លោក ហ៊ុន សែន ថា ការបាត់បង់EBA២០%កន្លងមក បានប្រាប់កម្ពុជាឲ្យត្រូវពង្រឹងភាពធន់ដោយខ្លួនឯង
លោកនាយករដ្ឋមន្ត្រី ហ៊ុន សែន នាវេទិកាសាធារណៈនៅថ្ងៃអាទិត្យនេះ បន្តអះអាងថា ការបាត់បង់ប្រព័ន្ធអនុគ្រោះរបស់សហភាពអឺរ៉ុប ២០% រយៈពេលជិត៣ឆ្នាំកន្លងមកនេះ មិនបាននាំបញ្ហាអ្វីដល់ការនាំចេញរបស់កម្ពុជាសោះឡើយ។ ផ្ទុយមកវិញ សម្រាប់លោកនាយករដ្ឋមន្ត្រី ការបាត់បង់ផ្នែកខ្លះនៃប្រព័ន្ធអនុគ្រោះពន្ធនេះ បានពង្រឹងភាពធន់របស់កម្ពុជា ដ្បិតប្រព័ន្ធអនុគ្រោះរបស់សហភាពអឺរ៉ុប គង់តែនឹងបាត់បង់ទាំងស្រុងក្នុងពេលខាងមុខ។
ចុះផ្សាយនៅថ្ងៃ៖
ស្តាប់ - ០២:២៨
នៅចំពោះមុខបណ្តាកម្មកររោងចក្រ ក្នុងខេត្តកំពង់ស្ពឺ ព្រឹកនេះ ប្រមុខរដ្ឋាភិបាលកម្ពុជាបានឆ្លើយតបទៅនឹងបញ្ហាEBA ដែលជាប្រព័ន្ធអនុគ្រោះរបស់សហភាពអឺរ៉ុប ចំពោះបណ្តាទំនិញនាំចេញពីកម្ពុជា ជាពិសេសវិស័យវាយនភណ្ឌកាត់ដេរ ថាមិនបានប៉ះពាល់ដល់សេដ្ឋកិច្ចកម្ពុជា បើទោះបីជាការនាំចេញទៅកាន់ទីផ្សារអឺរ៉ុបត្រូវបង់ពន្ធ បន្ទាប់ពីកម្ពុជាបានបាត់បង់ប្រព័ន្ធអនុគ្រោះមួយនេះ ២០%។ តាមលោក ហ៊ុន សែន ការបាត់បង់២០%នៃប្រព័ន្ធអនុគ្រោះពន្ធ EBA គ្រាន់តែធ្វើឲ្យកម្ពុជាចំណេញតិចជាងមុនតែប៉ុណ្ណោះ។
ការបាត់បង់ប្រព័ន្ធអនុគ្រោះពន្ធ ២០% រយៈពេលបីឆ្នាំមកនេះ លោក ហ៊ុន សែន បានអះអាងថា ជាការពង្រឹងភាពធន់របស់កម្ពុជាចាប់ពីពេលនេះតទៅ។ បញ្ហានេះ លោក ហ៊ុន សែន បានឲ្យដឹងថា លោកធ្លាប់រំលឹកមន្ត្រីក្រោមឱវាទរបស់ខ្លួន នាអំឡុងទៅប្រជុំនៅអឺរ៉ុប ថាដាច់ណាត់មិនឲ្យហាមាត់សុំត្រលប់មកវិញ នូវចំនួន២០%ដែលអឺរ៉ុបបានកាត់ពីកម្ពុជានោះទេ។ បើតាមលោក ហ៊ុន សែន ការធ្វើយ៉ាងនេះ គឺដើម្បីសាកល្បងចង់ដឹងថា តើភាពធន់កម្ពុជានៅកម្រិតណា ហើយកម្ពុជាត្រូវពង្រឹងសមត្ថភាពរបស់ខ្លួន ដោយមិនចាំបាច់ត្រូវការខ្យល់អុកស៊ីសែនរបស់អឺរ៉ុបមកដកដង្ហើមឡើយ។
គួររំលឹកថា សហភាពអឺរ៉ុប នៅឆ្នាំ២០២០ បានសម្រេចកាត់ផ្នែកខ្លះនៃប្រព័ន្ធអនុគ្រោះពន្ធ EBA ២០%ពីកម្ពុជា ដោយសារតែកម្តៅនយោបាយបានពុះកញ្ជ្រោល ក្រោយការរំលាយអតីតគណបក្សសង្រ្គោះជាតិ។ ការបាត់បង់ផ្នែកខ្លះនៃ EBA នាំឲ្យសហជីពក្នុងវិស័យកាត់ដេរ យល់ឃើញថា ជាការនាំផលលំបាកដល់កម្មករក្នុងវិស័យវាយនភណ្ឌកាត់ដេរ ដ្បិតមុខទំនិញសំលៀកបំពាក់ ស្បែកជើង កាបូបជាដើម នឹងត្រូវបង់ពន្ធ។
តែយ៉ាងណាមិញ លោកនាយករដ្ឋមន្ត្រី ហ៊ុន សែន នៅថ្ងៃអាទិត្យ បានអះអាងជាថ្មី ថា ការបាត់អស់២០%នោះ មិនជាបញ្ហាអ្វីឡើយ ហើយកម្ពុជាក៏នឹងតៀមចិត្តក្នុងការបាត់បង់ប្រព័ន្ធអនុគ្រោះនេះទាំងស្រុងដែរ។ លោកថា EBA គង់តែបាត់ ១០០ភាគរយ ក្នុងពេលខាងមុខ អាចនៅឆ្នាំ២០២៦ ឬ២០២៧ នៅពេលដែលកម្ពុជាចេកចេញពីប្រទេសអភិវឌ្ឍន៍តិចតួច។
គួរកត់សម្គាល់ថា ក្រោយការបាត់បង់ផ្នែកខ្លះនៃប្រព័ន្ធអនុគ្រោះពន្ធ EBA រដ្ឋាភិបាលកម្ពុជាបានចាប់ផ្តើមបង្វែរទិសដៅចរន្តសេដ្ឋកិច្ច ដោយងាកទៅប្រទេសដទៃទៀត តាមរយៈការបង្កើតឲ្យមានកិច្ចព្រមព្រៀងពាណិជ្ជកម្មសេរីទ្វេភាគី។ ក្នុងនោះចិន ជាទីផ្សារ ដែលកម្ពុជាចរចា FTA បានសម្រេចមុនគេ ដើម្បីបង្កើនទំហំពាណិជ្ជកម្មក្នុងការនាំចេញ នាំចូល។ ក្រៅពីនេះ ទីផ្សារកូរ៉េខាងត្បូង ហើយក៏នៅមានបណ្តាប្រទេសផ្សេងទៀត ដែលកម្ពុជាចិញ្ចឹមចិត្តចង់បង្កើតឲ្យមានកិច្ចព្រមព្រៀងពាណិជ្ជកម្មសេរីទ្វេភាគីបន្ថែម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ