ទូត និងអង្គការអន្តរជាតិបន្តថ្កោលទោសការបដិសេធចុះបញ្ជីគណបក្សភ្លើងទៀនចូលរួមការបោះឆ្នោត
សំណុំរឿងបដិសេធការចុះបញ្ជីគណបក្សភ្លើងទៀន មិនឲ្យចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧ នៅទទួលបន្តរងប្រតិកម្មពីបណ្តាទូត និងអង្គការសង្គមស៊ីវិលអន្តរជាតិ ដែលធ្វើការលើផ្នែកប្រជាធិបតេយ្យ និងសិទ្ធិមនុស្ស។ ប្រតិកម្មពីបណ្តាទូត និងអង្គការសង្គមស៊ីវិលអន្តរជាតិ នៅតែស្រោចការថ្កោលទោសចំពោះការសម្រេចរបស់គ.ជ.ប ដែលបដិសេធការចុះបញ្ជីរបស់គណបក្សភ្លើងទៀន ដែលជាគណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០៣:១៥
«ការសម្រេចបដិសេធ ការចុះឈ្មោះគណបក្សភ្លើងទៀនដោយចោទថាមិនបានបំពេញឯកសារត្រឹមត្រូវនោះ ធ្វើឲ្យខូចដល់លទ្ធិប្រជាធិបតេយ្យនៅកម្ពុជាមុនការបោះឆ្នោតជាតិនៅខែកក្កដា ឆ្នាំ២០២៣។» នេះគឺជាការបញ្ជាក់របស់ កញ្ញា Stephanie Arzate មន្ត្រីនាំពាក្យស្ថានទូតអាមេរិកប្រចាំទីក្រុងភ្នំពេញ តាមរយៈប្រព័ន្ធសារអាឡិចត្រនិច ដោយបានបន្ថែមទៀតថា ការគំរាមកំហែង និងឧប្បត្តិហេតុនៃការយាយីដែលផ្តោតលើសង្គមស៊ីវិល ប្រព័ន្ធផ្សព្វផ្សាយឯករាជ្យ និងគណបក្សប្រឆាំង បានរារាំងសិទ្ធិរបស់ប្រជាពលរដ្ឋកម្ពុជាក្នុងការចូលរួមក្នុងលទ្ធិប្រជាធិបតេយ្យពហុបក្ស។
បើតាមមន្ត្រីនាំពាក្យស្ថានទូតអាមេរិក គឺ អាមេរិកនៅតែជំរុញឱ្យអាជ្ញាធរកម្ពុជាបើកលំហនយោបាយ និងពលរដ្ឋឡើងវិញ រួមទាំងការបញ្ចប់ការយាយីគណបក្សប្រឆាំង។
ដោយឡែកសេចក្តីថ្លែងការណ៍រួមនៃអង្គការអន្តរជាតិចំនួន២ផ្សេងទៀត បានថ្កោលទោសយ៉ាងដាច់អហង្ការចំពោះការសម្រេចរបស់គណៈកម្មាធិការជាតិរៀបចំការបោះឆ្នោត ដែលបានបដិសេធក្នុងការចុះបញ្ជីគណបក្សភ្លើងទៀន ចូលរួមការបោះឆ្នោតខែកក្កដាខាងមុខ។ សេចក្តីថ្លែងការណ៍រួមរបស់ វេទិកាអាស៊ីដើម្បីសិទ្ធិមនុស្ស និងការអភិវឌ្ឍ និងអង្គការសម្ព័ន្ធភាពពិភពលោកសម្រាប់ការចូលរួមរបស់ប្រជាពលរដ្ឋ ថ្កោលទោសការសម្រេចរបស់គ.ជ.ប ថាកាន់តែបំផ្លាញសិទ្ធិពលរដ្ឋខ្មែរក្នុងការជ្រើសរើសតំណាងរបស់ពួកគេ។
ការរារាំងគណបក្សប្រឆាំងដ៏សំខាន់ មិនឱ្យឈរឈ្មោះក្នុងការបោះឆ្នោតនាពេលខាងមុខ ដោយប្រើមូលហេតុកង្វះឯកសារដើមជាលេស បានបញ្ជាក់ថា រដ្ឋាភិបាលលោក ហ៊ុន សែន កំពុងបង្ហាញពីការមិនគោរពទាំងស្រុងចំពោះគោលការណ៍នៃការបោះឆ្នោតដោយសេរី និងយុត្តិធម៌។ នេះបើតាមលោកស្រី Mary Aileen Bacalso នាយិកាប្រតិបត្តិវេទិកាអាស៊ីដើម្បីសិទ្ធិមនុស្ស និងការអភិវឌ្ឍ។
ទាំងFORUM-ASIA និង CIVICUS ជំរុញឱ្យរដ្ឋាភិបាលកម្ពុជាឈប់ប្រើប្រព័ន្ធច្បាប់ដើម្បីកម្ទេចគណបក្សប្រឆាំង ជាពិសេសនៅមុនការបោះឆ្នោត។ ហើយរដ្ឋាភិបាលកម្ពុជា គួរតែអនុវត្តតាមអនុសាសន៍ដែលធ្វើឡើងដោយយន្តការអន្តរជាតិសម្រាប់ការការពារសិទ្ធិមនុស្ស និងលំហស៊ីវិលនៅក្នុងប្រទេស។
ជាការកត់សម្គាល់ប្រតិកម្មរបស់បណ្តាទូត និងអង្គការអន្តរជាតិ បានធ្លាក់ចុះមកជាបន្តបន្ទាប់ ក្រោយពេលគ.ជ.ប កាលពីថ្ងៃទី១៥ បានប្រកាសបដិសេធការចុះបញ្ជីគណបក្សភ្លើងទៀន សម្រាប់ការចូលរួមការបោះឆ្នោតថ្នាក់ជាតិ២០២៣ ដោយសារតែកង្វះឯកសារច្បាប់ដើម។ បណ្តាប្រតិកម្មពីសហគមន៍អន្តរជាតិ បានធ្លាក់មក រាប់ចាប់តាំងពី អូស្ត្រាលី អាល្លឺម៉ង់ អង់គ្លេស បារាំង សហភាពអឺរ៉ុប សភាអាស៊ានផ្នែកសិទ្ធិមនុស្ស និងអង្គការអន្តរជាតិដែលឃ្លាំមើលកិច្ចការបោះឆ្នោតនៅអាស៊ី។
តែយ៉ាងណាប្រតិកម្មទាំងនោះ មិនធ្វើឲ្យរដ្ឋាភិបាលកម្ពុជាឈឺក្បាល ខណៈដែលក្រសួងការបរទេសកម្ពុជាបានចេញមកច្រានចោលចំពោះការរិះគន់ទាំងអស់ដែលបានធ្វើឡើង។ តាមសេចក្តីថ្លែងការណ៍របស់ក្រសួងការបរទេសកម្ពុជា ការមិនអាចចុះបញ្ជីចូលរួមការបោះឆ្នោតបានរបស់គណបក្សនយោបាយមួយ គឺដោយសារតែគណបក្សនោះមិនយកចិត្តទុកដាក់ចំពោះច្បាប់ និងបទប្បញ្ញត្តិបោះឆ្នោត ក៏ដូចជាសេចក្តីជូនដំណឹងនានារបស់ គ.ជ.ប។
នៅក្នុងសំណុំរឿងនេះ គណបក្សភ្លើងទៀនបានប្រកាសពីការបន្តនីតិវិធីប្តឹងជំទាស់ការសម្រេចរបស់គ.ជ.ប ទៅកាន់ក្រុមប្រឹក្សាធម្មនុញ្ញ ដើម្បីទាមទារឲ្យគណបក្សខ្លួនអាចចូលរួមការបោះឆ្នោតពេលខាងមុខ។ បើតាមអ្នកនាំពាក្យបក្ស គឺការប្តឹងជំទាស់នឹងធ្វើឡើងនៅថ្ងៃទី២០ឧសភាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ