នយោបាយថៃប្រែប្រួល៖ លោក សម រង្ស៊ី ប្រកាសវិលចូលប្រទេសកម្ពុជាជាលើកទី៣
លោក សម រង្ស៊ី ប្រធានស្ដីទីអតីតគណបក្សសង្រ្គោះជាតិ បានប្រកាសវិលចូលប្រទេសកម្ពុជាសារជាថ្មី នាពេលឆាប់ៗខាងមុខនេះ ប៉ុន្តែការវិលចូលប្រទេសកម្ពុជានៅថ្ងៃណានោះ លោកនៅមិនទាន់កំណត់ឲ្យបានច្បាស់លាស់នៅឡើយទេ។ ការប្រកាសនេះ ធ្វើឡើងក្នុងជំនួបសំណេះសំណាលជាមួយព្រះសង្ឃ និងពលរដ្ឋខ្មែររស់នៅទីក្រុងសុីដនី ប្រទេសអូស្រ្តាលី នៅថ្ងៃទី២២ ខែឧសភា។ ប៉ុន្តែអ្នកនាំពាក្យគណបក្សប្រជាជនកម្ពុជា ដែលជាគណបក្សកាន់អំណាច លោក សុខ ឥសាន ថានេះគ្រាន់តែជាការស្រមើស្រមៃរបស់លោក សម រង្ស៊ី តែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២៧
ថ្លែងនៅចំពោះមុខអ្នកគាំទ្រនៅទីក្រុងស៊ីដនី ប្រទេសអូស្រ្តាលី លោក សម រង្ស៊ី ប្រមុខបក្សប្រឆាំង បានប្រកាសប្ដេជ្ញាថាលោកនឹងវិលត្រឡប់ចូលមកប្រទេសកម្ពុជាវិញនាពេលឆាប់ៗខាងមុខនេះ។ បើតាមប្រមុខបក្សឆាំង ការប្រកាសវិលចូលប្រទេសកម្ពុជាសារថ្មីនេះគឺដើម្បីមកជួយប្រជាពលរដ្ឋខ្មែរឲ្យងើបឡើងទាមទារនូវសិទ្ធិសេរីភាព និងយុត្តិធម៌។ ប៉ុន្តែយ៉ាងណាការប្រកាសវិលចូលប្រទេសកម្ពុជាសារថ្មីរបស់លោក សម រង្ស៊ីនេះ ពុំទាន់កំណត់ថ្ងៃជាក់លាក់នៅឡើយទេ។
ប៉ុន្តែលើកនេះ លោក សម រង្ស៊ី ហាក់មានសង្ឃឹមថា នឹងវិលចូលមកប្រទេសកម្ពុជាបានតាមរយះទឹកដីថៃ បន្ទាប់ពីគណបក្សឆាំងនៅថៃឈ្នះការបោះឆ្នោតត្រៀមទៅដឹកនាំរដ្ឋាភិបាល ដែលអាចបើកផ្លូវឲ្យលោកចូលទឹកថៃបាន។ ផ្ទុយពីរដ្ឋាភិបាលដែលដឹកនាំដោយលោក ប្រាយុទ្ធចាន់អូចា ដែលមិនអនុញ្ញាតឲ្យលោកចូលទឹកដីថៃបាន ដោយសារតែមានការស្នើសុំពីរដ្ឋាភិបាលកម្ពុជា។
ទន្ទឹមនឹងការប្រកាសវិលចូលប្រទេសកម្ពុជាសារជាថ្មី លោក សម រង្ស៊ី ក៏បានបកស្រាយពីភាពបរាជ័យរបស់លោកដែលមិនអាចវិលចូលប្រទេសកម្ពុជាកាលពីឆ្នាំ២០១៩ ប្រាប់ទៅអ្នកគាំទ្រផងដែរ។ បើតាមលោក សម រង្ស៊ី ការបរាជ័យរបស់លោកនៅពេលនោះ ដោយសារលោកនាយករដ្ឋនាយករដ្ឋមន្រ្តី ហ៊ុន សែន បានហាមមិនឲ្យក្រុមហ៊ុនអាកាសចរណ៍ទាំងអស់ដឹកលោកចូលមកប្រទេសកម្ពុជា និងបានស្នើសុំភាគីថៃកុំឲ្យលោកយកទឹកដីថៃធ្វើដំណើរចូលមកប្រទេសកម្ពុជាជាដើម។
ទាក់ទិនទៅនឹងការប្រកាសវិលចូលប្រទេសកម្ពុជាសារថ្មីរបស់លោក សម រង្ស៊ីនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលជាគណបក្សកាន់អំណាចកំពុងដឹកនាំរដ្ឋាភិបាល បានចាត់ទុកការប្រកាសនេះ គ្រាន់តែជាការស្រមើស្រមៃរបស់លោក សម រង្ស៊ីតែប៉ុណ្ណោះ។ បើតាមលោក សុខ ឥសាន ប្រសិនបើលោក សម រង្ស៊ី ហ៊ានមកជាន់ទឹកដីកម្ពុជាមែន ច្បាស់ណាស់នឹងត្រូវចាប់ខ្លួន ព្រោះលោកត្រូវបានតុលាការផ្ដន្ទាទោសឲ្យជាប់ពន្ធនាគារជាច្រើនឆ្នាំក្នុងបទល្មើសផ្សេងៗ។
ជាការកត់សម្គាល់ការប្រកាសវិលចូលប្រទេសកម្ពុជារបស់លោក សម រង្ស៊ីនេះ មិនមែនជារឿងថ្មីនោះទេ។ មិនមែនជារឿងថ្មី ដោយសារនៅថ្ងៃទី០៩ វិច្ឆិកា ឆ្នាំ២០១៩ លោក សម រង្ស៊ី ក៏ធ្លាប់បានប្រកាសវិលចូលមកប្រទេសកម្ពុជាដែរ តែត្រូវបរាជ័យ ដែលកាលនោះធ្វើឲ្យមានអ្នកគាំទ្ររបស់លោកជាច្រើននាក់ត្រូវបានអាជ្ញាធរចាប់ខ្លួន និងចោទប្រកាន់ថារួមគំនិតក្បត់ជាមួយនឹងលោក។ ក្រៅពីនេះ លោក សម រង្ស៊ី នៅមានបទល្មើសជាច្រើនទៀត ដែលត្រូវបានតុលាការផ្ដន្ទាទោសឲ្យជាប់ពន្ធនាគារជាច្រើនឆ្នាំ ដូចជាបទសល្មើសក្បត់ជាតិ ចង់ផ្ដួលរំលំរដ្ឋាភិបាល បទប្រមាថព្រះមហាក្សត្រជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ