HRW៖ «អន្តរជាតិត្រូវថ្កោលទោសលោក ហ៊ុន សែន និងរដ្ឋាភិបាលលោកដើម្បីបញ្ចប់យុទ្ធសាស្ត្របំភិតបំភ័យ មុនការបោះឆ្នោត»
អង្គការឃ្លាំមើលសិទ្ធិមនុស្សអន្តរជាតិ Human Rights Watch (HRW) នៅថ្ងៃទី២៤ឧសភាម្សិលមិញ បានចេញសេចក្តីប្រកាស ទាមទារឱ្យរដ្ឋាភិបាលកម្ពុជាដោះលែង លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា និងសហការី២រូបទៀត ជាបន្ទាន់ និងដោយគ្មានលក្ខខណ្ឌ។ ក្នុងសេចក្តីប្រកាស លោក Phil Robertson នាយករងទទួលបន្ទុកកិច្ចការអាស៊ី នៃអង្គការការពារសិទ្ធិមនុស្ស ចោទថា ប្រមុខរដ្ឋាភិបាលកម្ពុជា លោក ហ៊ុន សែន កំពុងប្រើប្រាស់យុទ្ធសាស្ត្របំបិទសំឡេងរិះគន់ នៅមុនការបោះឆ្នោតខាងមុខ ដែលសហគមន៍អន្តរជាតិមិនត្រូវបិទភ្នែកនោះឡើយ។
ចុះផ្សាយនៅថ្ងៃ៖
ស្តាប់ - ០៣:០៨
នៅក្រោយតុលាការខេត្តរតនៈគីរី បានសម្រេចចោទប្រកាន់សកម្មជនការពារសិទ្ធិកសិករ ដែលជាថ្នាក់ដឹកនាំនិងបុគ្គលិករបស់អង្គការសមាគមសម្ព័ន្ធសហគមន៍កសិករកម្ពុជា ៣រូប ពីបទ រួមគំនិតក្បត់និងញុះញង់ ប្រតិកម្មបន្តធ្លាក់មកជាបន្តបន្ទាប់។ នៅថ្ងៃទី២៤ ខែឧសភា ឆ្នាំ២០២៣ អង្គការឃ្លាំមើលសិទ្ធិមនុស្សអន្តរជាតិ Human Rights Watch បានចេញសេចក្តីប្រកាស ហៅបទចោទនោះថា ជាបទចោទដោយហេតុផលនយោបាយសុទ្ធសាធ។ Human Rights Watch ស្នើឱ្យរដ្ឋាភិបាលកម្ពុជាដោះលែង អ្នកទាំង៣ ជាបន្ទាន់ និងដោយគ្មានលក្ខខណ្ឌ។
លោក Phil Robertson នាយករងទទួលបន្ទុកកិច្ចការអាស៊ី នៃអង្គការការពារសិទ្ធិមនុស្ស បានលើកឡើងថា ដំណើរការផ្លូវតុលាការលើសកម្មជនការពារសិទ្ធិកសិករ ទាំង៣រូបដែលធ្វើឡើងក្រោមបទចោទប្រកាន់ក្លែងក្លាយ បង្ហាញឱ្យឃើញកាន់តែច្បាស់ អំពីចេទនាបំបិទមាត់សំឡេងរិះគន់រដ្ឋាភិបាលកម្ពុជា នៅមុនការបោះឆ្នោតជាតិខាងមុខ។ លោក Phil Robertson ស្នើឱ្យមានការថ្កោលទោសពីអន្តរជាតិ សម្តៅផ្ទាល់ លើលោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់លោក ដើម្បីទាមទារឱ្យបិទបញ្ចប់នូវយុទ្ធសាស្ត្របំភិតបំភ័យ។
ជាការឆ្លើយតប លោក កត្តា អ៊ន អ្នកនាំពាក្យគណៈកម្មាធិការជាតិសិទ្ធិមនុស្សកម្ពុជា តាមរយៈវិទ្យុបារាំង នៅថ្ងៃទី២៥ ខែឧសភា ឆ្នាំ២០២៣នេះ បញ្ជាក់ថា ដំណើរការតុលាការកម្ពុជាក្នុងសំណុំរឿងសកម្មជនការពារសិទ្ធិកសិករនេះ ធ្វើឡើងដោយគោរពនូវសិទ្ធិមនុស្ស ផ្អែកទៅលើច្បាប់ មានអង្គហេតុ និងភស្តុតាងគាំទ្រដល់ការចោទប្រកាន់ត្រឹមត្រូវ។ លោក កត្តា អ៊ន ថា សំណុំរឿងនេះ មានតែតុលាការតែប៉ុណ្ណោះ ដែលមានសិទ្ធិសម្រេច។ ពោល មិនមែនអង្គការរដ្ឋាភិបាលក្រៅស្រុកណាមួយ ឬ ស្ថាប័នណាមួយ អាចមកសម្រេច មកបញ្ជាលើប្រព័ន្ធតុលាការកម្ពុជាបានឡើយ។
ជាថ្មីម្តងទៀត លោក កត្តា អ៊ន អ្នកនាំពាក្យគណៈកម្មាធិការជាតិសិទ្ធិមនុស្សកម្ពុជា បញ្ជាក់ថា សិទ្ធិសេរីភាពរបស់សង្គមស៊ីវិល ត្រូវតែស្ថិតនៅក្នុងបន្ទាត់នៃលក្ខខណ្ឌ ដែលបានចុះបញ្ជីនៅក្រសួងមហាផ្ទៃ ហើយអ្វីដែលផ្ទុយពីលក្ខខណ្ឌនោះ សកម្មភាពល្មើសនឹងច្បាប់ ប្រើប្រាស់តួនាទីដោយការជ្រកក្រោមស្លាកសង្គមស៊ីវិល គឺត្រូវមានចំណាត់ការផ្លូវច្បាប់។
គួរជម្រាបបន្ថែមថា សង្គមស៊ីវិលនិងបណ្តាញសហគមន៍ចំនួន៥៨ នៅថ្ងៃទី២៤ ខែឧសភា ឆ្នាំ២០២៣ បានចេញសេចក្តីថ្លែងការណ៍រួម ស្នើឱ្យមានការដោះលែងនិងទម្លាក់បទចោទលើលោក ថេង សាវឿន និងសហការី២រូបទៀតដែរ។ សង្គមស៊ីវិលនិងបណ្តាញសហគមន៍ទាំងនោះ យល់ថា ការងាររបស់សកម្មជនសិទ្ធិមនុស្ស មិនត្រូវប្រដូចនឹងសកម្មភាពបទល្មើសព្រហ្មទណ្ឌ ដូចជាការញុះញង់ ឬ រួមគំនិតក្បត់ប្រឆាំងនឹងជាតិឡើយ។ និងបន្តថា ការចាប់ខ្លួនអ្នកទាំង៣នេះ មិនអាចដោះស្រាយបញ្ហាជម្លោះដីធ្លីរាំរ៉ៃ មកលើសមាជិករបស់សមាគមបានឡើយ ហើយក៏មិនអាចបំបិទសំឡេងរបស់អ្នកដឹកនាំនិងតំណាងសហគមន៍ ដែលកំពុងទាមទាររកយុត្តិធម៌នោះដែរ។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា និងសហការីទាំង២រូប នៅថ្ងៃទី២២ឧសភា ត្រូវបានតុលាការខេត្តរតនគីរីចោទប្រកាន់ពី បទចោទរួមគំនិតក្បត់តាមមាត្រា៤៥៣ និងបទចោទញុះញង់ តាមមាត្រា៤៩៥។ អ្នកទាំងបីប្រឈមនឹងជាប់ពន្ធនាគារដល់១០ឆ្នាំ និងពិន័យជាប្រាក់៤លានរៀល ប្រសិនបើរកឃើញថាមានទោស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ