បក្សភ្លើងទៀននៅតែរក្សាគម្រោងជួបជុំទាមទារចូលរួមការបោះឆ្នោតដើម្បីបង្ហាញភាពអយុត្តិធម៌
គម្រោងជួបជុំសមាជិកនិងអ្នកគាំទ្រប្រមាណជាង ១ម៉ឺននាក់ នៅទីលានប្រជាធិបតេយ្យរបស់គណបក្សភ្លើងទៀន ដើម្បីទាមទារចូលការបោះឆ្នោតថ្នាក់ជាតិឆ្នាំ២០២៣ នៅតែរក្សាជំហរដដែល បើទោះបីជាមានការព្រមានចាប់ខ្លួនក៏ដោយ។ ប៉ុន្តែគម្រោងជួបជុំតស៊ូមតិដោយសន្តិវិធីនេះ អាចធ្វើទៅបានលុះត្រាណាតែមានការអនុញ្ញាតពីសាលាក្រុងភ្នំពេញ និងក្រសួងមហាផ្ទៃជាមុនសិន។ នេះបើតាមលោក រ៉ុង ឈុន អនុប្រធានគណបក្សភ្លើងទៀន។
ចុះផ្សាយនៅថ្ងៃ៖
ស្តាប់ - ០១:៥៦
ថ្លែងប្រាប់វិទ្យុបារាំងអន្តរជាតិ RFI នៅថ្ងៃសុក្រនេះ លោក រ៉ុង ឈុន អនុប្រធានគណបក្សភ្លើងទៀនឲ្យដឹងថា ការដាក់លិខិតទៅសាលាក្រុងភ្នំពេញ និងក្រសួងមហាផ្ទៃ របស់គណបក្សភ្លើងទៀន ដើម្បីស្នើសុំជួបជុំសមាជិកនិងអ្នកគាំទ្រប្រមាណជាង ១ម៉ឺននាក់នៅទីលានប្រជាធិបតេយ្យចុងសប្ដាហ៍នេះ ត្រូវបានលើកពេល។ លើកពេលដោយសារមានបញ្ហាមួយចំនួនដែលគណបក្សនេះ ត្រូវធ្វើការពិភាក្សាគ្នាបន្ថែម ប៉ុន្តែគម្រោងជួបជុំទាមទារចូលរួមការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ នៅតែរក្សាដដែល។ នេះបើតាមលោក រ៉ុង ឈុន។
បើតាមលោក រ៉ុង ឈុន ទោះបីការតស៊ូមតិនេះ នៅតែមិនអាចទាមទារឲ្យគណបក្សភ្លើងទៀនចូលរួមការបោះឆ្នោតបាន ប៉ុន្តែការរក្សាជំហរធ្វើការជួបជុំសមាជិក និងអ្នកគាំទ្រនៅទីលានប្រជាធិបតេយ្យ គឺចង់បង្ហាញភាពអយុត្តិធម៌សម្រាប់គណបក្សភ្លើងទៀន ដែលមិនត្រូវបានអនុញ្ញាតឲ្យចូលរួមការបោះឆ្នោត។ អនុប្រធានគណបក្សភ្លើងទៀនបន្តថា ការមិនអនុញ្ញាតឲ្យគណបក្សភ្លើងទៀនចូលរួមការបោះឆ្នោតថ្នាក់ជាតិ នឹងធ្វើឲ្យប៉ះពាល់ដំណើរការប្រជាធិបតេយ្យនៅកម្ពុជា និងសិទ្ធិរបស់ប្រជាពលរដ្ឋប្រមាណជិត ២លាននាក់ ដែលគាំទ្រគណបក្សភ្លើងទៀន កាលពីបោះឆ្នោតឃុំ-សង្កាត់កន្លងមក។
ជាការកត់សម្គាល់ ក្រោយគណបក្សភ្លើងទៀនប្រកាសប្រមូលផ្ដុំជួបជុំសមាជិក និងអ្នកគាំទ្រប្រមាណជាង ១ម៉ឺននាក់ នៅទីលានប្រជាធិបតេយ្យសារជាថ្មី លោកនាយករដ្ឋមន្រ្តី ហ៊ុន សែន ក៏បន្តព្រមានចាប់ខ្លួនផងដែរ ប្រសិនបើហ៊ានចេញតវ៉ាដោយខុសច្បាប់។ ការព្រមានជាថ្មីនេះ ធ្វើឡើងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានបេតុងខ្សែកាបឆ្លងកាត់ទន្លេសាប ឬស្ពានឬស្សីកែវ នៅថ្ងៃទី៣១ឧសភា។
ប៉ុន្តែយ៉ាងណាការព្រមានចាប់ខ្លួននេះ លោក រ៉ុង ឈុន ថាគណបក្សភ្លើងទៀនមិនមានការព្រួបារម្ភឡើយ ជាពិសេសរូបលោកផ្ទាល់។ មិនមានការព្រួយបារម្ភ ដោយលោក រ៉ុង ឈុន ថាគណបក្សភ្លើងទៀនធ្វើអ្វីៗគោរពទៅតាមច្បាប់ ដូច្នេះបើការជួបជុំនេះ មិនត្រូវបានអនុញ្ញាពីអាជ្ញាធរទេ នោះគណបក្សភ្លើងទៀន មិនធ្វើការជួបជុំតស៊ូមតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ