លោក ហ៊ុន សែន យល់ថាការខ្វះឯកសារច្បាប់ដើមរបស់គណបក្សភ្លើងទៀនគឺជាឧបាយកលរបស់អ្នកណាម្នាក់
នៅក្នុងជំនួបសំណេះសំណាលជាមួយកម្មករ កម្មការិនីរោងចក្រកាត់ដេរនាព្រឹកថ្ងៃសុក្រនេះ នៅតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ លោកនាយករដ្ឋមន្ត្រី ហ៊ុន សែន បានថ្លែងថាលោកមិនជឿថាលិខិតចុះបញ្ជីគណបក្សច្បាប់ដើមរបស់(គណបក្សភ្លើងទៀន) បាត់នោះទេ។ លោកនាយករដ្ឋមន្ត្រីវិភាគថា លិខិតចុះបញ្ជីគណបក្សភ្លើងទៀនច្បាប់ដើម គឺស្ថិតនៅជាមួយបុគ្គលណាម្នាក់នៅឯក្រៅប្រទេស(ចំណុចនេះត្រូវគេគិតថាជាលោក សម រង្ស៊ី) ដែលមានបំណងមិនចង់ឲ្យគណបក្សភ្លើងទៀនចូលរួមការបោះឆ្នោត។ តាមលោក ហ៊ុន សែន ការធ្វើបែបនេះ គឺមានបំណងចង់ឲ្យបរទេសគាបសង្កត់កម្ពុជា។
ចុះផ្សាយនៅថ្ងៃ៖
សូមស្តាប់ប្រសាសន៍លោកនាយករដ្ឋមន្ត្រី ហ៊ុន សែន៖
សូមរម្លឹកថាប្រទេសកម្ពុជានឹងមានការបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ដោយមានគណបក្សចំនួន១៨ចូលរួម។ ដោយឡែកគណបក្សភ្លើងទៀន ដែលជាគណបក្សប្រឆាំងស្រួចស្រាល់ជាងគេ ត្រូវបានគណៈកម្មាធិការជាតិរៀបចំការបោះឆ្នោត(គ.ជ.ប)ទាត់ចោល ដោយសារមិនមានឯកសារចុះបញ្ជីគណបក្សច្បាប់ដើម។ ក្រុមប្រឹក្សាធម្មនុញ្ញកាលពីថ្ងៃព្រហស្បតិ៍ម្សិលមិញក៏បានតម្កល់សេចក្តីសម្រេចរបស់ គ.ជ.ប ដែរ ដែលជាសេចក្តីសម្រេចបិទផ្លូវតវ៉ា។ ជាមួយគ្នានេះ គណបក្សភ្លើងទៀនក៏បានសម្តែងការសោកស្តាយចំពោះសេចក្តីសម្រេចរបស់ចុងក្រោយរបស់ក្រុមប្រឹក្សាធម្មនុញ្ញ ដែលបានផាត់ចោលការចូលរួមរបស់គណបក្សប្រឆាំងមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ