តុលាការកំពូលលើកពេលប្រកាសសាលដីកាសំណុំរឿង លោក ថាច់ សេដ្ឋា
តុលាការកំពូលនៅព្រឹកថ្ងៃចន្ទនេះ បានបើកសវនាការលើសំណុំរឿង លោក ថាច់ សេដ្ឋា អនុប្រធានគណបក្សភ្លើងទៀននៅក្រោមបទចោទ«ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឲ្យមានការរើសអើង»។ បើតាមមេធាវីការពារក្តីក្រោយបិទសវនាការនៅព្រឹកនេះ គឺប្រធានអង្គជំនុំជម្រៈសម្រេចលើកពេលប្រកាសសាលដីកាទៅថ្ងៃទី១៩មិថុនាខាងមុខ។
ចុះផ្សាយនៅថ្ងៃ៖
ស្តាប់ - ០១:៤៤
មេធាវីការពារក្តីឲ្យលោក ថាច់ សេដ្ឋា គឺលោក ជួង ជូងី សុំមិនបញ្ចេញមតិយល់ឃើញអ្វីច្រើនឡើយលើការបើកសវនាការនៅថ្ងៃនេះ ដោយគ្រាន់តែបញ្ជាក់ថា លទ្ធផលយ៉ាងគឺរងចាំដល់ថ្ងៃទី១៩មិថុនា។
អនុប្រធានគណបក្សភ្លើងទៀន លោក ថាច់ សេដ្ឋា ត្រូវបានចាប់ខ្លួនកាលពីថ្ងទី១៦មករា២០២៣ ពីបទ «មិនបានបំពេញកាតព្វកិច្ចចំពោះឧបករណ៍អាចជួញដូរបាន»ឬចេញឆែកមិនមានទឹកប្រាក់ ដែលប្រព្រឹត្តទៅនៅរាជធានីភ្នំពេញ កាលពីអំឡុងឆ្នាំ២០១៩ ។ តុលាការកំពូលបានបដិសេធសំណើសុំនៅក្រៅឃុំរបស់លោក ថាច់ សេដ្ឋា បើទោះជាមានការបង់ប្រាក់តម្កល់ប្រាក់៣ម៉ឺនដុល្លារដើម្បីធានានៅក្រៅឃុំក៏ដោយ។
ប៉ុន្តែក្រោយមក លោក ថាច់ សេដ្ឋា ត្រូវបានតុលាការកំពូលចោទប្រកាន់បទល្មើសព្រហ្មទណ្ឌបន្ថែមទៀត ពីបទញុះញង់ អំឡុងពេលអ្នកនយោបាយបក្សប្រឆាំងរូបនេះបានចេញទៅប្រទេសកូរ៉េ។ ការណ៍នេះ គណបក្សភ្លើងទៀនលើកឡើងថា ជាការចោទប្រកាន់តាមបែបនយោបាយ ជាជាងតាមប្រព័ន្ធផ្លូវច្បាប់។
សូមរំលឹកថា ក្រៅពីលោក ថាច់ សេដ្ឋា លោក សុន ឆ័យ អនុប្រធានគណបក្សភ្លើងទៀនម្នាក់ទៀត បានបាត់បង់ដីធ្លី ក្រោយរងបណ្តឹងគណបក្សប្រជាជន ហើយលោក គង់ គាំ ឧត្តមទីប្រឹក្សាគណបក្ស ក៏បានរងនូវបណ្តឹងតុលាការដែរ។ ទីបំផុតដីនិងផ្ទះរដ្ឋ ដែលលោកធ្លាប់រស់នៅអស់ពេល៤ទសវត្សរ៍ ត្រូវលោកប្រគល់ឲ្យក្រសួងការបរទេសវិញ ហើយលោកនាយករដ្ឋមន្ត្រី ហ៊ុន សែន ក៏បញ្ចប់ការប្តឹងបន្តទៀត។
មកដល់ពេលអ្វីដែលបានកើតឡើងទៅលើគណបក្សប្រឆាំងធំជាងគេនេះ គឺគណបក្សនេះមិនត្រូវបានអនុញ្ញាតឲ្យចូលរួមបោះឆ្នោតនៅថ្ងៃ២៣កក្កដាឡើយ ក្រោមហេតុផលមិនបានបំពេញលក្ខខណ្ឌតម្រូវរបស់គណៈកម្មាធិការជាតិរៀបចំការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ