អាជ្ញាធរខ្មែរនៅតែប្រុងប្រយ័ត្ន ទោះជាមិនឃើញមានវត្តមានក្រុមម៉ុងតាញ៉ាចូលមក
ការប្រុងជើងការចាប់បញ្ជួនក្រុមបះបោរវៀតណាម ឬជនជាតិភាគតិចម៉ុងតាញ៉ាទៅប្រទេសខ្លួននៅតែបន្តមិនទាន់ដកកម្លាំងចេញនៅឡើយ បើទោះជាមកដល់ពេលនេះ នៅមិនទាន់ឃើញ និងមិនទាន់ចាប់បានក្រុមនេះសូម្បីម្នាក់នៅឡើយនោះ។ នេះបើតាម អភិបាលខេត្តរតនៈគិរី។ ប្រាប់វិទ្យុបារាំងអន្តរជាតិRFI នៅថ្ងៃអង្គារនេះ លោក ញ៉ែម សំអឿន អះអាងថា កម្លាំងសមត្ថកិច្ចនៅតែ បន្តដើរល្បាតនៅតាមខ្សែបន្ទាត់ព្រំដែនជាប្រចាំ តែមិនទាន់រកឃើញក្រុមជនជាតិម៉ុងតាញ៉ាដែលប៉ះទង្គិចដោយហិង្សាជាមួយអាជ្ញាធរវៀតណាមកន្លងមក ឆ្លងចូលមកលាក់ខ្លួននៅកម្ពុជានោះទេ។
ចុះផ្សាយនៅថ្ងៃ៖
សូមស្តាប់លោក ញ៉ែម សំអឿន៖
បន្ទាប់ពីមានការវាយប្រយុទ្ធគ្នាដោយប្រដាប់អាវុធចាប់តាំងពីថ្ងៃទី១១ ខែមិថុនាមក រវាងក្រុមបះបោរវៀតណាម ឬជនជាតិភាគតិចម៉ុងតាញ៉ាប្រមាណ៦០០នាក់ និងអាជ្ញាធរវៀតណាម លោកនាយករដ្ឋមន្ត្រី ហ៊ុន សែន បានដាក់បញ្ជាឲ្យកងកម្លាំងកម្ពុជានៅភូមិភាគ១ និងអាជ្ញាធរខេត្តរតនគីរី មណ្ឌលគីរី ក្រចេះ និងត្បូងឃ្មុំ បង្កើនការប្រុងប្រយ័ត្ន សហការជាមួយអាជ្ញាធរវៀតណាម ទប់ស្កាត់កម្លាំងបះបោរ ដែលរត់ចូលមកទឹកដីកម្ពុជា បន្ទាប់ពីពួកគេបានបាក់ទ័ព។
លោក ហ៊ុន សែន បានព្រមានទុកជាមុនដល់អង្គការអន្តរជាតិ ឬពលរដ្ឋខ្មែរណាក៏ដោយ មិនឲ្យទទួលពួកម៉ុងតាញ៉ាវៀតណាមនេះជាដាច់ខាតដោយលោកមិនផ្តល់សិទ្ធឲ្យពួកគេជ្រកកោនជាជនភៀសខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ