អង្គការលើកលែងទោសអន្តរជាតិទាមទារឱ្យកម្ពុជាទម្លាក់ចោលការផ្តន្ទាទោសដល់ថ្នាក់ដឹកនាំសហជីពណាហ្គាវើលដ៍

អង្គការ​លើកលែងទោស​អន្តរជាតិ​ (Amnesty International)​ ទាមទារ​ឱ្យ​អាជ្ញាធរ​កម្ពុជា​ដោះលែង​ កញ្ញា​ ឈឹម ស៊ីថរ​ រួម​នឹង​ថ្នាក់​ដឹកនាំ​សហជីព​៦រូប​ផ្សេង​ទៀត​ជា​បន្ទាន់​ដោយ​ឥត​លក្ខខណ្ឌ ​ក្រោយ​តុលាការ​ក្រុង​ភ្នំពេញ​សម្រេច​ផ្តន្ទាទោស​អ្នក​ទាំង​៧​ក្នុង​សំណុំ​រឿង​ញុះញង់​បង្ក​ភាព​វឹកវរ​ក្នុង​សង្គម។​ នៅ​ចំពោះ​មុខ​ការ​សម្រេច​របស់​តុលាការ​នា​ពេលនេះ​ អង្គការ​ខាង​លើ​យល់​ថា​ កម្ពុជា​បាន​បំពាន​យ៉ាង​ធ្ងន់ធ្ងរ​ទៅ​លើ​ច្បាប់​ស្តី​ពី​សិទ្ធិ​មនុស្ស​អន្តរជាតិ។​

កញ្ញា ឈឹម ស៊ីថរ រួមនឹងថ្នាក់ដឹកនាំសហជីព © Internet

អង្គការលើកលែងទោសអន្តរជាតិដែលធ្វើការលើបញ្ហាសិទ្ធិមនុស្ស បានចេញមកជំរុញឱ្យតុលាការកម្ពុជា រួមនឹងអាជ្ញាធរផង គួរបញ្ឈប់ជាបន្ទាន់ចំពោះការផ្តន្ទាទោសមកលើថ្នាក់ដឹកនាំសហជីពនៃក្រុមហ៊ុនណាហ្គាវើលដ៍ក្រោមការចោទប្រកាន់ដែលមានខ្លឹមសារផ្សារភ្ជាប់នឹងនយោបាយ ហើយក៏ត្រូវដោះលែងអ្នកទាំង៧ដោយគ្មានលក្ខខណ្ឌអ្វីទាំងអស់។

ការចេញមកទាមទារបែបនេះ ក្រោយអង្គការលើកលែងទោសអន្តរជាតិសង្កេតឃើញថា រដ្ឋាភិបាលកម្ពុជាកំពុងបំពានសិទ្ធិមនុស្សយ៉ាងធ្ងន់ធ្ងរហើយប្រាស់ចាក់ពីអ្វីដែលជាកាតព្វកិច្ចរបស់កម្ពុជាក្នុងការគោរពច្បាប់ស្តីពីសិទ្ធិមនុស្សអន្តរជាតិ។  ខណៈអង្គការនេះយល់ថា កញ្ញា ឈឹម ស៊ីថរ និងថ្នាក់ដឹកនាំសហជីព៦រូបផ្សេងទៀតដែលតុលាការផ្តន្ទាទោសនោះ មិនបានប្រព្រឹត្តសកម្មភាពណាមួួយខុសពីច្បាប់ តែផ្ទុយទៅវិញមានតែចូលរួមការពារសិទ្ធិរបស់នយោជិតដែលត្រូវបានថៅកែបំពាន។

ដោយឡែក សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍បានបញ្ជាក់តាមសេចក្តីថ្លែងការណ៍របស់ខ្លួនថា ការផ្តន្ទាទោសចំពោះតំណាងសហជីពខ្លួន គឺជារឿងអយុត្តិធម៌ ហើយនេះជាប្រវត្តិសាស្ត្រដែលធ្វើឱ្យមានភាពអាម៉ាសចំពោះការសម្រេចមួយនេះ។

ត្បិតមានការទាមទារ និងលើកឡើងក្រោមទិដ្នភាពផ្សេងៗគ្នា តែសម្រាប់ លោក ជិន ម៉ាលីន អ្នកនាំពាក្យក្រសួងយុត្តិធម៌ស្នើឱ្យអង្គការអន្តរជាតិដែលឈឺឆ្អាលរឿងនេះ ពិនិត្យមើលនូវអង្គហេតុ និងអង្គច្បាប់ ពិសេសទៅលើសកម្មភាពនាពេលកន្លងមករបស់ថ្នាក់ដឹកនាំសហជីពទាំង៧រូបខាងលើ ថា​តើនេះជាការអនុវត្តសិទ្ធិ ឬជាសកម្មភាពដែលត្រូវចាត់ចូលជាបទល្មើសនៅកម្ពុជា។

បើតាមការបញ្ជាក់របស់លោក ជិន ម៉ាលីន រាល់សកម្មភាពដែលចាត់ទុកជាបទល្មើស និងមានភស្តុតាងគ្រប់គ្រាន់ មិនមែនជាការរំលោភបំពានសិទ្ធិមនុស្ស និងសិទ្ធិនយោបាយអ្វីឡើយ។ ហើយមន្ត្រីនាំពាក្យរូបនេះ​ចាត់ទុកការលើកឡើងរបស់អង្គការលើកលែងទោសអន្តរជាតិ គឺផ្អែកលើរូបភាពនយោបាយច្រើនជាងផ្អែកលើទិដ្ឋាភាពច្បាប់របស់កម្ពុជា។

សូមជម្រាបថា កាលពីថ្ងៃទី២៥ ខែឧសភា សាលាដំបូងរាជធានីភ្នំពេញបានសម្រេចផ្តន្ទាទោសកញ្ញា ឈឹម ស៊ីថរដែលកំពុងស្ថិតក្រោមការឃុំខ្លួនបណ្តោះអាសន្នស្រាប់ ឱ្យជាប់ពន្ធនាគារចំនួន២ឆ្នាំពីបទចោទញុះញង់បង្កភាពវឹកវរក្នុងសង្គម អនុលោមតាមមាត្រា៤៩៤ និង៤៩៥ នៃក្រមព្រហ្មទណ្ឌ។

ចំណែកថ្នាក់ដឹកនាំសហជីព៥រូបផ្សេងទៀតរួមមាន៖  កញ្ញា ឈឹម សុខន លោកស្រី ស៊ុន ស្រីពេជ្រ លោកស្រី ហៃ សុភាព លោកស្រី ឃ្លាំ សុបិន និង កញ្ញា ទូច សិរី តុលាការសម្រេចឱ្យជាប់ពន្ធនាគារ១ឆ្នាំ៦ខែ ដោយត្រូវឋិតក្រោមការត្រួតពិនិត្យរបស់តុលាការ ហើយស្ថិតនៅក្រៅឃុំ ខណៈលោកស្រី វី សុវណ្ណឌីវិញ ត្រូវជាប់ពន្ធនាគារ១ឆ្នាំ តែតុលាការសម្រេចព្យួរទោស៕