អង្គការតម្លាភាពថា រដ្ឋាភិបាលគួរដំឡើងកញ្ចប់ថវិកាឱ្យបាន៣០%នៃទំហំថវិកាជាតិសរុប សម្រាប់ផ្តល់ជូនរដ្ឋបាលថ្នាក់ក្រោមជាតិ
អង្គការតម្លាភាពកម្ពុជា ស្នើឱ្យរដ្ឋាភិបាល ពិសេសក្រសួងសេដ្ឋកិច្ច និងហរិញ្ញវត្ថុ ពិចារណាដំឡើងកញ្ចប់ថវិការដ្ឋសម្រាប់ផ្តល់ជូនរដ្ឋបាលថ្នាក់ក្រោមជាតិឱ្យកើនដល់៣០%នៃទំហំថវិកាជាតិសរុបប្រចាំឆ្នាំ ក្នុងឆ្នាំនីមួយៗ ក្រោយសង្កេតឃើញថា តម្រូវការនៅតាមរដ្ឋបាលថ្នាក់ក្រោមជាតិ ពិសេសនៅតាម ឃុំ សង្កាត់ ស្រុក ខណ្ឌ មានចំនួនច្រើន។ បើតាមអង្គការតម្លាភាព ការបង្កើតទំហំហិរញ្ញប្បទានសម្រាប់រដ្ឋបាលថ្នាក់ក្រោមជាតិនេះ ក៏បានផ្តល់ផលប្រយោជន៍មួយផ្នែកផងដល់ពលរដ្ឋរស់នៅក្នុងមូលដ្ឋាន។
ចុះផ្សាយនៅថ្ងៃ៖
ស្តាប់ - ០៣:០៧
លោក បុិច ពិសី ប្រធានអង្គការតម្លាភាពកម្ពុជាបានលើកឡើងថា ការស្នើឱ្យរដ្ឋាភិបាលបង្កើនទំហំកញ្ចប់ថវិកាឱ្យកើនដល់៣០%នៃទំហំថវិកាជាតិសរុបប្រចាំឆ្នាំនេះ គឺដើម្បីឆ្លើយតបទៅនឹងតម្រូវការចំបាច់មួយចំនួនដែលរដ្ឋបាលថ្នាក់ក្រោមជាតិជួបប្រទះ ពិសេសដើម្បីផ្តល់លទ្ធភាពគ្រប់គ្រាន់ក្នុងការប្រើប្រាស់កញ្ចប់ថវិការសម្រាប់អភិវឌ្ឍន៍ ភូមិ ឃុំ ស្រុក ខណ្ឌ និងក្នុងប្រតិបត្តិការរដ្ឋបាល។
តាមរយៈការសង្កេតប៉ុន្មានឆ្នាំមកនេះ លោក បុិច ពិសី មើលឃើញថា ការទម្លាក់កញ្ចប់ថវិកាទៅឱ្យរដ្ឋបាលថ្នាក់ក្រោមជាតិមានការកើនឡើង។ ប៉ុន្តែទំហំថវិកាទាំងនោះ នៅមិនទាន់ឆ្លើយតបបានគ្រប់គ្រាន់នៅឡើយ ដោយទាមទារឱ្យរដ្ឋាភិបាលពិចារណាដំឡើងទំហំថវិកាឱ្យកើនដល់ចន្លោះពី២៥ទៅ៣០% ខណៈក្នុងឆ្នាំ២០២៣នេះ កញ្ចប់ថវិកាដែលរដ្ឋបានទម្លាក់ទៅឱ្យរដ្ឋបាលថ្នាក់ក្រោមជាតិមានចំនួនជាង១២០០លានដុល្លារ ឬស្មើ១២.៩%នៃទំហំថវិកាជាតិសរុប។
តែយ៉ាងណា នៅចំពោះមុខការស្នើឱ្យដំឡើងទំហំថវិកាសម្រាប់រដ្ឋបាលថ្នាក់ក្រោមជាតិនេះ លោក បុិច ពិសីចង់ឃើញ ការទម្លាក់កញ្ចប់ថវិកា និងការប្រើប្រាស់ប្រកបដោយតម្លាភាព គណនេយ្យ និង រឹតបន្តឹងការត្រួតពិនិត្យតាមដាន ពិសេសលើលទ្ធកម្មសារធារណ ពីព្រោះដើម្បីជៀសវាងការប្រើប្រាស់ថវិកាខុសគោលដៅ និងមិនបានផ្តល់ផលប្រយោជន៍រួម ខណៈលោកសង្កេតឃើញថា ការគ្រប់គ្រងហិរញ្ញវត្ថុសាធារណរបស់រដ្ឋនៅមានភាពទន់ខ្សោយនៅឡើយ។
ដោយឡែកលោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិតសភា្យកម្ពុជាវាយតម្លៃថា ការប្រើប្រាស់ថវិកាជាតិរបស់រដ្ឋបាលថ្នាក់ក្រោមជាតិប្រមាណ៩០% គឺចំគោលដៅ និងប្រកបដោយតម្លាភាពពេញលេញ ខណៈ១០%ទៀតនៅមានភាពខ្វះចន្លោះដែលទាមទារឱ្យពិនិត្យបន្ថែម។
លោកបណ្ឌិត សង្កេតឃើញថា រាល់ការទូទាត់សាច់ប្រាក់ និងការចាយវាយរបស់រដ្ឋបាលថ្នាក់ក្រោមជាតិ ធ្វើឡើងដោយប្រព័ន្ធធនាគារ ដូច្នេះលោកអះអាងថា គ្មានឡើយការវាយថវិកាខុស និងគ្មានតម្លាភាព។ ខណៈការអភិវឌ្ឍន៍នៅមូលដ្ឋានវិញ លោកបណ្ឌិតកត់សម្គាល់ថា មានភាពច្បាស់លាស់ ដោយមន្ត្រីឃុំ សង្កាត់មិនមែនជាអ្នកកាន់កាប់សាច់ប្រាក់ដោយផ្ទាល់ឡើយ ពោលគឺរាល់ការអភិវឌ្ឍន៍ទាំងឡាយក្រុមហ៊ុនដែលទទួលបានសិទ្ធិអភិវឌ្ឍន៍ត្រូវដកកញ្ចប់ថវិកាដោយផ្ទាល់ពីរតនាគារជាតិ។
តាមរយៈការអនុវត្ដកម្មវិធីជាតិដំណាក់កាលទី២(២០២១-២០៣០) រាជរដ្ឋាភិបាលក្នុងឆ្នាំ២០២២ បានបង្កើនការវិភាជថវិកាដល់រដ្ឋបាលថ្នាក់ក្រោមជាតិជាង១ពាន់លានដុល្លារ។ ក្នុងនោះរដ្ឋបាលក្រុង-ស្រុក នីមួយៗទទួលបានជាមធ្យម៥៧ម៉ឺនដុល្លារ ក្នុងមួយឆ្នាំ និងឃុំ-សង្កាត់នីមួយៗទទួលបាន ១២៧, ០០០ដុល្លារក្នុងមួយឆ្នាំ។
ហើយបើយោងតាមនាយកដ្ឋានថវិកានីយកម្មអគ្គនាយកដ្ឋានថវិកានៃក្រសួងសេដ្ឋកិច្ចហិរញ្ញវត្ថុបានឱ្យដឹងថា នៅឆ្នាំ២០២៣នេះ រដ្ឋបានឧបត្ថម្ភធនបន្ថែមដល់ឃុំសង្កាត់នីមួយៗទទួលថវិកាជា មធ្យមចំនួន៦៣៣លានរៀល ឬប្រមាណ ១៥៦, ៤២០ដុល្លារអាមេរិក។ ក្នុងនោះ ថវិកាផ្នែកអភិវឌ្ឍន៍មូលនិធិឃុំសង្កាត់ ជាមធ្យមមានចំនួន ៣៥៨លានរៀល ឬសមមូល ៨៨ ០០០ដុល្លារអាមេរិក ក្នុងមួយឆ្នាំ គឺកើនឡើង២២.២ភាគរយធៀបនឹងច្បាប់ថវិកាជាតិឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ