ខ្លួន ភ្លាមៗ ទន្ទឹមគ្នានោះ លោក ពេជ្រ ស្រស់ ប្រធានគណបក្សយុវជនកម្ពុជា បានចាត់ទុកការសម្រេចរបស់គជប ថាឆ្លុះបញ្ចាំងពីការអនុវត្តច្បាប់ស្មើភាពគ្នា ហើយថែមទាំងស្នើឲ្យក្រុមប្រឹក្សាធម្មនុញ្ញាតម្កល់សេចក្តីនេះទុកជាបានការទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ